情人節那天，我在衣櫃中找到我生命中的天使: 第十三章：女神同我約會？講真架？

 
    女…女神話中意我？！我喺咪發緊夢呀？定係唔知邊到玩緊啲咩<愚樂艾粒You>呀？我只係一個好普通既人嚟架喳，唔係咁大整蠱下話？！
 
  「你…你講真架？」
 
  「嗯……」
 
  睇阿怡個樣又真係唔似講緊大話喎……咁即係話……原來阿怡佢一樣都中意我？！
 
  「咁阿傑…你又點呀？」


 
  「咩…咩點呀？」
 
  「仲問咩點，我當然係想問…你…可…可唔可以做我男朋友啦？蠢材！」
 
  今次真係不得了啦，原來今日係情人節不特止仲要撞正女神同我表白，喺個咁好既氣氛之下，我梗係立即答佢可以啦。呢啲野對我嚟講簡直係「不可一，不可再」…唔係，係「只有一，沒有再」至真。不過最估唔到既係佢會主動到揀個咁既日子同我表白，正常呢啲野都係男仔做主動架嘛。不過呢，我諗佢大既都估到我呢個毒男唔會敢做主動嗰個所以先咁做掛。
 
  「好…好呀。」
 
  就係咁，喺呢個情人節晚上，我好幸運咁同我女神喺埋左一齊。


 
  而喺飲完野之後，我地就喺旺角到行下街咁。其實我平時嚟旺角都只不過係去睇下模型，又或者係睇下啲新出既精品Figure之類，永遠都唔會嚟睇衫。皆因我每次走入啲服裝店既時候我個人都會無名火起，連我自己都唔知點解。之不過今晚唔知點解我同阿怡一齊行既時候居然一啲事都冇，唔通呢啲就係愛情既魔力？定係我顧住望阿怡搞到連我入左服裝店都唔知呀？嘩，愛情令人盲目，真係唔到你唔服。
 
  最後我地喺間G20000 到買左一條紫色既短裙，驟眼睇襯落阿怡既身上可以話係正到冇得彈。但係當佢喺試身室到換完行返出嚟既時候，我個腦入面居然諗返起羨婷個樣。咪住先！點解我仲要諗返起佢呀？佢既任務都做完啦，佢已經同我一啲關係都冇，而且我宜家仲要喺同我夢寐以求既女神喺埋一齊喎，我諗嚟做咩呀？
 
  睇嚟我再同阿怡佢一齊行服裝店都只會令我繼續喺到亂諗野，都係立即轉個地方比較好。
 
  「阿怡呀，不如我地買完呢條裙之後去睇電影囉。話說最近好似有套電影幾好睇架。」
 
  「都好，嘻嘻。」


 
  去到戲院之後，我求其揀左套《羅馬浴缸》睇。《羅馬浴缸》，睇個名就知套電影大約係講有個羅馬浴場技師唔小心去左第二個國家然後學習人地既浴缸文化掛。我諗呢套野既劇情點都唔會令我亂諗野既。
 
  但係到左睇既時候，唉，今次真係中曬伏，呢套《羅馬浴缸》原來喺講一個天使由天堂轉移左去羅馬既一個浴缸到幫人解決困難。唔係呀化，咁咪完全同羨婷既出現原因完全一樣囉？！有冇咁啱得咁橋呀？早知我就睇下啲內容簡介先買飛啦，今時今日啲電影名真係一啲都唔可靠。
 
  不過事到如今我想走都冇辦法，唔通叫我睇睇下電影突然走左去咩？萬一阿怡問起既話我點解釋呀？聽住啦阿傑，宜家喺你身邊既女朋友係阿怡而唔再係羨婷，而且以後都只會係阿怡，唔好再浪費時間諗羨婷啦，再諗之前發生過既野都係無謂既。
 
  其實咁催眠自己都幾有效，冇幾耐我都冇再諗羨婷啲野。之但係點知套戲完左既時候，阿怡好開心咁鍚左我一啖。
 
  「我真係好中意你呀，阿傑。」
 
 我相信如果係平時既話我一定會開心到飛起，但係正正就係頭先呢一個吻，令我努力埋藏喺心入面有關羨婷既記憶全部湧返曬出嚟。雖然呢個時候我眼係望住阿怡，之不過我個腦入面居然不斷諗返起羨婷頭先鍚完我之後喊住走嗰個情景。喺呢刻，我明白到其實自己心裡面真正中意既係羨婷，而唔係阿怡。
 
  「對唔住呀阿怡，雖然我係好中意你，之不過原來我心入面其實有一個比你更重要既人，我知道如果我唔去揾佢既話就以後到見唔到佢，到時我一定會好後悔。雖然我咁做喺有啲對你唔住，令你喺情人節呢個日子留底一個陰影，但係我真係一定要走。」
 


  我咁講完之後就立即離開左戲院，截左個架的士飛的返去尖沙咀既海邊。啱先至表白成功既阿怡話咁快就比我飛左，當堂喺戲院入面喊左出嚟。雖然咁樣整喊左阿怡我係有啲後悔，但係我好明白如果我繼續留喺到而唔去揾羨婷既話一定會比整喊阿怡更後悔。