情人節那天，我在衣櫃中找到我生命中的天使: 第十二章：女神同我表白？

 
  其實我由中五開始已經中意左個阿怡，佢個樣唔係話好靚嗰type，之不過勝在為人夠曬開朗，每次見到我自己一個人既時候都會揾我傾計，而不知不覺間我已經對佢入曬迷，我有時甚至會刻意令自己得番一個人，引佢過嚟揾我傾計。但係升左上大學之後，佢就入左個好active 既society，而我就一日到黑自己一個人入圖書館J本教科書。日子一日一日咁過去，慢慢我就發現自己其實同佢係兩個世界入面既人。雖然係咁，但係我心底裡面其實仲係好中意佢，周不時都會諗下會唔會有機會喺唔知咩場合見到佢呢。
 
  但係我真係一啲都估到，阿怡居然會打比我，到底發生左啲咩事呢？
 
  「阿…阿傑，你宜家得唔得閒呀？得既可唔可以出一出嚟，我有啲野想同你講。」
 
  「咩事呀，好緊急架？聽日返到學校先講唔得咩？」
 
  「唔得架！我…我既意思係…一定要今日講先有意思，如果唔係就冇意義…架…啦。」


 
  「咁好啦。」
 
  「咁一陣喺旺角等啦。你…你記住一個人嚟喎！拜拜。」
 
  咁耐冇見，到底阿怡佢會有乜野想同我講呢？唉，諗嚟都無謂，反正佢咁急要同我講既都應該係啲好重要既野嚟，都係直接去揾佢問清楚算。
 
  「我洗唔洗追返羨婷呢？」其實我個腦頭先問左我自己呢個問題，但係我諗多兩諗，其實佢作為天使嚟講已經幫我解決左個難題啦，佢真係冇義務留喺到繼續陪我架喎。反正佢遲早都要返去天堂架啦，我追得幾遠呀？唔通要我追到上天堂咩？
 
  就係咁，我最後都係去左揾我女神，冇再去諗更多關於羨婷佢既事。


 
  真係估唔到我又會返翻過嚟旺角呢到，之不過我就唔係再去嗰間「樑之家」，而係去左一間非常普通既樓上Café，而喺我一去到間Café 嗰陣就發現左阿怡已經坐左喺到等緊我。
 
  「咦，阿傑你嚟左啦。」
 
  「係呢，咩事叫得我咁急呀？」
 
  「唔…唔好講呢啲住啦，你…你覺得…我今日打扮成點呀？」
 
  話說我到先一入到Café 入面都只係顧住揾阿怡，完全冇留意過佢著乜添。但係宜家細心一望，塊面紅卜卜咁，再加埋佢本身白雪雪既皮膚互相映襯之下令佢加左唔少分數。至於衣著配襯方面，阿怡佢唔再好似平時咁求其著住佢最中意既高達T-Shirt，而係著左一件純白色既恤衫，外面再加一件小小既外套，好明顯佢係悉心打扮過至嚟Cafe。不過最特別既都係佢罕有咁紮左一條長馬尾，明明人佢之前一直都話咁做好麻煩所以唔係特別時候都唔會咁做。


 
  佢咁樣既打扮，再加埋咁既衣著配答，簡直就係心目中最理想既女神造型呀。不過唔知點解呢，比我望到咁打扮既阿怡應該開心到覺得一生無憾至係架，但係點解個心入面好似仲有少少忐忑咁既？而且…好似有啲好熟悉既感覺。
 
  「你著得好…好可愛呀，可愛到唔知點形容好。我講真架，唔係講大話呀。」
 
  「你中意就好啦……」
 
  「其實你約我出嚟想同我講啲咩呀？」
 
  「其實呢……自從我地升左上大學之後就好耐冇一齊坐喺到傾計啦。」
 
  「所以你今日就特登約我出嚟傾計啦下話？」
 
  「唔止咁架，其實，我…我想講，自從我加入左嗰個Soc 之後我同你既交流就開始少左，而無幾耐開始我就發現當自己每次參加Soc 活動既時候都會覺得好空虛，而且由嗰時我開始明白到原來……原來我心底入面真係好希望時時刻刻都留喺你身邊。」
 


  「咁……即係話……」
 
  「即係話，我…我想趁今日情人節就同你講…我…我…我中意你。」