《ASSO回憶錄》: 第十九節
(19)
Vicky係我屋企樓下, 一手就拖住我
Vicky : [我要拖住手行返學]
我: [你唔怕比人見到咩?]
Vicky : [點解要怕?]
Vicky同Tiffany既分別, 就係Vicky完全唔怕會比熟人撞到, 呃殺左其他男仔既機會… 相反Tiffany係學校要扮無野, 出街唔可以去旺角…
但係…
當我地拖到去學校付近…
我放左手…
我仍然好在意一個人…
Tiffany…
岩岩先同Tiffany散…我都唔想咁快就話比人知我拍拖, 其實我係唔想比Tiffany知…
我: [我想去一去廁所, 你上去先] 我諗左個藉口, 令到我地可以前後腳入去班房…
Vicky: [我等埋你]
我: [唔洗啦…我開大呀]
Vicky: [哦…咁我上去先]
Vicky, 對唔住…
我係廁所逗留左十分鐘先上去…
當我打開班房門既時候, 我已經見到Tiffany同呀俊坐左係度…而Vicky留左個位比我, 我地位置依舊…
呀俊: [點呀friend, 你個樣咁精神既, 唔似有病喎…]
我: [係呀, 琴日訓得好嘛…]
Vicky: [佢琴日緊係訓得好啦, 有我照顧住佢…]
我: [喂!] 我細細聲喂左Vicky一下, 想叫佢唔係亂講野
但係呀俊實在太醒…
呀俊: [哦…琴晚, 訓…咁我叫呀嫂定叫Vicky呀?] 呀俊搭一搭我搏頭, 用隻手逗一逗我下巴…
我: [哈…哈] 頂…我明明唔想講, 做咩又會爆左出黎呀…
希望Tiffany聽唔到…
我望一望Tiffany, 佢好驚訝咁望住我…
唉…慘啦, 比Tiffany知道左…
最慘係我唔知Tiffany會點諗, 我仲好在意佢, 好在意佢既反應
成堂我都無咩點聽書, 因為比佢知道左我同Vicky一齊, 唔知佢會點諗…
哎! 個頭好混亂, 我好想離開班房…
夜晚我收到Tiffany wtsapp…
Tiffany : [你同Vicky一齊左?]
我無答佢…
Tiffany : [祝你開心幸福]
我都無答佢…
Tiffany : [點解你可以咁快就同第二個一齊… 我好憎你]
Tiffany : [我叫你比一個星期我, 你唔比, 原來係你想同Vicky一齊...]
睇到呢句, 我終於忍唔住覆佢…
我 : [唔關Vicky事, 係你跟本唔想同我一齊]
Tiffany : [係你唔想同我一齊, 你有冇諗過我感受?]
睇到呢句我唔知點解好嬲, 點解好似係我唔岩?
我 : [我無理你感受? 係咁你有冇諗過我感受? 點解果晚你唔肯同張智林分手? 你肯分手我地一齊緊啦…]
Tiffany : [根本就唔關我同張智林既事, 你同我一齊既時候都知道有佢, 而家係你鐘意左Vicky, 諗左個藉口黎同我分手, 係你對我唔住]
我 : [我同你真係無野好傾, 我同佢一齊係認認真真同你分左手之後先一齊, 我無對你唔住]
Tiffany : [你話你愛我]
我 : [我愛你又點? 你同張智林開開心心一齊緊]
Tiffany : [所以你就要激我?]
Tiffany : [如果我今晚就同佢講清楚…你會唔會同返我一齊?]
……
佢講中左我想睇到既答案…
點解果晚唔咁講?
如果佢前日肯講呢句, 我諗唔會搞成而家咁…
我無覆佢…
因為, 我而家已經唔係前日咁樣無軒無掛…
我諗左十幾分鐘, 係度對比同平衡一下我地三個人既關係…
Tiffany實在太好…又靚,又高又斯文, 完美天使既化身, Vicky唔係靚, 身材又唔係特別好, 又唔斯文, 照道理…我應該揀返Tiffany...
但係…
我唔想對Vicky唔住, 佢對我太好…
但係Tiffany會為左我同張智林分手…
但係Tiffany會唔會又呃我?
我同返Tiffany一齊, 咁Vicky點算?
呀… 唔得…好亂…個頭好痛…
所以…
我決定…
訓覺…
因為呢幾日實在太累...
同埋我好需要心靈上既休息… 我好需要好冷靜咁去分析我之後要行既路…
第二日我返學我都無咩點聽書…
因為我好亂…我唔知道我應該點做…我好需要人幫我解決一下煩惱…
我諗到呀俊…
我: [俊…陣間放學得唔得閒?]
呀俊: [做咩?]
我: [我想搵你食飯…]
呀俊: [好!]
我覺得呀俊應該知道D野…所以佢答得咁快…
放學之後我同呀俊行左去尖沙咀食飯, 食完之後就行左去碼頭…
呀俊: [講啦…]
我: [你知道?]
呀俊: [我知道你煩架啦… 陪迴係兩個人之間…]
下…點解呀俊…
我: [點解你會知?]
呀俊: [上次拍片已經知, 只係我唔肯定… 今日你突然搵我, 都估到D野] 嘩…呀俊幾時變得咁細心…
我一五一十將我同Tiffany 同Vicky既事講哂比呀俊聽…
我: [比你揀, 你會揀邊個?]
