《ASSO回憶錄》: 第九節
(9)
能夠打開到女性既心房, 佢應該覺得你係一個值得信賴既人…
我: [不如我送你返屋企先, 你對眼紅哂] 佢都訓左係我度半個鐘…
Tiffany: [咁佢地點…]
佢無望我, 始終,喊過既女仔好小比人睇佢個樣
我: [我同佢地講聲, 順便幫你拿埋個袋, 你係度等我]
我起身,準備去幫佢拎袋
Tiffany: [唔好啦, 我係度抖下就得]
我陪佢坐返係度…
我真係好想幫佢, 我個心唔知點解有一刻既衝動…
我抑壓唔到自己果種感覺…
結果我做左一個, 我覺得好錯既決定…
我: [我好想幫你…]
Tiffany: [幫我?]
我: [我好想話你知其實拍拖係一件好開心既事…]
我: [如果…如果可以, 比個機會我, 我…我唔介意你心入面仲有佢, 我唔係要你任何野, 我只係好想你開心, 幸福, 我好想幫你, 幫你離開呢一個你唔應該擁有, 亦唔值得擁有既愛情…]
Tiffany: [呀瀚, 我…]
佢起身望住個海…
Tiffany: [我唔係要你可憐我…]
我: [我唔係可憐你, 你岩先問我會唔會追你, 其實我想追你好耐…]
我: [我唔想扔低你] 我行前左一大步, 我, 捉住左佢隻手…
我: [我都唔知點解, 我好想你開心…我好想幫你, 帶你離開呢個唔開心既地方…]
我唔知咁樣做岩定唔岩, 我靜係知道我好想佢開心, 我諗我自己中左招…
不過, 呢種感覺…係愛情? 定係出於憐憫?
正當我想知道 Tiffany有咩反應既時候, 我電話突然之間響起, 帶左我返黎現實…
我放開左手…
Vicky: [喂, 你地係邊呀? 有甜品食呀]
我: [得, 而家返黎]
Tiffany: [Vicky?]
我: [係…佢地話…有甜品食]
我地停止左哂成個對話, 我諗深一層, 我係唔應該咁樣乘人之危, 我真係做得過火左, 呢個時間唔係叫愛情, 係憐憫, Tiffany好可能都只係想有個朋友可以比佢發洩下, 佢都仲未散…
況且, 人地的的確確係拍緊拖, 我咁樣搶, 實在係太無品, 而且, Tiffany都無講乜野…
我醒左, 我知道岩先果D好可能係因為我可憐Tiffany而產生出黎既感覺…我要分清楚…
我唔可以咁樣…
我: [Sorry]
Tiffany呆左一下…
Tiffany: [唔緊要, 我唔該你就真, 聽我講左咁耐野] 佢向我微笑
對唔住, 你已經夠煩, 我仲比麻煩你…
我: [咁…不如返去?]
Tiffany: [好]
我同佢行左返去, 食完甜品, 再吹左一輪水, 就各自返屋企…
我無再同Tiffany講係碼頭既事, 因為我清醒返, 我覺得, 唔應該係咁…
我唔知Tiffany會唔會覺得我係一個咩人, 講一篇野但係又無表示, 仲要係佢咁傷心既時候食佢豆腐, 可能連朋友都無得做…
我內心好矛盾, 夠竟我自己做緊乜…
我返到屋企沖完涼, 訓左係張度諗左成個鐘頭…
我望住佢個wtsapp, 我好想問佢, 我好想同佢講今日係碼頭既事…
突然之間, 我見到佢輸入中…
Tiffany: [訓未?]
我: [未]
Tiffany: [仲唔訓?]
我: [你都唔訓]
我等左佢十分鐘, 見到個wtapps仲顯示緊輸入中…
佢係咪要打一段好長既野話我?
可能佢打緊點拒絕我…
唉…
係我準備打定輸數既時候, Tiffany send左一句令我心底好開心既說話…
Tiffany: [星期三你得唔得閒?]
等左十分鐘就係打呢幾隻字?
我: [做咩?]
Tiffany: [陪我睇80分鐘死亡直播]
咩意思? 約我睇戲?
今日發生左咁既事, 點解佢可以無事發生咁約我睇戲, 姐係點?
我: [就係咁簡單?]
Tiffany: [你想幾複雜?]
但係, 約我睇戲? 點解既?
我唔敢問佢點解…咁難得Tiffany肯主動約你睇戲, 你係咪仲要問咁多?
我: [好呀]
Tiffany: [星期三, 放學等, Gdnite]
我其實心情好興奮, 因為Tiffany無討厭我, 反而主動約我去睇戲…
不過諗深一層, 睇戲唔代表乜野, 可能Tiffany當我係friend姐, 我自己唔應該諗太多…
好! 訓覺!
