情人節那天，我在衣櫃中找到我生命中的天使: 第十九章：無止境的十月真係長到我頂唔順

 
  就喺我同阿敬喺到講野既時候，羨婷同埋小櫻佢地兩個不知不覺間唔知行咗去幾遠，就連佢地既身影都見唔到。事到如今冇辦法，唯有向摩天輪既方向跑過去，希望咁樣可以快啲見到佢地兩個啦。
 
  但係當我同阿敬跑到摩天輪附近既時候，我地居然見到羨婷同小櫻兩個人比班唔知乜野人圍住，而且仲好似喺到爭執緊。
 
  「我話你知呀，我地就唔好恰既，而家我心情一啲都唔靚，你地好快啲行開呀吓！」
 
  「唔好咁啦羨婷，不如我地行開啦，唔好再繼續挑釁佢地啦。」
 
  呢個時候我地剛剛好跑到佢地身邊。


 
  「發生咩事呀？」
 
  羨婷佢照樣係睬都唔睬下我，而小櫻佢就好灰咁望住我同阿敬。
 
  「你地不如一齊話下羨婷佢啦，佢係都要喺到同其他人嘈，唔肯走呀……」
 
  聽到之後，我本來好想問下羨婷到底點解佢唔走，但係見羨婷佢理都唔理下我，搞到我最後都冇問到，阿敬佢見我臉色唔係太好，所以決定開聲幫我問羨婷。
 
  「羨婷做乜事唔走呀？」


 
  「我係點都唔會走架，因為一開始係佢地唔啱，邊個叫佢地打尖啫……」
 
  我同阿敬即刻望住圍住羨婷同小櫻既人，冇幾耐之後有一個年紀比較大既女人伴住一個小朋友行咗出嚟。
 
  「打尖，我地邊有打尖呀，只係因為我個小朋友走失咗，我要追返佢先至行到嚟呢到啫。」
 
  聽到佢嗰啲唔係好純正既廣東話，我大約都估到圍住我地既都係一班大陸嚟既遊客。雖然我就唔係話歧視佢地，之不過我就覺得羨婷講既野比較可信。
 
  「咁你都見返你個小朋友啦，就咪應該行返開先。」


 
  「咁又唔得喎，原來我小朋友頭先幫我排咗隊搭摩天輪，咁樣我當然要陪佢搭啦。」
 
  有冇搞錯呀，咁無恥都有既，分明係打尖啦，仲要搵咁多借口……一諗到呢點，我就覺得自己既正義之心開始變得洋溢，就快可以發成夢想。
 
  「既然係佢排到隊既話咁個位就係佢架啦，同你又有咩關係呀？」
 
  聽到我咁講之後，呢個女人真係嬲到頭髮都就嚟升起，好似就快變超級殺亞人咁，老實講就連我都估唔到自己會講到啲咁既說話。
 
  冇幾耐之後人群之中有一個中年既男人睇落好嬲咁行出嚟。
 
  「你知唔知呀，我地嚟呢到消費都係可以帶動你地香港既經濟，你咁樣對我地都得既？！」
 
  又係呢啲借口，係唔係傻架？係就係可以帶動經濟，係帶動經濟下滑囉。
 


  「到底你係唔係帶動到呢到既經濟我唔理得咁多，只不過你打尖就係另一回事。」
 
  「你知唔知自己喺到講乜野呀！你都有問題既！」
 
  「我當然好清楚自己喺到講乜野啦，但係你又知唔知自己喺到做緊乜野呀？」
 
  講完之後，似乎愈嚟愈多人喺到圍觀，最後連個中年女人都開始講埋一份……
 
  「你知唔知我地喺到洗咗幾多錢呀……」
 
  阿敬聽到之後都忍唔住行埋過嚟講埋一份。
 
  「洗咗幾多錢又點呀？有冇打尖根本就係人格既問題，同你洗咗幾多錢簡直係一啲關都冇呀。」
 
  就係咁我地你一言我一語咁維持咗好一段時間，去到最後嗰中年男人同女人似乎已經嬲到無辦法忍受既地步。


 
  「可惡，句句都要頂住曬下話……」
 
  講完之後，個男人就向住我同羨婷呢邊揮拳，而個女人就一個手袋飛埋去阿敬同埋小櫻嗰到。
 
  阿敬見到咁既時候，好似李小龍上身咁轉身射個三分……應該係轉身一個飛踢，將個手袋踢走九丈遠，令到小櫻唔洗比個手袋打到；之不過我就唔似得佢啦，為咗唔好比個男人打中羨婷，我飛身一擋，結果比佢打到成個人訓咗喺地下。
 
  呢個時候羨婷好似睥咗一睥個男人。
 
  「可…可惡，見到你地咁樣搞到我都冇曬心情坐摩天輪，你地要坐就坐飽佢啦。」
 
  講完之後，個男人就埋個女人一齊死死氣咁走咗，而圍觀既人都慢慢咁散去，羨婷佢發起嬲上嚟似乎真係冇人可以頂得住。
 
  「主人你有冇事呀？」
 


  羨婷佢跪喺我旁邊，然後用手慢慢扶起我。
 
  「冇…冇事……呀，唔好講我啦，咁你有冇事呀？」
 
  羨婷佢搖一搖頭。
 
  「主人你真係好傻呀，點解要咁做喎。」
 
  羨婷佢講既時候有少少淚光。
 
  「咁我怕佢打到你呀嘛，呀，不過話時話，羨婷你終於都肯理我啦，」
 
  「你…你…你呢個時候仲喺到講埋啲咁既野做乜呀，我又點會唔理你呀？」
 
  「咁就好啦，其實呢……頭先喺地鐵到好對唔住呀……」


 
  羨婷佢再次搖一搖頭。
 
  「嗯……我而家一啲都冇嬲啦。」
 
  「咁就好啦，阿敬頭先同我講話唔理咩事都好總之同你道歉先喎，你而家唔嬲就好啦。」
 
  羨婷佢聽完之後呆咗一陣，之後又嘆咗一口氣。
 
  「唉……主人你果然一啲都冇變呀……」
 
  「變？你到底想講乜野呀？」
 
  「不過呢如果主人你有時唔好咁遲鈍就好啦。」
 
  「唔係掛……」
 
  「算啦，總之我而家唔嬲啦，嘻嘻……」
 
  羨婷佢面上邊再次出現好耐冇見既笑容，係我最中意既羨婷既可愛笑容。
 
  雖然羨婷佢只係由地鐵站行去摩天輪咁短既時間冇理到我，之不過對我嚟講簡直係漫長過N次無止境的十月。
 
  就喺我同羨婷既關係變返好無耐之後，阿敬同埋小櫻佢地就行咗過嚟……

------------------------------------------------------------------------------------------------
最近流感好勁呀, 大家記住要小心身體
我都開始有少少病啦, 要小心身體至得