本來諗住對付班電話cold call, 點知攪到自己爭d無命: 12

經過上次俾人打，雖然只係一個女仔，但點都會提高警覺。但佢一行近，我就認得到佢。五戰士中既妹妹仔，今晚著住條長裙好斯文。

佢見到我甜甜一笑，我即刻問番佢哋最新情況。

原來架戰機被擊落後佢哋被電騙黨禁錮咗係佢哋大本營，重強迫佢哋打電話呃人。五個人因為能量值唔夠，返唔到真實世界，後來阿丁提議將佢哋能量值過俾個妹妹仔，等我可以返番真實世界搵我。我當然聽到一頭霧水，不過妹妹仔話會再慢慢解釋俾我聽。

但佢一而再，再而三強調：

「你係到目前為止，唯一有能力打敗個批電騙黨既人，我無睇錯你，我其餘戰友返唔返到真實世界，同埋香港可唔可以復常，就要睇你。但係你重未有戰鬥值，嚟緊日子，我會同你進行密集訓練。」





吓！吓！

佢重同我講個班撚樣其實係想殺死我，但佢哋低估咗我既體格，所以佢哋點用全力，我都只係輕傷，重話如果我有三級戰鬥值，已經足夠掟晒佢哋落海喂魚咁話。

睇Marvel d 戲就睇得多，真係無諗過自己原來係超級英雄。

之後佢講番原來佢哋係志願軍，任務係去虛擬世界同呢班騙子戰鬥。呢班騙子掌握咗操控虛擬世界既技術，佢哋將d被捉走呃走既受害者踢去虛擬世界，之後迫佢哋打電話呃d現實世界既人，由於佢哋入咗虛擬世界，現實世界既人無可能營救到班受害者，亦無辦法對付到班騙徒。

我都重係一頭霧水，同埋覺得條女好似講d唔講d嘅感覺。係我理解力唔好定佢有野唔想俾我知，真係無從分辨。





妹妹仔話情況緊急，叫我呢輪廿四小時要受訓，唔好返工同返屋企，要暫時斷六親，唔好見任何人。

但係要埋月結喎，但佢話已經用咗上次個招乜嘢時空凍結，唔會有問題喎。

我連選擇嘅權利都無？佢補充話已經唔輪到我選擇，香港人嘅命運係晒我手。

佢強調佢都一定要跟住我做保鏢，因為班撚樣殺唔死我一定唔會就咁算，下次郁手個班一定會高level過之前個班。但得佢一條女，同埋上次空戰佢五個都唔夠揪，如果真係再來刮我，佢掂唔掂㗎。

我真係好想問：何必偏偏選中我？我無端變咗超級英雄，但又有成班人追殺我。條女好似知我諗乜咁，話係天命。





之後條女攞佢部手機出嚟，對住我影相，我即刻眼前一黑……