本來諗住對付班電話cold call, 點知攪到自己爭d無命: 11

我起番身個時，竟然發覺自己重係浩和街，個頭重瞓咗起我㗎滑板車到。

唔通我只不過係發夢？但係，個感覺好真實喎！定係我已經思覺失調？

個班靚仔靚妹一個都見唔到，但佢哋d單車重停係呢塊大草地。我所有手機同銀包重係身，於是即刻踩番屋企梳洗，即刻上床瞓覺。我真係攰撚到行都唔想行咁滯。但頭先發生嘅野我重係歷歷在目，我分唔到頭先所發生嘅野係未真實發生過，個腦不停咁轉，攪到我完全瞓唔到。

第二日返工，見到成條街既人重係不停接電話，不論係斯文OL定係黑實地盤佬，全部都係陰聲細氣，個個重係面無血色。我朝早見老豆老母個樣，直情好似撞邪咁，眼神呆滯。

What’s app俾條女已讀不回，打俾佢又唔聽電話。返到公司，個個同事好似幾日無瞓覺咁款，做做吓野會瞓著覺。





成個香港好似得番我無事無幹咁。但係我好似身處係科幻小說電影咁，見到咁嘅狀況之餘，重無喇喇走左個虛擬世界打空戰。

但我都有一時三刻以為自己精神分裂。

我今晚又踩住架板車去番浩和街，班靚仔d單車重係度，我坐係大草地，嘗試組織下呢輪發生嘅野原由，但d野太荒誕太快，個腦完全無法諗到野。

離遠見到有班人踩住單車過來，我直覺有d唔對路，拿拿淋踩上車走。但係我個架只係腳動滑板車，個班全部都係Road bike。好快已經被佢哋追上。

個班全部都係兇神惡煞，對住我圍咗個圈，我完全無得走。





我都未攪清發生乜嘢事，後腦已經硬食咗一拳，成個失平衡跌咗落地，之後幾個同時間衝埋嚟，依家除左抱住個頭，我身體其餘部位都只可以任佢哋魚肉。

佢哋打完之後就走，一句野都無講過。

被佢哋打完之後唔知點解好似無乜嘢咁，但頭先佢哋係發晒癲咁𡁻，但都只係有少少擦傷。

不過我都照報咗警，十字車車咗入屯門醫院，好彩係皮外傷無乜大問題。

但奇怪嘅係無警察同我落口供。





我大概都知道可能係我之前多管閒事得罪咗d有勢力人士，但既然依家咁把炮連差佬都唔理，點解唔索性隊冧我呢？。

我無將我俾人打嘅事話俾條女知，老豆老母都係話自己炒車整傷算。但佢哋個樣好麻木愛理不理咁，只係掛住接電話。

有時心諗：如果好似佢哋咁咪好囉！至少唔駛俾人打。但唔係喎，d錢會俾人呃鳩晒噃！但係出面變到咁，如果唔恢復番正常，以後重點生活呢？

D傷好快好番，我今晚又踩去浩和街，當然見過鬼怕黑，沿途都提高警覺。去到大草地，靚仔d單車唔見晒，唔知係當垃圾清走咗定其他原因。

我慢慢踩到岸邊，個度平時有好多人釣魚，但依家鬼影都無隻，加上一月冬天寒冷，望住個海，有種好莫名嘅悽冷感覺，真係想坐低飲番打啤酒。

正諗住hea多陣就返屋企之際，離遠見到有個女仔行緊過嚟……