星期一返學, 係堂上面…
Vicky: [呀瀚你後日得唔得閒?]
我: [做咩?]
Vicky: [我有兩張免費既80分鐘死亡直播既戲飛, 仲送埋爆谷同汽水, 我想你同我去睇呀]
Tiffany就係我地旁邊, 完完全全聽到我地既對話…
我: [下, 我果日唔得閒]
Vicky: [咁星期四睇囉? 佢去到星期五]
Tiffany完全無任何動靜, 可能…佢想聽下我有咩反應…
免費飛, 免費爆谷同汽水, 仲有條女陪你睇, 唔係唔去呀?
我可以同Tiffany睇第套既姐…
我: [唔得呀, 我約左其他人睇啦, 你約第個啦]
Vicky: [哼! 約左邊個咁緊要呀? 免費都唔睇]
點答你呀? 約左你旁邊正D果條女睇呀!
我: [唔好嬲啦, 我下次陪返你睇]
Vicky: [咁呀…Tiffany你同我睇?]
Tiffany: [我都已經約左人睇]
Vicky: [你地兩個約埋架?]
點解個心寒一寒…
我: [你都傻既, Tiffany點會約我去睇呀?]
Vicky: [黎啦, 陪我睇啦, 最多我請埋你食飯]
我: [呀…我…]
我: [落堂啦, 你搵第個睇啦]
夜晚, Tiffany wtsapp 我…
Tiffany: [不如你同Vicky睇]
唔知點解睇完呢句個心好唔舒服…
我: [咁你點?]
Tiffany: [我可以唔睇]
因為Vicky平時同Tiffany一齊搭車, 我覺得Vicky實有講過D野…
我: [Vicky影響左你?]
Tiffany: [佢好想同你睇]
我: [但係我應承左你先]
Tiffany: [我可以約第個睇]
男朋友?
諗到呢度其實我都想放棄, 個心好矛盾, 因為佢始終有男朋友, 有一個障礙係度…
但係, Tiffany約我睇戲係一個事實, 如果Vicky今日無約我, 我地星期三真係會去睇…
我唔想無左呢個機會, 因為無左, 唔知幾時會再有…
我要努力D…
我: [我想同你睇]
佢睇左我個wtsapp, 但係佢無覆我…
隔左十幾分鐘, 我加多句
我: [睇一套戲姐, 最緊要係你開心, 唔睇係ok既=], 不過就算你唔同我睇, 我都唔會同Vicky睇, 因為呢套戲係你既, 你唔同我睇, 我就無機會去了解呢套戲]
真係好鬼娘…但係至小講左我D感受先…
Tiffany: [ =] ]
笑? 姐係睇定唔睇?
我等多左十分鐘之後…
Tiffany: [咁星期三見]
唔知點解, 睇到呢句野我真係好開心, 就算我要比錢睇, 我都覺得值得…
我拒絕左Vicky之後, Vicky好快就搵到其他人陪佢睇…
星期三我地放四點半, 我地兩個去睇戲既事冇比其他人知道, 放學之後, 我地約左係遠小小既地方等, 再一齊搭地鐵…
不過…成程車我都無同Tiffany講過野…
我地去左Apm 買左六點鐘場, 但係仲有一個鐘頭先開始, 所以我地就周圍行下…
我唔想一直都咁靜, 所以我搵左D野講…
我: [你今日著得好好睇]
Tiffany : [多謝]
我: [乜你有玩琴架咩?]
Tiffany : [有]
我: [我都有玩下結他既, 得閒可以jam下]
Tiffany : [你玩左幾耐?]
我: [玩左幾個月咋, 你呢?]
Tiffany : [我玩左幾年]
我: [咁你咪好勁]
突然間, Tiffany比人撞一撞, 有小小失重心, 而失重心之濟, 佢繞住左我隻手…
我: [無野呀嘛? D咩人黎架? 咁大間商場都要撞人]
我拎轉頭喝一喝果個人, 但係果個人都行得幾快, 我諗佢應該都聽唔到我講野
Tiffany: [唔緊要, 我無事]
我: [你扶住我啦, 咁樣會安全D]
Tiffany: [嗯]
如果唔係Tiffany比人撞一撞, 我諗我地都未必咁close, 但就因為咁, 我先有勇氣問野…
我: [其實點解你約我睇戲既?]
Tiffany: [點解你咁鐘意問問題既?]
