彩虹髮型屋: 3.19

這夜，我們說到文字和共鳴。

徹夜長談，艾莉似乎慢慢捨去煩惱，回覆平日的開朗。

她告訴我她對文字的熱愛。

「比起數理呢啲死咕咕嘅嘢，我都係鍾意文字呢啲活生生嘅嘢多啲。」

即使我是一個「理科人」，其實並不能反駁這句說話，或許我是想探知世界的本源，又或許數字比起人心更容易理解，更或許我只是因為分數而成為一個理科人。





「我鍾意文字，因為文字可以傳達訊息，而高級嘅文字可以加密訊息，就好似話頭髮係過客呢個比喻，剩係得你同我知。」

「所以文字有情感喺入邊，因為知道文字深層意思嘅人就會同對方產生共鳴，而呢種共鳴係⋯⋯赤裸、冇隱瞞嘅，然後就會變成情感上面嘅寄托。」

艾莉越講越忘我。

深奧，絕對比數字深奧，但我似乎已經了解艾莉對文字的愛，又或許是對我的愛。就是因為我們產生了共鳴，才會將情感寄托於對方。

我告訴了她在我心目中的彩虹。





「我喺心入邊，一直都當妳係我人生一片灰白入面嘅彩虹。不過你似乎覺得彩虹唔係好襯你。」

「我而家諗返起⋯⋯其實彩虹都有啲似我。」或許是害羞，艾莉別過臉：「⋯⋯似我咁靚吖嘛！」

我取笑她無端在自誇。

也許是把心中所想說了出來，之前的失落一掃而空。

這刻我才明白，彩虹的象徵不是共鳴，因為彩虹對於我們的意義其實很不同。





「不過講開又講，我覺得Chem 已經算係好啲㗎喇。」

「點解呢？」

「因為佢哋用一堆symbols象徵啲Chemical！」

我被逗笑了，我佩服她那種可以從深奧的理論返回至輕鬆的玩笑的能力。

「我一直都想寫一篇小說。」艾莉又話風一轉：「想試吓用自己嘅文字同唔同嘅人產生共鳴。」

「妳而家都可以試吓呀！」

「寫小說好嘥時間㗎，我邊有咁多時間？」她苦笑。

「咁等有時間先寫囉，我一定支持你㗎，因為你想，就係我嘅理想。」





「Woo！孺子可教，即刻識得玩弄文字啦喎。」

「小事啦。」

「不過我而家都係想去睇演唱會多啲！」

「唔得，呢個係我想嚟㗎！」

這夜，每夜，都與妳談天說地。

可能這才是我的理想。