呀俊深呼吸左一口氣, 示意我行去欄柵… 我地扶住欄柵,望住個海…
呀俊: [其實你心入面鐘意邊個?]
我: [我就係答唔到先問你… 我好鐘意tifany, 但係唔work呀, 我同佢諗法都唔同… 我都鐘意Vicky, 佢對我好好, 我諗唔到唔要佢既理由…]
呀俊: [我唔可以代替你去揀, 不過我只係講我既感覺, 講完之後你可以唔聽]
我: [唔唔]
呀俊: [其實我覺得都唔係好洗諗]
我: [咩唔洗諗?]
呀俊: [點講…就好似你去買野, 第一個人話你要比左錢先比佢手上件野你, 你唔比佢就袋返, 第二個人諗都唔諗比左手上件野你試, 但你仲未比錢]
洗唔洗咁抽象呀…
我: [你講緊咩呀?]
呀俊: [姐係第一個佢要你買左先, 佢先諗住放棄佢手上既野… 而第二個佢無諗過你買唔買, 佢只係想比你知件野好…]
我: [不如你講白D啦]
呀俊: [誠意, 你明唔明? 我明白人自私係好平常, Tiffany佢要你同佢一齊, 都過左兩,三日, 佢有冇同你講佢散左? 用口吹出黎既野我都得, 事實係佢得個講字, 佢咩都冇做到]
呀俊: [Vicky就唔同, 佢第一日就已經同哂人講你同佢既關係, 佢無諗過自己會無哂D男仔追, 無諗過你會玩佢, 佢可能會失去D野… 但係佢無諗, 因為佢覺得有你一個已經嬴哂一切, 有冇明D?]
哦…一早咁講咪得囉…
我: [但係我好鐘意Tiffany…]
呀俊: [兩睇啦, 中肯既野有時唔能夠放係多變既感情世界裹面, 你無論揀邊個我都支持, 只係如果係我, 我覺得我已經講得好明白]
我: [但係我同返Tiffany一齊, 佢會同張智林分手喎]
呀俊: [咁不如你而家同Vicky一齊, 再同Tiffany講, 我遲D就會同Vicky分手, 不如我地而家一齊返好唔好? 原理都係一樣, 就係睇你自己覺得咁樣既戀愛方式你接唔接受到, 接受到, 無咩所謂, 但係接受唔到, 你就要諗, 你同邊個一齊, 你會開心, 快樂]
我: [……]
呀俊: [其實我覺得襯而家仲有一段無比任何野影響過既愛情係度, 你就應該珍惜啦... 感情係兩方面, 你都比左機會Tiffany啦, 佢仲要諗，證明佢都有軒掛]
我諗我明呀俊想我點揀…
聽完呀俊講之後, 成個人清晰左… 諗野長遠左… 佢講得岩, 愛情係唔洗講條件, Tiffany呃得我第一次, 就會有第二次...
其實人拍拖真係好簡單, 最緊要就係開心舒服, 其次就係信任同溝通
我就算同Tiffany一齊返, 可能我個心永遠都有條刺...
與其我會一直都會唔舒服, 點解我仲要辛苦自己, 襯而家仲係拍左好短既日子...
怪就怪我地既開頭唔好…
我諗我都係時候要放低…
我要珍惜眼前人…
我: [我諗我明…多謝你呀俊] 真心地覺得好個好朋友真係好…
呀俊: [傾完啦可? 喂, 你有冇興趣夾Band?] 呀俊勁快就轉左題目…
我地果晚傾左好耐…
返到屋企… 我覺得呀俊講得岩…
雖然我同Tiffany仍然都好愛大家, 但係同一種感受,已經係唔同既時空…
愛情…錯過左就係錯過左…
同埋如果我而家決定同返Tiffany一齊, 我就會變成左Tiffany…
我唔可以咁…我要做返自己…
我打左一段wtsapp 比Tiffany…
[Tiffany, 其實我真係好鐘意你, 呢三個月我同你一齊真係好開心, 我無後悔過第一次送你返屋企… 我知道大家係呢件事上面都好辛苦… 可惜既係, 有D野過去左就係過去左, 改變唔到就係改變唔到… 時間永遠都係向前, 係返唔到轉頭…我本來真係好想同你一齊返, 但係我過唔到自己…我覺得我地都要珍惜眼前人… 我唔可以對唔住Vicky, 佢對我實在太好...我好希望你可以活得開開心心, 我同你既關係…就永永遠遠留係心入面, 你係我一生中認識過最靚既一個女仔… 再見啦Tiffany, 我地永遠都係好朋友]
我知道, 今次…我真真正正要放低Tiffany…
其實Send 呢段野我都好痛…
我唔知我會唔會後悔, 因為我覺得我唔會搵我返一個咁靚既女朋友…
但係…我唔可以對唔住Vicky…
有時候愛情唔可以靜係睇樣, 內在都好緊要…
就因為呢件事…我更加要珍惜Vicky…
解決左呢件事之後個人真係輕鬆左, 開朗左…
哈哈, 既然個人咁舒暢…
我決定…
Wtsapp Vicky
[Vicky bb不如聽日食個早餐再一齊返學囉…]