情人節那天，我在衣櫃中找到我生命中的天使: 第二十章：講野之前一定要諗清楚，如果唔係就好容易講錯野

 
  「小櫻你地兩個有冇事呀？」
 
  小櫻同阿敬佢地行咗過嚟。
 
  「冇事呀，好彩有阿傑佢幫我頂住喳，嘻嘻。」
 
  羨婷對我露出好耐都冇見既微笑。阿敬見到之後都對住我笑，可能佢發現到羨婷佢終於都肯理返我掛……不過而家諗返起，其實我都唔洗幫羨婷佢擋住啦，返正佢又好打過我……
 
  「咁你地有冇事呀。」


 
  「我同阿敬都冇事……係啦，我地係唔係去玩摩天輪呀？」
 
  阿敬佢個樣突然之間變到好sad咁，到底因為咩事呢？唔通係因為小櫻冇讚你幫咗佢？唔係咁都唔開心下話……
 
  「玩呀玩呀，我一定要玩呀，我喺上面都冇得玩架！」
 
  呢個羨婷真係呀，唉，成個入咗玩具店既細路咁……咪住先，佢頭先講既上面係……
 
  「上面？呀……你係唔係指你屋企呀，一時之間都唔記得咗你係exchange嚟既添，不過話時話其實羨婷你係邊到嚟架？」


 
  羨婷佢一面尷尬咁望住我，然後向我做出一個求救既表情，不過我望完之後就好刻意咁望向第二到。唉，扺你既，邊個叫你自己咁多口，仲有呀，我頭先比小櫻佢蹺住嗰時明明向你求救，但係你唔幫我不特止仲要特登唔理我，我而家就係要做同樣既事等你體驗下我當時既感受。
 
  「上面呢就係…呀…呀……即係……哈…哈…哈哈哈……」
 
  「哎呀，羨婷你真係好衰架，只係一直喺到笑又唔同我講……」
 
  「咁呀…呀…呀……」
 
  呵呵，羨婷你今次仲唔屎，你唔答小櫻佢既話你又會覺得唔好意思，之不過你又唔可以同人講你係天堂嚟既，到底你今次點做好呢？今次真係連<學士學飛>都唔可以幫你明辨是非啦……


 
  見到羨婷佢呢個咁不知所措既表情我真係好興奮呀，唉，敝啦，我見到自己咁邪惡，真係愈嚟愈似卡通片入面啲大壞蛋……不過我又好享受做壞蛋既感覺喎，嘻嘻……
 
  「點解要諗咁耐既？係唔係你屋企既地方唔係好多人識架？唔怕啦，我對地方名好熟架喎……」
 
  「其實呢…嗰到即係……呀……」
 
  羨婷佢愈嚟愈唔知點好，驚到好似就嚟喊咁，對眼都開始唔敢正視住小櫻。唉，雖然做壞蛋係好過癮，之不過你又幾時見過壞蛋有成功既一日呢……我最後咪又係忍唔住幫咗羨婷佢……
 
  「算啦，佢係邊到嚟呢啲野第日先講都唔遲，不如我地去坐摩天輪先啦。」
 
  「咁好啦。」
 
  雖然小櫻嘴裡說「好啦」，之不過佢心底裡面應該係好想知個真相係點，但係我又點可以咁容易講比佢知先得呢，話曬呢個都算係得我先知既秘密嚟。
 


  時間太約嚟到十點九左右，我地終於排到可以坐摩天輪，不過坐位有限，每卡都只係可以坐兩個人，咁當然係我同羨婷一卡，阿敬就同小櫻一卡啦。
 
  「係咁先啦羨婷，我地一陣再見啦。」
                              
  「嗯……」
 
  睇住阿敬佢地入完之後就到我同羨婷佢入啦。
 
  可能我冇咩點坐過摩天輪啦，就算坐都只係坐過海馬公園嗰個摩天輪，而且對上一次坐我都唔記得係幾耐之前既事啦，坐摩天輪既感覺我都唔係話記得好清楚。老實講呢個新起既摩天輪的確令到我幾意外，個位又坐得舒服，個窗又夠大，望落個海景都加咗唔少分。
 
  「嘩，主人，呢個就係摩天輪呀，好大呀……」
 
  只係啱啱入咗去個車廂入面，羨婷就開心到喺到喴嘩鬼叫，之不過好快就坐返好。
 
  「乜天堂到真係冇摩天輪架？」


 
  「以前就有既……不過好多天使都話明明自己可以飛，唔明點解要曬時間坐摩天輪，結果後嚟就拆咗嚕……」
 
  「咁可惜呀，咁你一定要好好咁享受呢次啦。」
 
  「嗯…嗯……」
 
  羨婷佢雖然喺到笑，之不過感覺上佢既笑容變得有啲生硬。
 
   摩天輪既車廂慢慢升得愈嚟愈高，我地窗外既人慢慢變得愈嚟愈細粒，而海景既部分就變得愈嚟愈多，再加埋旁邊大廈既燈光映照之下……點…點解可以咁靚架，萬一我之後睇唔返點算呀！！！
 
  但係坐喺我對面既羨婷只係一直耷低頭，一句聲都冇出。
 
  羨婷佢唔係而家就已經爆咗seed掛？等我仲諗住同羨婷享受一下摩天輪，之後先要佢爆seed幫阿敬添，唉，可惜呀……
 


  就喺呢個時候，羨婷佢企咗起身，走咗過嚟我身邊既位，之後仲慢慢咁坐得愈嚟愈近我，不過佢依然係一句聲都冇出。
 
  死啦，我係咪又做錯咗啲乜野呀……