本來諗住對付班電話cold call, 點知攪到自己爭d無命: 21

佢話個碌炮係最弱雞嘅武器，講真我都唔知㗎，正常諗大炮緊係勁過把劍㗎。

「阿珍個傻妹實係無同你講啦，佢見到你連自己姓乜都唔記得囉，你真係要好好對佢啦！」

我諗佢係講緊妹妹仔，佢應該唔知道妹妹仔已經…….

佢話要我好好對佢，原來呢個星球都同地球一樣有愛情，同埋佢咁講，即係暗示阿珍真係好鍾意我。

「你重乜對眼濕晒呀？莫非佢真係俾咗你？唉個傻妹講極都唔聽，佢唔可以同地球人交配㗎！你有乜嘢咁吸引到佢呀！」





我已經喊到收唔到聲，唔識答佢問題。

「咁你要打勝仗救番佢d隊友啦，唔係佢死得唔眼閉。」

之後我好積極咁開始同佢對練，但原來佢level 高我好多，三兩下就被佢打低。不過同佢始終唔夾無乜兩句，操練完都係各自各休息。其實好想問佢戰鬥值咁高點解唔幫拖，不過我係個心度諗，佢照道理應該感應到，但都無答返我，我都唔勉強佢啦，費事唔高興。

不過呢一日，佢突然係咁講嘢，佢同我講佢係第五小隊唯一生還成員，其他小隊大部分成員已經陣亡。巴兩星人唔係咁簡單，場仗好難打，重話佢哋已經唔淨止玩電騙，重開始係地球攪風攪雨引發戰爭，等你哋d地球人自傷殘殺，到時可以唔駛點用力就可以統治地球。間屋部電視同紅磚屋個部一樣可以睇到實體世界情況，香港東京首爾等城市仍然俾電話騷擾，至於中東地方又同時間爆發激烈戰火，至於美國，唔知乜嘢事，同歐洲反晒面。我無係真實世界一排，竟然變到咁樣。

既然佢肯開口講咁多嘢，我就唔同佢客氣，我同佢講番個次係鳳凰號遇險，自己點解可以脫險。又問佢點解巴兩星人要係虛擬世界攪攪震，而唔係真實世界攪。重有我本來只係個平凡人，有乜嘢特殊原因會被選做戰士，重有妹妹仔講過佢有人類基因，點解同我攪完嘢會死。





我因為積埋太多疑問，一次過連珠爆發到佢都唔耐煩。

但係佢只係答，遲d我就會知。屌，呢句嘢聽撚咗好多次啦，要我走入虛擬世界打仗，但講d唔講d。咁係咪個真相唔俾得我知，當一知道就唔會再留係度呀！我特登慢慢諗，等佢感應到我諗法。

但好奇怪佢完全無動於衷，佢係真唔知定假唔知呢？

佢係咁望住我，唔知咩嘢事突然目露兇光，大喝一聲，一股好強勁嘅掌風橫掃過嚟……….