本來諗住對付班電話cold call, 點知攪到自己爭d無命: 19

我都未驚完，把劍已經變成紫色，隻錶話俾我知個班人戰鬥值好低，叫我放心打就得。但話晒係第一次，點都有d驚既。

說時遲那時快，個班人行頭個個，已經攞住佢把劍劈埋嚟，佢著住件紅色戰袍，成面鬍鬚，我攞把劍一擋，感應到佢下一步想起飛腳，我就順勢一揮，佢隻右腳即刻斷開，d血好似噴泉咁噴晒上嚟，攪到成地都係血。

我自己都嚇咗一跳，我咁大個人連老鼠都未打死過一隻，依家一劍斬斷咗人哋隻腳，有種講唔出嘅內疚感。個鬍鬚佬係地下典咗幾下就斷咗氣，呢一刻見到四方八面有大量綠色嘅野射埋嚟，我感覺到我這錶將我扯上半空，然後衝向敵軍，隻手重不由自主咁揮舞，一輪巨響之後，個班敵人，全部瞓晒響地，郁都唔郁。

我覺得好似打緊機咁，但個陣血腥味同埋敵方d痛苦呻吟話俾我聽唔係打online，發夢都無諗過自己會去咗虛擬世界打仗殺人。不過虛擬世界真係好似打機，轉頭唔見晒d屍體。諗番起頭先，如果唔係隻錶幫手，我都唔知點樣控制把劍同人打，妹妹仔知我無經驗俾咗隻錶我，另外重有佢俾我嘅護身符，希望唔駛用到啦，我想永遠保存留念，唔想有乜嘢破損，整污槽都唔得。

打咗場勝仗，我問隻錶重有幾耐先去到基地救番班隊友，佢話有排，要過晒前面d山。重叮囑有大量敵軍殺緊過嚟，不過無講敵人戰鬥值，只係話我會打得贏咁話。佢咁老定我反而有d驚，打機都要打大佬先過到關啦，班巴兩星人係咪咁弱雞呀？





隻錶要我keep住練功，花生由每日食三粒加到四粒，依家日日都係行山路，我問隻錶我可唔可以用輕功加快腳程，但佢話咁樣會虛耗好多功力，但問題係依家對實體世界既情況一無所知，會唔會變到七國咁亂呢？隻錶話佢唔能夠收到實體世界嘅資訊。咁到我完成任務之後，係咪太遲呢？同埋日日都上山落山，唯一得隻錶陪伴，我好想返實體世界見番老豆老母同朋友，同埋pick up番公司d野，我唔知公司會唔會因為我突然消失而攪到大混亂。我困咗係度，耐到連我自己都唔知幾耐，無晒時間概念。

又唔知行咗幾耐，離遠望到d好似大雀咁嘅野飛緊過嚟，足足有成五隻但今次隻錶無任何警示，把劍又無增強能量，唔通係自己友？

行頭個隻好似大鷹咁嘅雀越飛越近，之後突然噴咗d綠色黏液出嚟，我冷不提防避唔切，最慘既係，我郁都郁唔到………