《ASSO回憶錄》: 第二十一節
(21)
Tiffany 已經連續三日無返學...
我開頭以為佢請一,兩日假，冇乜大問題，但係第三日，會唔會發生D咩事?
我明白分手可能需要時間平復，但....我有D擔心佢
我: [有冇搵過Tiffany?]
呀俊: [冇喎，你條女我邊敢搞呀，你搵下佢啦]
我? 但我岩岩先分左手，又叫我搵返人?
不過佢請三日假可能係因為我，我又唔可以咁唔負責任咩都唔理
我決定wtsapp搵佢，但係佢無覆我，我睇到佢最後上線時間仍然顯示係三日之前…
咁大個人, 佢去得邊?
一直到夜晚，Tiffany都冇覆我亦冇上線，我係屋企查佢facebook, 發現佢三日都無update過status…
會唔會真係發生左D咩事?
於是我嘗試問下Tiffany身邊既朋友，但佢地都話唔知佢係邊，搞到我更加擔心Tiffany…
結果成晚都訓得好差，第二日返學，我好期待Tittfany返學，但係佢都係冇返...
我: [我諗我要搵下Tiffany]
呀俊: [係囉，第四日都唔返，又冇人知佢去左邊]
Vicky: [今日放學係咪去食飯?]
我: [呀…今日我原來唔得, 我約左呀媽食飯]
Vicky: [同你媽咪食? 我又去]
我: [唔好啦，佢叫左兩個親戚黎，我驚你尷尬咋]
Vicky: [好啦，咁你食完打比我]
我: [好, 我食完打比你]
對唔住Vicky，其實我無約到呀媽, 我想去搵Tiffany, 因為件事因我而起…
放左學之後我就去左Tiffany屋企付近, 我不停咁打電話比佢, 佢都係無聽…
我漫冇目的咁係附近行左好多個圈，行左幾多我自己都唔清楚
我好擔心, 我好想上去禁鐘，但係我從未見過Tiffany屋企人，我唔知佢地會點諗
更何況，其實有張智林呢個兩年既男朋友係度, 我其實係咪要咁緊張?
但係我控制唔到，我唔知點解咁在意，愈係搵唔到Tiffany我個心就愈急…
或者，係危急關頭, 原來先會發現自己最著緊既人…
我行多左好多個圈，我決定，上去佢屋企了解下,
但當我準備行去佢樓下之濟…
我感受到一種好熟識既感覺，我不自覺咁令轉面...
係後面遠處…我見到一個短褲女仔, 拖住一個喼慢慢咁行緊過黎…
Tiffany: [呀瀚? 點解你係度?]
見到Tiffany，我有一種好強烈既衝動，理論我上我應該走過去話佢，點解咁冇交帶....
但係，我行埋去擁抱住佢…
係屋苑暗黃街燈既映射下，我同佢就好似回復返當衫一齊既感覺，Tiffany冇任何反應，靜靜地感受住我比佢既溫暖...
我: [你冇事就好]
Tiffany笑: [做咩? 你關心我呀?]
我: [你去左邊，做乜唔同我地講聲，你嚇死我]
Tiffany: [你以為我會做傻事呀? 傻豬]
我合埋眼感受住佢既氣味同體溫，我唔知道佢幾時會推開我，係呢一刻，我只係想攬實佢
Tiffany: [你攬到我好實呀]
我慢慢鬆開手...
我: [咁你呢幾日去左邊]
Tiffany: [咁你唔要我嘛，我咪去左台灣玩幾日]
我: [你去旅行都唔講聲比我地知]
Tiffany: [係呀, 係比較急，我都未試過咁樣自己一個去旅行，話去就去]
見到Tiffany，我認清自己，最鐘意果個係Tiffany
我: [你以後都唔好離開我]
Tiffany笑: [我冇離開你呀，聽日返學你都見到我]
我: [我既意思係...不如我地一齊返]
經過咁多離離合合，我發覺Tiffany係我心目，原來好緊要，緊要既程度比Vicky大好多，至少而家既我，冇諗起過Vicky...
如果Tiffany去旅行係因為我，咁姐係佢都放唔低我...
Tiffany行向前攬住我，同我黎左一個擁吻，呢種感覺好舒服，好懷念...
但係...
當我以為我地終於可以重新開始既時候...
Tiffany拒絕左我...
Tiffany: [呀瀚，其實同你一齊真係好舒服，我都好想同你一齊，但係去旅行呢幾日，我諗通左好多。你講得岩，我同你呢段關係一開始就係錯，我承認一開始聽到你同Vicky一齊，我好唔開心，我好想搶返你返黎，但其實冷靜落黎之後，我覺得我既愛已經變左質，或者一開始鐘意你係因為我同張智林既問題，我或者只係想搵一個令我開心既人, 我同你一齊果3個月我真係好開心，我唔後悔，但我想改正我以前咁自私既諗法同行為，我衷心想同你做返好好既朋友，Vicky係一個好女仔，你唔好沽負佢]
我: [咁你錫我係?]
