係同屋室友?定係同居密友?: (S4)06. 睇相

時值春天，又係潮濕大霧日子，大學宿舍大霧到真係伸手不見五指，所以苗學翹專登買左兩部抽濕機，係兩部，去應付呢d咁潮濕嘅天氣
 
「d衫會唔會唔乾架?」梁小祺有少少擔心
 
「我地仲有焗衫神器，而且我地個洗衣機有乾衣功能」
 
提起部洗衣機嘅乾衣功能，用好過冇黎形容佢係冇錯
 
濕濕漉漉嘅環境，學翹同小祺都唔想出街，所以，小祺就打開左部Macbook上下網順便清理下自己Macbook中嘅垃圾
 




學翹坐係小祺身邊，睇下佢部機嘅野，應該話係睇下小祺以前嘅相
 
「嘩…..妳讀UG果時咁宅嘅?」學翹指住相中嘅小祺係到笑
 
「咩呀!!!果時我又冇咩朋友，又冇用護膚品」
 
「都唔係件件衫都差唔多一樣呀?」
 
「你又好好咩!!?你睇你?你好似set好哂每日要著咩色衫咁囉」
 




「喂妳點知架?」
 
「而家做你女朋友同你同居，點會唔知者?星期一深藍色、星期二深綠色、星期三泥黃色、星期四墨綠色、星期五白色」
 
佢地兩個再睇下d相，學翹發現左小祺永遠都係扎條單馬尾，即使係而家，佢都係鍾意單馬尾，當然係屋企瞓覺果時，佢會拆左條馬尾啦。同樣地，苗學翹個髮型都係十年如一日
 
「咩呀，我個髮型方便打理丫嘛」
 
係衣著同髮型黎講，佢地兩個人都係襯到絕
 




「妳以前細個冇活動架?」學翹碌住小祺中學時代d相黎問
 
「我邊度會有呢，我中四開始，放學就幫小學生補習，星期六日就一早出去做兼職，到差唔多傍晚先返宿舍溫書」
 
苗學翹聽到梁小祺咁講，心中暗暗佩服呢個女朋友，俾著係自己，佢都未必捱到咁嘅生活
 
「咁你呢?你讀書果時有好多活動?你話過會過西灣河玩架喎」
 
「我?我咪通常過黎踢波囉，有時會黎釣魚」
 
「中學時代釣魚?成個老人家咁?」
 
苗學翹雙眼反白「冇人話過中學生唔可以釣魚架嘛」
 
「咁你讀u果時呢?」




 
「考完試咪夜晚去海邊釣囉，有時仲好好魚添」
 
梁小祺同苗學翹交換左電腦黎睇相
 
「喂!呢個你前女友呀?」
 
「呀….係….」
 
「商學院架喎」
 
「所以咪唔太夾囉」
 
苗學翹又睇下梁小祺嘅相
 




「咦?妳都會有男仔朋友架?」
 
「我讀男女校，好出奇咩?邊似得你地咁變態呀?」
 
「我邊度變態?」
 
梁小祺指一指張相「邊會有人係Miss響課室改簿果陣，成班男學生係佢隔離除人地條褲?」
 
「呢個係正常操作」
 
梁小祺愈睇愈興奮
 
「咩話?將阿SIR部電單車推落大坑渠?你地有鎖匙咩?」
 
「把鎖一撓就開架啦」




 
苗學翹抱住梁小祺「將來我地嘅小朋友，讀咩學校好呀?」
 
「邊個話嫁俾你同你生小朋友呀?」梁小祺笑住咁講
 
「咁妳唔嫁，我就搵過第二個囉」
 
「你試下!?」
 
佢地兩個嘻嘻哈哈咁打打鬧鬧，非常開心。佢地玩得開心之際，佢地掃到去小祺Macbook中其中一個file到
 
果一個，係小祺係兒童之家時期嘅相