本來諗住對付班電話cold call, 點知攪到自己爭d無命: 15

妹妹仔攪住我叫我盡情喊出嚟，不過佢咁講我反而唔再喊。我心諗，其實同我條女，都唔係好夾，我都唔係咁鍾意佢，只不過親眼見住佢哋又攪又錫，覺得好唔抵啫，話晒我對佢都唔差，除咗層樓，佢想要乜都滿足晒佢送俾佢，依家吼我唔係現實世界，就出賣我，唔怪之得已讀不回啦！

妹妹仔安慰我話都係因為班撚樣玩嘢，攪到香港個個都孭債，要快d將佢哋趕出地球……佢講到呢度停晒口。

我已經訓練到自己隨意控制意念，無分析呢句話意思，反正真相遲早都會知，況且我一路相信有外星文明，經過呢輪發生嘅事情，你話我聽，甚至親眼見到接觸到外星人，已經唔感覺意外。

「其實個班電騙黨有部分主腦唔係地球人類，係來自一個距離地球九十光年，叫巴兩星嘅星球人，呢班人嚟地球嘅目的並唔係你哋d科幻片同小說咁描述要侵佔地球，佢哋嚟只不過係想玩遊戲，佢哋聯同本來做開電騙個班賊黨作惡，除咗玩電騙，個d本來做正當電話推銷嘅call centre，都被佢哋收購控制晒。之前都同你講過佢哋捉走地球人去虛擬世界進行電騙，佢哋做咁多野，其實只係覺得好玩。」

「呢個星球有無窮盡資源，d人唔駛好似地球人咁要工作賺錢，所以無所事事之下就走去其他星球攪攪震，攪到神憎鬼厭，全個宇宙都唔like佢哋。」





「其實地球人唔駛因為呢單嘢擔心會被外星人入侵，因為地球對宇宙間其他文明嚟講，只不過係一個落後嘅星球，尤其係資源分配上，好多外星文明唔需要去搶去呃去爭，地球好多嘢，特別係所謂嘅經濟制度重喺好落後，財富集中係少數人手上，但好多根本唔值得擁有咁多財富，好似媾左你條女個富二代咁，佢唔駛點做嘢，但d錢遠多過個d對地球真正有貢獻個d人。而最弊嘅係，大家都當呢樣咁唔公平嘅財富分配係理所當然咁，無人嘗試去更正。」

「個社會好似鼓勵人投機取巧行惡咁，殺人放火金腰帶，老老實實反而無運行，呢d事情係其他星球絕對唔允許。同埋其他星球絕對唔會好似地球人咁，不停破壞自己星球嘅環境，地球依家咁多極端天氣，但真正醒覺係因果報應嘅少之又少。」

妹妹仔係咁爆seed，我都完全插唔到嘴，但好奇怪佢發表大道理d字句語調，有種好抽離好旁觀者嘅感覺。唔通，佢都係外星人？

「無錯，我都係嚟自第二個星球」……