我: [我想解你多D嘛]
Tiffany : [咁你仲想問我D咩? 問題先生]
我: [好多架…仲想問你…]
真係要多謝撞Tiffany果個人, 我同Tiffany完全無覺得尷尬之餘, 仲同我有講有笑…
成套戲我冇咩點睇, 因為其實我有D驚, 特別係靜哂突然嚇你一野果D位, 加上聲音既配合, 真係唔合埋眼都唔得… 我見到Tiffany睇得好開心, 係咪痴線架?
睇完之後就去左食吉野家, 食到九點幾…
Tiffany: [不如走囉, 呢度返屯門好遠, 有冇巴士返去架? 我想坐巴士]
我: [有…259D, 係樓下有個站]
於是我就陪Tiffany落去搭車…
Tiffany: [今日套戲你好驚?]
我: [唔係好驚姐…]
Tiffany: [哈哈…你講大話, 我見到你合埋眼睇既]
我: [下…無呀]
Tiffany: [咁個劇情係咩?]
我: [um… 有D人追住D人黎殺]
Tiffany: [咁主角死果陣做左D咩?]
我: [大叫…]
Tiffany: [咁…]
我同佢講左好耐…果種感覺好舒服, 就好似一對情侶睇完戲你笑下我,我笑下你, 唔洗再諗呢句講得岩唔岩? 果句你聽左會點…
熱戀緊既情侶, 講咩都開心…
可能…不知不覺間…我已經進入左Tiffany既世界, 我只係覺得只要佢開心, 我就開心…
我: [車黎啦]
Tiffany: [唔唔…你走啦, 多謝你今日陪我睇電影]
我: [你小心D, 返到去話我知, 拜拜]
Tiffany: [嗯, 拜拜] 佢對住我微笑
呢個笑容, 好靚, 我感覺到佢係由心而發既開心…
我望住佢上車, 心入面有一鼓衝動, 覺得今日唔應該咁快完…但係屯門真係好遠, 而佢仲有男朋友…
我好想上車, 我嘗試抑壓住自己既情感…
但係, 我發覺…係碼頭講既野, 唔係出於憐憫…
我真係鐘意左佢…
我覺得Tiffany約我睇戲其實係一種提示, 話比我知我要主動D…
但係, 佢男朋友…
D人就快上哂車, 我唔可以再企係度諗, 我要做決定!
上車?
走?
我行後左一步, 原本我想走, 但係我發覺, 原來我真係唔捨得…我控制唔到自己…
愛情之所以奇妙, 係因為佢唔會跟邏輯而發展, 總會有D意想唔到既意外…
我上左車…
Tiffany: [你做咩上車呀? 好遠架]
我感覺到佢其實係開心… 我知道佢想我送, 但係怕我太遠
我: [我唔捨得你嘛]
我終於講出我入口面既感受…
Tiffany: [傻佬…]
呢句說話, 似層相識, 真係好好聽…
我已經唔理Tiffany夠竟點諗, 我只係想隨住我自己個心黎行…
我同佢坐左係上層…
Tiffany: [不如聽歌囉]
我: [好呀]
佢係袋度拿出耳筒, 分左一粒比我, 我放左落自己耳仔…
係我最鐘意既周杰倫…
我: [乜你都鐘意周杰倫?]
Tiffany: [係呀, 佢D歌好好聽]
我: [我都好鐘意, 不如一齊睇佢演講會]
Tiffany: [好呀]
佢住聽歌, 訓左係窗果邊…
但係係人都知道, 巴士行緊果陣一定會震下震下…
我見到佢訓得好唔舒服…
我: [不如我借個搏頭比你]
Tiffany: [唔洗, 我ok]
佢跟住就無再放個頭係個窗度, 但係就訓到好似釣魚咁…
呀…上次又唔見佢咁怕羞, 今次做咩死都唔訓落我度呢?
我望住佢訓都覺得辛苦…
所以, 我決定…
今次…我做主動…
我用左手將佢個頭放落我個搏頭度…
唔知聽住歌訓搏頭呢幾個咁簡單既動作, 有幾多對情侶試過?
我見到佢無抗拒…反而微笑左一下…
就係呢一剎那間…
呢種感覺, 真實得黎好夢幻… 周圍既景物都好朦…
我望住窗裹面既倒影, 我望唔清自己… 因為愛情黎到果陣…你已經再唔係望住自己…
呢程車…我就坐係佢旁邊, 我跟住我既感覺而行…個世界得返我地… 我同佢聽住同一首歌…欣賞住同一個風景…. 感受住同一樣既感覺…連接住同一個時空…
“ 我想就這樣牽著你的手不放開 愛能不能夠永遠單純沒有悲哀
我 想帶你騎單車 我 想和你看棒球
想這樣沒擔憂 唱著歌一直走 ”
簡單愛 - 周杰倫