本來諗住對付班電話cold call, 點知攪到自己爭d無命: 22

同佢對練我都係輸多贏少，我level低過佢。佢會知我個腦點發招而掉番轉我唔會知佢點打，呢個係主要分到勝負嘅原因。但好奇怪佢個掌我避開咗，我見佢右路有空位，即刻好快咁踢落去，佢居然唔知我點出招食到應，之後佢個身即刻射咗d好似暗器嘅嘢，我因為無劍係手，只能夠避開。

佢同平時完全唔同晒，d眼神好陰濕。佢平時雖然串d但都算係正派，眼神唔會咁閃縮鬼祟，佢講過唔鍾意用暗器，而雜物房都係得大型兵器無細暗器，我懷疑呢個唔係佢，應該係扮美玲個樣之後趁機偷襲我嘅敵軍。

佢再發動攻勢，但好明顯功力有限，拳腳速度唔係我個皮，我直出連環拳，佢已經招架唔住。我想生擒佢迫佢招供，點知佢又大嗌一聲，之後個身體爆炸，d煙過晒後完全消失，又係得灘水。咁證明咗我推測係啱嘅。

但真正嘅美玲係邊度呢？個敵軍扮到個樣同佢一模一樣。我真係死蠢，依家先諗番起我戴住隻錶，重醒起好耐無同佢講嘢，一於問吓佢先。

但更白痴嘅係，隻錶無晒電我都唔知，點同佢講嘢都無反應，唔怪之得無厘聲氣啦，我掛住操練無理佢，咁依家點算好。我摷晒成間石屋都搵唔到類似叉電器嘅嘢。之後再發覺原來自己好唔細心，間屋一個插蘇都無，d電器原來唔係用電推動嘅，但用乜做能源就真係唔知啦，部電視洗衣機無任何電線，但一㩒掣會著到。





唯有睇下現實世界最新情況。痴撚線呀！俄羅斯射咗支核彈去烏克蘭，死咗好多人。冚家剷呢鑊隨時打第三次世界大戰。香港又點呢？仆街，新聞話好多人跳樓。我即刻將頻道較到屋企，但老豆老母唔見咗，佢哋通常出街唔去得遠，但搵晒成個屯門都唔見佢哋，只係見到d十字車唔停咁出動，好多人瞓晒係地。

死啦，我好驚佢哋出咗事，想即刻返番出去呀！我點先可以出番去呀？
依家得番我一個係呢個唔知咩嘅地方，出又出唔到去，又唔知幾時先打到去敵軍基地，同埋重會遇到幾多敵人，乜撚都唔知好撚迷惘。

之前妹妹仔講到班巴兩星人好易對付咁，好明顯唔係囉。我真係唔知點算，連隻錶都唔著，無咗唯一嘅朋友，開始萬念俱灰，就咁跑離石屋，漫無目的咁越跑越遠，跑跑吓見到條河，就跳咗落去游水，跟住游吓游吓入咗個山窿，入面黑麻麻，但我可能有d對生死置身度外，唔理照繼續游。


游咗唔知幾耐，見到有d光係前面，一於游埋過去睇下先。d水開始越嚟越淺，到最後都無乜水要企番起身行。去到盡頭，見到前面d景物似曾相識。





我即刻忍唔住尖叫，我係個出口望到摩星嶺青年旅舍……