本來諗住對付班電話cold call, 點知攪到自己爭d無命: 23

諗都諗唔到游完水可以返番嚟現實香港，我係摩星嶺個軍事遺跡個度。記得以前上過嚟，我見到呢舊所謂嘅軍事遺跡成隻飛碟咁，同係魔鬼山，城門水塘見個d好唔同，我重懷疑係唔係以前華富邨個隻傳聞中嘅飛碟，因為地理位置上都算近，隻UFO經過華富，就索性泊係摩星嶺。

我又咁啱係虛擬世界經呢舊嘢出番嚟，咁虛擬世界係未即係巴兩星或者丁寅星呢？

個度有條好斜嘅車路可以行上山頂，我即刻走上去，個度有個觀景位置，拿拿淋走去望下香港依家變成點先。我望到九龍個邊，好多黑煙。

部電話一早無晒電，無辦法睇新聞，隻錶都係。我突然間想試下係虛擬世界學咗d功夫，用唔用得番係實體世界，我攞其中一棵樹試，我一劈，即刻冧落嚟。我再學Iron Man。個手心一波，另一棵樹又冧埋。

我急衝落山，山下條域多利道車都無㗎，個度本來有個巴士站有㗎1號去跑馬地，但等極都無車，唯有行番出堅尼地城搭地鐵，行到近殮房，嘩痴線，成堆人衝緊過嚟，重攞晒刀殺氣騰騰咁。之後開始劈我，但我依家唔係普通人，三扒兩撥之後，全部瞓低晒。之後第二，第三梯隊唔撚驚，好快攪掂晒。





後排有四個神高神大嘅，其中中間個個大大聲同我講：

「咁都俾你返到嚟！」

我問佢係邊個，呢班咩野人。佢話我無理由唔知。

我大聲屌鳩佢哋攪到香港亂晒籠，佢唔出聲，重攞出把劍，其他三個都攞埋出嚟。

我無劍係身，同埋感應唔到佢哋個腦諗乜，唔知係真實世界無得用呢個功能，定係遇到高level戰士，但都無法，要頂硬上。





四把劍係咁掃過嚟，我見其中一個露出中路破綻，連消帶打再埋身一掌，順手掰開佢攞劍隻右手，搶埋把劍，之後橫擋開其餘三路攻勢之後，見佢哋功力唔高，反守為攻，但始終佢哋人多，佢哋識補位，暫時攞唔到乜嘢甜頭。之後見佢哋想擺陣，我立即猛攻頭先同我講嘢個條撚樣，佢被我迫到要跳開，就咁樣佢哋擺唔到陣。

俾我搶咗劍個個原來有枝槍，好彩我望到，佢想開槍個時，我大喝一聲一劍掃落佢手臂，啵一聲隻手臂斷開跌咗落地，d血噴出嚟，透明色嘅。我都殺到自己都癲癲地，再一野直斬落去，佢即刻分開兩截，d腥臭味同地球人無分別，都見到類似心肝腸嘅器官跌晒落地。

剩番個幾條撚樣見我咁癲想走，我唔放過佢哋，手起刀落，個個身首異處。

佢哋d屍骸好似係虛擬世界咁，轉頭消失晒，我冧咗佢哋之後，個心有d好難講得出嘅感覺，我連老鼠都未殺過一隻，依家有d似殺人狂，雖然頭先殺個d唔係地球人，但我居然無任何要手下留情嘅諗法，只係想殺殺殺。

我等個心平靜咗先再行起行，係卑路乍街見番d香港人，佢哋真係人唔似人，鬼唔似鬼咁，有個著西裝男人機械式咁接電話，個電話迫佢買M巾，佢居然落單買。佢收咗線之後我忍唔住走去問佢點解你係男人老狗被電話迫買M巾好有問題，點知佢答話買嚟送俾老婆。我同佢講呢d電話有大陰謀一定要反抗，但佢竟然屌番我話我破壞社會和諧。





睇嚟真係徹底被催眠咗。

咁，我下一步要點做好呢？……..