本來諗住對付班電話cold call, 點知攪到自己爭d無命: 2

之前喺電視成日睇到葉童個拒收訊息登記名册廣告，當其時主要針對fax機。但近排唔覺再有呢個廣告出現。我心諗其實可以照辦煮碗，俾一d好似我咁唔想接聽推銷電話嘅人登記，呢個世界一樣米養百樣人，唔排除有d人係鍾意電話推銷，咁d call centre嘅call list可以篩走好似我呢d唔接受電話推銷嘅，一家便宜兩家著，班sales唔需要浪費時間打俾d對電話推銷反感嘅人，其實增加closing機會。

我將呢個構思email去政府，點知佢哋回覆話唔想干預市場運作，我真喺吹到啤一聲！我唔明政府點解會reject我呢個win win雙贏嘅構思。

我d神經衰弱好似越來越嚴重咁，個日我行行吓街又接到呢d電話，我即刻火滾發晒癲，一嘢掟部電話落地下，好彩部機夠硬淨，只係花左少少，不過我條女被我嚇到喊左出嚟，佢話從來未見過我咁燥底。而有樣嘢更仆街既係，我條女喊緊個時，又有人打俾佢sell借錢！

條女叫我不如睇吓醫生喎。

最後我都聽左佢講，因為我連胃口都差埋，同條女攪嘢都無晒心機，硬唔到。





我住屯門，今日去左明心樓睇症，明心樓喺青山醫院隔離，經過時幾驚自己會入埋去。睇症時做左份問卷，之後我同醫生講左我d問題後，佢就開左d黃色藥俾我，再排期覆診。

好在唔駛入青山！！

返屋企個陣又有人打嚟，講一大堆國語，自然又係d電騙黨。今時今日香港人接既來電，隨時推銷或者電騙，數量遠多過來自自己認識嘅人。

兩樣野我覺得都要消滅，不過電騙來自好似KK園之類嘅龐大犯罪集團，個d要出動軍隊先對付到，我實在無咁大本事，只可以消極抗爭，唔聽唔睬唔理。

但對於電話推銷，我反而諗到另外一個方法對付……