情人節那天，我在衣櫃中找到我生命中的天使: 第三章：你就係天使？我有好多野問你呀！

   「係呀主人，我就係嚟幫你既天使啦。」
 
  「咪…咪住先，天使唔係嗰啲負責接死人既靈魂走架咩？我唔係死…死左下話？」
 
  「你有所不知啦主人，其實天使有分好多職業架，而剛才主人講嗰啲就係護送天使，專門負責護送靈魂。」
 
  「咁你係……」
 
  「我呢就係見習天使，就係天使裡面最下級既，當我地觀察到凡間既人有困難既時候我地就會幫忙，而每當我地解決困難之後就可以得到一定既天使點數，儲夠某個數之後就可以轉職成為唔同既天使。當然我地都可以成為高級啲既助人天使繼續去幫人解決問題啦，但係咁就要視乎主人你既人生點數夠唔夠高啦。」


 
  「人生點數？又咩嚟架？」
 
  「其實每個人係一出世嗰時喺天堂到都會有個戶口，每當人類做左好事之後就會增加戶口到既人生點數，做壞事就會到扣，如此類推。而嗰啲點數就係用嚟決定你可以有咩等級既天使會嚟幫忙。」
 
  係呢個moment 我真係想喊出嚟，我啲人生點數一定少到冇朋友，平時做開毒男邊有勇氣去幫人呀，唔好話咩扶呀婆過馬路啦，如果賣旗嗰個女仔可愛少少我都唔敢買呀。
 
  雖然我頭先一口氣問左咁多問題，但係我依然有好多野好想問佢，無計啦，始終咁大個仔都係第一次見到天使，梗係會好奇啲想知多少少。不過呢……我諗我就算有再多既問題都要停一停先，事關喺個外表咁正而且仲要係光脫脫既女仔面前，我下面已經充曬血，硬曬呔啦，再望多佢一陣我怕自己真係會Hold唔住做左啲成人台先出得街既野呀！都係快快手拎啲衫比佢著住先啦。不過邊到有衫呢？唉，都係拎呀媽嗰啲出嚟頂住先啦！
 
  正當我準備行入呀媽間房嗰時羨婷佢打開左啱啱速遞拎嚟嗰個包裹，原來入面就係一set女仔衫，之後佢就係我面前一件一件咁由底褲開始著起。見到咁既情況，我梗係驚到立既轉過身唔好去望啦。等左差唔多十分鐘我諗佢都應該換好，所以我心思思咁轉過身望一望，點知我一轉過身就比呢個靚到爆既天使嚇到唔識郁：黑色既長筒襪加上一條樸實既紫色短裙，上身就係一件恤衫加一件小外套，不過最正既都係莫過於將長長既黑直髮紮成一條長馬尾，直情係賣飛佛呀！


 
  喺我嚇到呆左既時候羨婷佢突然哄個頭埋嚟，笑笑口咁望住我，之後一下Kiss左落我塊面到，我感覺到成塊面當堂又紅又熱。
 
  「嘻，主人你真係一個好人嚟呀，你知唔知呀，我有好多朋友試過喺佢地啱啱嚟到凡間一件衫都冇著嗰時比佢地既主人亂摸或者係咩咩架，不過頭先見到主人係咁正直既人我都安心啲……」
 
  我係正直？我下面真係唔方唔正直，直到你唔信添！你估我唔想亂摸或者係咩咩，只係我唔夠敢膽之嘛……
 
  「不…不過話時話，點解天使啱啱嚟到凡間係一件衫都冇著既？仲有點解一開始見到你嗰時你會係衣櫃入面架？你唔係諗住係我衣櫃到拎衫著下話？」
 
  「其實由天堂到轉移過嚟係要消耗好多天使點數，大約係每一公斤就要二百點天使點數左右啦，我地見習天使既點數一向唔多，為左減輕負擔，我地都會祼體咁進行轉移，而衫就係透過轉運天使送過嚟，咁樣會平啲呀嘛。至於衣櫃呢，我地天使轉移嗰時為左唔好比人發現所以會選擇一啲密閉既地方，但係點知主人你間屋既洗手間同廚房度門都開左，最後得番個衣櫃可以做傳送地點。」


 
  原來係咁……問左咁耐，基本上我個人終於平靜返落嚟，但只不過真係估唔到真正既天使原來同我地平時知既係有咁大出入。正當我為解決左腦入面咁多問題而鬆左一口氣既時候，我望一望個鐘，PK 了完來已經七點十五分！我居然可以成個約會都唔記得左！點算呀，點算呀？呀……有一個好方法！
 
  「羨婷！你……可唔可以幫我做一樣野呀？」