Tiffany: [我想係講出呢段說話之前, 記低我地一齊既感覺，我永遠都會記住，我同你經歷過既一切]
聽到Tiffany呢一番說話，我諗我知道自己要做咩，當一個女仔同你講得出呢啲說話，佢一定諗得好清楚
Tiffany: [都夜啦，我送你去搭車啦]
我: [我地真係冇彎轉?]
Tiffany: [講左就要負責任架啦，你都要負責任]
我: [我可唔可以拖多你一次?]
Tiffany: [最好唔好，我驚我唔捨得你]
我同Tiffany慢慢行向巴士站，以一種普通朋友既關係同距離
我抖左好多下大氣，我分唔清而家係真實定夢境，但我亦知道，亦明白呢段關係既完結，我都有責任
我亦唔可以咁自私，想要既時候要，唔想要既時候就唔要，我都要好似Tiffany咁，學識放下，對我對佢都係一種解脫...
我: [放心Tiffany, 既然你選擇放下，我尊重你。我對你既愛，我會永遠收埋係心入面，我會等你]
Tiffany: [呀瀚，我都會記住你]
就係上車既一刻，我同Tiffany作一個最後擁抱，我都係時候各向前望，行一條我想行既路...
Tiffany永遠都係我心目中估一席位，我永遠都會記得呢一個人...
從此之後我同Tiffany變返朋友關係，我地仲係日日見面, 因為大家都係組員…
但係已經冇以前咁親密，講說話亦都客氣左好多...
而我…就真真正正同Vicky建立兩個人既共同回憶...
我同Tiffany既事，除左呀俊，冇一個人知道，我亦冇打算比Vicky知，因為唔想Vicky心中有咩唔好既諗法...
不過, 有D野原來點收都收唔埋…
我同Vicky拍左個幾月, 有一晚我同佢食完飯…
Vicky: [我有D野想問你]
我: [問啦]
Vicky: [你係咪同Tiffany拍過拖?]
呀? 點解佢會知?
我有諗過講真話定假話，講真話，可能佢會亂諗...
但係講大話, 之後發現可能仲衰...
反正又唔係D咩對佢唔住既事，最多都係比佢鬧我做乜唔話佢知, 好過成世都收收埋埋…
好啦, 死就死
我: [我...係同Tiffany拍過拖]
Vicky: [哦]
咩反應…咁係咪姐係完左個topic?
但係…Vicky再無出過聲…
我: [做咩?]
Vicky: [無野]
但係, 估唔到既係…呢句無野之後…
佢喊…
我: [做咩事呀傻豬, 做咩喊呀?]
Vicky: [你係咪仲有野呃住我?]
我: [下…我仲有咩呃你呀]
Vicky: [咁你做咩唔講, 要我問你先答]
我: [咁小事, 況且係之前既事啦, 而家我同緊你一齊架嘛]
Vicky: [係咪因為我你地先會分手?]
我: [痴線, 邊個同你講架?]
Vicky: [你答左我先]
唔多唔小係…不過我緊係唔會講出黎
我: [緊係唔係啦, 我真係鐘意你架傻豬, 我同佢拍左唔係好耐咋嘛…]
Vicky: [但係佢唔係有男朋友架咩?]
呢個問題都幾難答…
我: [佢地中間散左一排既, 唔知佢地D野好耐啦喎]
Vicky: [你仲有冇野呃我?]
我: [呀…有! 其實我晚晚同你講完早抖, 我都走左去打兩舖機先訓]
Vicky: [我一早知啦]
我: [你點知架?]
Vicky: [我都有野呃住你]
我: [咩呀?]
Vicky: [其實我就係琴晚果隻Garen]
我: [下, 你就係死左十次, 比我係咁鬧果隻Garen?]
Vicky: [我差D就想打電話鬧返你, 不過我唔想比你知我都有玩]
我: [哈哈, 你平時都唔會玩架, 做咩無啦啦打機?]
Vicky: [因為你玩, 我想陪你玩, 睇你有冇溝女]
我: [你早D講呀嘛, 咁我唔洗諗D藉口訓, 可以同你一齊打]
Vicky: [余文瀚, 你聽住, 如果你再有野呃住我, 我就剪左你]
我: [我發誓, 如果我再呃你, 我舖舖輸]
Vicky: [哈哈, 你都無嬴過]
我: [咁係因為你隻Garen阻住哂]
唔知點解, 我覺得 Vicky真係好好…佢為左想陪我, 學打機…
我其實好感動, 我知道, 徘徊係佢地兩個人之間太耐未必係一定好事, 因為我地三個同班…
我相信Tiffany都係咁諗, 所以先會有咁既決定，我明白有D野唔可以兩全其美...
其實同Vicky一齊真係好舒服，一齊返學, 一齊放學, 一齊打機…我咩都唔洗諗, 享受住 Vicky帶比我既快樂…
Vicky係一個好識諗既女仔, 佢知道有咩事應該做, 有咩唔應該做…而且佢有咩事都會問一問我…
而且我真係感覺到Vicky好鐘意我, 因為佢日日都想見我, 搞到我都無咩私人時間…
或者，Tiffany當日既決定係岩既，佢成全左我同Vick既發展...