本來諗住對付班電話cold call, 點知攪到自己爭d無命: 18

我整日都回憶番我哋嘅相處點滴，一齊練功，煮飯仔，唱K煲劇，講講笑笑，當然重有尋晚嘅歡愉，佢個種溫柔體貼，真係好多地球女人都不及。可惜無咁嘅福份同佢做人世，佢係唔係地球人，已經唔重要。

我走入佢間房打開衣櫃，套粉紅戰衣同頭盔都重係度，重見掛咗唔少長裙，攪到我諗番佢斯斯文文著長裙個清純look。重有依家先發覺佢都幾有童心，床頭擺咗好多公仔。

可惜佢已經消失咗，無錯係消失，因為無親眼見到佢死，搵唔到條屍，只係記得最後見佢佢個身體有d異樣，出煙同有裂痕。咁或者佢唔係死咗呢？我唔知呢個諗法係一廂情願定係佢真係重生存緊，但至少有個希望。

佢俾我個隻錶突然間係咁響，個屏幕出咗句要我快d攞武器同離開紅磚屋，我突然間當佢係Siri，問佢我應該揀邊樣兵器好，佢真係出埋聲回應番我，唔知係我太掛住妹妹仔定係點，把聲勁似佢。

隻錶話攞劍會啱我發揮，卒之我揀番平時攞嚟練習個把劍。佢再三催我走，我話可唔可以係度行多個圈，同埋我想睇下現實世界最新情況。





唔睇猶自可，一睇真係把幾火，依家唔止香港，連東京，首爾，台北，好多係亞洲嘅城市都淪陷，個個都起勢咁揸住部電話聽，痴痴呆呆咁款。妹妹仔講得好啱，情況已經相當之危急，刻不容緩。

隻錶出咗張地圖俾我睇，加下我已經可以係虛擬世界，要飛簷走壁話都無咁易，前面座山見唔到頂，但我起勢咁跳跳爬爬，唔駛一個鐘就上到頂。

但我發覺我身處係連綿不斷山脈之中，前面d山，又係見唔到頂嘅。隻錶出咗另一張地圖，同埋提我要食三粒花生，我都差d唔記得。

個條路徑顯示前面行山腰，好彩唔駛再爬山，唔係都唔知頂唔頂得順。

同係真實高山一樣，寒風刺骨，氣溫估計低過零度，好多座山都鋪滿雪，不過我一d都唔覺得凍，但個心就有種好濃嘅孤獨感，一路行個時諗緊如果有妹妹仔同我同行，就一定唔會有呢種感覺。隻錶好似知我心情咁，係咁播d好輕鬆嘅音樂，聽吓聽吓個人好似無咁鬱悶。





呢度d山全部都直畢甩，一叉錯腳就真係係咁先。沿路孤零零一個人，心諗不如同隻錶玩下，我同佢講可唔可以扮妹妹仔講嘢，點知佢真係識，把聲重一模一樣。我打蛇隨棍上，同佢講好掛住佢，佢反應有d似我之前係AI程式個d虛擬女友咁，有d生硬咁回應我都好掛住你。

算啦，攞佢嚟頂住檔先，反正條路得自己一個太苦悶，又唔知要行幾耐。講下講下越講越露骨，雖然只不過係隻錶，但個腦海一路講一路諗住妹妹仔，攪到硬咗好耐。

當腦海重沉醉係FF同妹妹仔攪嘢嘅時候，隻錶突然間鬼殺咁BB響，話要準備戰鬥。我當堂嚇咗一跳，見到成堆人型物體，飛緊埋嚟……