𣎴能愛上的星級女神: 表白（下）

我醒來的時候救護員剛把我抬上救護車，我正戴著氧氣罩，Candice剛從側門走上來，看見我醒了，又緊張又徬徨：「瑾瑜！你點啊？」
「心口仲有啲翳住… 冇乜野啦…」我問救護員：「我冇野啦，唔送醫院得唔得呀？」
「先生，你突然間心口痛暈低，除咗情緒激動之外，其實都有機會係心肌梗塞。我哋會建議你去醫院check吓，不過如果你覺得唔需要都冇問題。」他們說。
「唔洗啦，我ok…」我還有一點胸痛和頭暈，但已經比剛才好多了。
「瑾瑜，你真係唔去檢查？」她雙眼通紅，眼角還有淚痕，眼妝也花了。
「公院有排等啊，而且我真係ok喎，頭先太入戲姐。」我說。看著這個因為我哭得眼睛通紅、變成緊張大師的她，我再欺騙不了自己，我不要將她讓給Terris，此刻，我只是想拖住她手，告訴她除了Terris這個選擇，她還有我。

填好拒送聲明後，Candice 一直扶住我，仿佛怕我再暈倒。「Patrick話頭先個take演得好出色，王監製都激讚果巴系神來之筆，淨係尾果句佢哋剪接返就ok。而家拍咗若嵐啲戲先，我地聽日再補shot，佢哋叫你而家休息下先。」Candice冷靜下來，告訴我。「你架車喺邊？我車你返去休息下先…」
「你？有冇牌架？」我嚇了一跳。
「你頭先心口痛都唔怕係心肌梗塞，你會怕我手車？」她取笑我。




「喂朱小姐，我從來冇見過你揸車喎，你話我驚唔驚？」她還是禁不在笑了笑，認真地關心我：「你個心係咪真係冇事先？」
「冇啦！」我說。

她上車後望了我一眼，微笑地把眼眶忽來的淚拭去。我開車前鼓起勇氣對她說：「朱浩婷其實，除咗Terris，你仲有其他選擇。」
「邊個啊？萬若嵐？」她望向窗外，又偷偷擦著淚痕。
「我囉。」我開了車，她有一剎驚喜地望過來，但很快便苦笑：「唔好講笑啦…」

在回我家和回她家的分岔路上，我轉了向她家的方向。「喂！你想去我度啊？」她問我。我點點頭：「突擊檢查。」
「你查咩啊？」她有些不解，我有些呷醋地說：「睇吓有冇高浚希嘅痕跡啊！」
「你係我邊個啊向瑾瑜？我要比你check?」




正好停紅燈，「你係我女朋友。」我認真地說，望向她。她既驚喜又害羞、還似乎有點生氣：「我幾時做個你女朋友我都唔知架？你嗰晚又係咁講、而家又係咁講，我點知你係邊句真邊句假？」
「我認真架。」我繼續開車，認真地說：「不過係有d難超越我頭先場戲用嘅真感情……不如咁，Candice姐你應間同我對多次頭先場戲？」
「無賴！」她低聲吐嘈，但我看見她在偷笑。

剛踏入她家門口關上門，她忽然便來入戲：「你知唔知我每次見到你同萬若嵐一齊果陣，我心入面係幾咁呷醋……」不愧是Candice前輩，上一秒還在偷笑，下一秒就入了戲。
「係你冇比機會我解釋。法國菜果晚係因為若嵐飲醉酒，除咗要睇住佢之外，我對佢真係冇其他意思。」我認真、柔情地走近Candice。
「向瑾瑜，其實我－直都摸唔清你同我係咩關係。你同萬若嵐咁close，另一邊又走嚟撩我，你知唔知我…」她又再次流淚。
我立刻溫柔地為她拭走眼淚：「對唔住啊Candice，係我唔識避忌，我冇好好處理我地三個人嘅關係……而且，係我－直唔肯認自己中意咗你…因為我果陣真係冇諗過會中意咗你….」我主動牽起她的手，說：「係我拖泥帶水、個人又麻煩，明明讓唔起比高浚希，見到佢追你我又冇膽…」她－手把我拉近她，低聲溫柔地說：「得喇！收到啦。」
「我係冇乜優點架喇，又冇Terris咁大隻、咁有錢、咁成熟穩重同咁有風度。但係，我對你係認真。朱浩婷，我中意你。你可唔可以做我女朋友啊？」我十分認真地望着她。
「你話呢？」她含著笑，主動吻向我。