係同屋室友?定係同居密友?: (S4)05. 放鬆一下

苗學翹坐係自己個位睇緊送黎嘅期刊， 百無了賴，因為最近嘅order少左好多，應該係話大家上晝盡量將所有order都完成哂，所以最近下晝變得比較清閒，大約三點半就可以坐係位到休息。相反，梁小祺果邊就比較繁忙，一黎即將舉行周年消防演習以及有海量嘅safety inspection，所以小祺每日都做到頭都出哂煙。
 
面對堆積如山嘅file，梁小祺好想搵人求救，不過佢回望四周，基本上每一位同事都係非常之忙
 
梁小祺嘆氣，點解佢地office咁多人，都可以咁忙?但係其實佢地總部忙嘅時候，通常都係呢一兩個月而已，相比苗學翹，佢已經非常舒服。因為到夏天嘅時候，苗學翹平均一日要換3-4件衫
 
今日晚上，佢地完成晚餐同家務後，各自打開電腦進行私人時間，唔同嘅係，梁小祺將未完嘅工作帶埋返屋企，一向認為唔應該帶野返屋企做嘅佢，估唔到今晚會將文件帶返屋企處理，變相係無償OT
 
已經對左呢堆文件成日，估唔到返到屋企仍然要對住佢地，梁小祺今日真係好攰，所以佢去左廚房，搵個蘋果食，休息一下，順便補充下能量
 




當佢切好蘋果拎出去時，發現學翹住左係佢部Magbook之前，飛快地接手處理緊小祺嘅工作
 
「你做咩幫我做野呀?」小祺講完就遞一塊蘋果去學翹咀邊
 
學翹咬左舊蘋果之後就冇答小祺，繼續幫佢處理文件，而且個樣仲非常認真
 
小祺見到學翹咁樣，就乖乖地坐係佢身邊望住佢。因為小祺知道，學翹做一件事果時唔理人的話，係代表佢正在全神貫注咁做野，唔想有人騷擾到佢
 
大約30分鐘之後，學翹Save低份文件
 




「搞掂」
 
小祺立即上前望一望，發現學翹只係幫佢加左少少野，佢份野就立即完成哂
 
「點解你可以咁快做到嘅?
 
「有時局外人比局內人睇野更清楚」學翹指一指文件上某個地方
 
「妳所有野都準備好哂，冇問題，但係妳需要一樣野link起哂佢地，果樣野放左係妳眼前好耐，基本上一開始就有，只不過妳太專注」
 




小祺果刻發現，真係好似學翹所講，只要退後少少睇，問題就好快解決，一d佢搞左好耐都搞唔掂嘅問題，原來做少少野，改動少少野，得出黎嘅效果會更加好
 
「唔….如果我可以做到你咁樣就好囉，我就唔洗成日咁辛苦」
 
「妳早d休息啦，呢兩個星期妳都冇咩點休息，晚晚12點先瞓」
 
「好啦」小祺好聽話，好快就去完洗手間返入房
 
學翹執好哂野後，返到入房，上到床上準備瞓時，小祺成個人撲上去
 
「做咩呀妳?」
 
「而家先10點….你唔想咩?我地都成兩個星期冇做過…..」
 
「休息下啦傻妹，妳搏左兩星期唔攰架咩?無謂要妳咁攰啦」




 
「真係唔要?」
 
「過幾日先啦，早d休息，搞掂哂公司d野先啦，妳睇妳個樣攰到，一陣郁郁下瞓著左咁點算呀?」
 
「好啦」
 
小祺心諗，自己揀左呢個男朋友可能係世界上最幸運嘅事