情人節那天，我在衣櫃中找到我生命中的天使: 第四章：天使你可唔可以做我女朋友呀？

 
  「既然我做得你既天使，幫到主人既我一定會幫，之不過主人你想我幫你做乜呀？」
 
  「你唔係話你係天使架咩，咁你一定識用魔法既，求下你幫我取消左今次既聚會得唔得呀？我啲朋友個個都有女朋友，得我冇，如果我就咁去一定會比佢地笑死架。」
 
  「咁唔得架主人，咁樣做需要改動大量人類既記憶，單憑一個見習天使既天使點數並唔足夠，我諗只有高級既助人天使先會有能力咁做。我既天使點數只可以做到好少野，對唔住呀主人……嗚嗚……」
 
  望見一個咁可愛既天使，試問又點會怪得落呀……要怪就怪自己點解之前唔做多啲好事，咁我咪可以叫個勁啲既天使幫手囉。唉，不過算啦，宜家諗嚟都無謂，都係安慰下羨婷等佢唔好咁自責先啦。
 
  不過到底點安慰好呀？佢再咁喊落去都唔係辦法喎。


 
  情急之下，我一手攬住羨婷，另外一隻手就輕輕放左喺頭上面。
 
  其實我都唔知點解自己會咁做，之不過自己個身體好自然就咁郁，我諗可能係細個嗰陣睇啲愛情劇入面既男主角都係咁安慰個女主角掛…… 咪住！愛情劇入面既男女主角？！
 
  「羨婷，係唔係只要你做到既就會做架？」
 
  「嗯……」
 
  「咁不如你做我女朋友啦！」


 
  羨婷佢聽到之後呆左幾秒，又再次面都紅曬，但係今次紅既程度同之前完全都冇得比，紅到幾乎好似飲醉左咁。但係點解佢啲反應咁怪既？好似電視啲女主角無啦啦比人示愛之後唔知點好咁。比人示…愛…咁……
 
  「唔係呀，唔係你咁諗架！我頭先只係口快快講錯，其實我係想問你可唔可以同我做？」
 
  唔洗問呀桂，羨婷聽完之後個樣比之前仲驚訝；當然我都好驚訝，原來我既語癌已經去到咁既地步，呢鋪我既形象實嚴重插水啦。不過事到如今，唯有再講多次，希望今次講得啱啦。
 
  「羨婷！你可唔可以扮住我女朋友先呀！」
 
  好彩今次終於講到啦，但係好明顯經過先前嗰兩句咁出位既對白，呢一句既震撼程度完全係冇得比，之但係羨婷塊面同之前一樣都係好紅，唯一同之前既分別就係今次佢聽完之後表現得好開心。


 
  「嗯…好呀…」
 
  佢輕輕點左個頭之後露出一個好甜既笑容，呢下真係溶左我咁滯。人地有女朋友好叻咩？我有天使做女朋友，很想要吧。
 
  好彩終於有人扮我女朋友，咁樣我就唔洗怕比人笑啦。
 
  「不過主人，點…點解無啦啦要我扮你女朋友既？」
 
  「係咁既……」
 
  正當我諗住解釋成件事係點既時候我望一望個鐘，誒？！原來已經七點半啦，咁唯有一路行一路講啦，仲要盡快同羨婷度定一陣要用既稿，如果唔係一陣講唔夠兩句就穿崩，到時一定比佢地笑得勁過我單人匹馬上陣。
 
  話說我就住係西灣河，過去銅鑼灣都只不過係半個鐘之內既事，雖然我盡左全力去解釋比佢知成件事係點同埋度左啲背景資料，之但係我見佢只係一路聽一路點頭，一句野都冇講，都唔知佢係唔係真明定假明，不過事到如今，希望佢記到就記，記唔到就執生啦。
 


  我地係記利佐治街個地鐵出口上嚟，一向右轉就睇見我班朋友同埋佢地啲女朋友係SUGO 門口到有講有笑。老老實實，望到個咁樣既畫面我真係好想走，下意識令我行後左一步。點知羨婷見我咁樣就一下將我隻右手蹺係佢心口到，然後扯我過去，好似想話我知唔好怯，怯我就輸成世。
 
  「喂阿傑你到左啦，我仲以為係會走佬添呀。」
 
  家豪大大聲講完之後望一望羨婷，再望一望我。
 
  「喂阿傑你唔好求其揾個女仔喺到扮曬係你女朋友喎……」
 
  今次摔跤了！唔通咁快就比佢發現左？？？