情人節那天，我在衣櫃中找到我生命中的天使: 第二十二章：靠自己唔靠人地

  「點解會咁架阿傑？」
 
  「我都唔記得咗添，好似話呢個摩天輪都只係會開到十一點喳。」
 
  「可惡，而家點算好呢？我本來仲計劃好要阿敬佢喺摩天輪上面表白架……」
 
  唔係話要喺倒數完嗰刻先表白咩？如果真係要喺摩天輪上面表白既話我地咪要坐多成個鐘？雖然話就話同羨婷你坐係好開心，但係點都開心唔到咁耐掛……
 
  「咁你有冇Plan B呀？」


 
  「我又邊有可能有呢啲野先得呀，唉，冇辦法啦，而家唯有……」
 
  「你唔係想用魔法令到部摩天輪繼續轉，轉到十二點下話？如果你係都要阿敬佢喺摩天輪到表白唔係話唔得，但係咁做應該要改變好多人既記憶架喎，你既天使點數夠唔夠架？我怕你……」
 
  「哼哼，又唔洗下下都改變其他人既記憶既……」
 
  講完之後羨婷佢又細細聲講咗一埋咒語出嚟，然後向住我做出一個好自豪既表情出嚟。
 
  「咁咪得囉。」


 
  「咁即係點呀？咩事都冇發生過喎。」
 
  突然間成個摩天輪既燈都熄曬，而且唔再開始轉動，個感覺就好似停咗電咁。
 
  「唔係掛，個摩天輪新開冇耐就停電，有冇搞錯呀，實係用咗啲唔知咩大陸既零件啦…………咪…咪住先，睇你咁既樣，唔通係羨婷你……」
 
  羨婷既臉上面依然係剛才嗰個好自豪既表情。
 
  「我只係求其令到其中一條電線短路啫，咁咪唔洗好多天使點數囉，我係咪好聰明呢？」


 
  呢一刻，我覺得同羨婷兩個人單獨留喺同一個車廂係好危險既事嚟，我真係估唔到佢為咗達成自己既目的可以去到幾盡。
 
  「都係唔好講咁多啦，我地睇下小櫻佢地點先啦。」
 
  「但係我地而家都見唔到佢地咩情況，點樣去幫佢地呀？」
 
  「放心啦，我比阿敬佢既耳機到有聲音接收既功能，只要我插住個耳筒既話就可以聽到佢地個車廂入面到底發生咩事，喂，你條友唔係成日都會帶住耳筒喺身既咩，快啲拎出嚟啦，慢手慢腳……」
 
  呢個羨婷真係好惡呀，仲要喺咁命令我，唉，我好想今晚快啲完呀。
 
  我喺衫袋到拎咗個耳筒出嚟插入羨婷部電話到，然後我地就一人一邊喺到聽下到底阿敬佢地嗰邊既情況係點。
 
  「發…發生咩事呀？點解啲燈全部熄曬既？我地會唔會有事架阿敬？」
 


  「我…我都唔知呀，可能係停電掛？」
 
  「唔會掛，我…我……」
 
  「你冇野呀嘛？我見你好似好驚咁既？」
 
  「我…我…我好怕黑架……嗚…嗚…………」
 
  「你唔好喊先啦，咁…咁……到底我應該點做好呀？」
 
  呢個時候，我同羨婷佢互相對望咗一陣。
 
  「羨婷，咁我地應該點幫佢呀？」
 
  「好簡單啫，呢個時候只…只…需……需要……」


 
  「需要咩呀？」
 
  「…………」
 
  羨婷佢連句說話都未講完就合埋咗對眼，挨咗落我個身到訓咗覺。我諗好可能係因為佢今日實在用得太多魔法，最尾搞到自己太攰先訓覺掛。我知道如果我呢個時候摸佢心口既話羨婷佢應該會立即醒返，之不過見到佢攰到講講下野都可以訓得著，我真係唔忍心叫佢起身，都係比佢訓返陣先。唉，真係點都估唔到呢個時候居然要靠我自己幫阿敬。
 
  『阿敬你點呀？』
 
  冇幾耐之後，手機到收到阿敬傳嚟既一個訊息。
 
  『唔好意思，我知道你地今日已經幫咗我好多，但係我想而家開始想靠自己去追到小櫻佢，我知道有啲事始終都係要靠自己，唔可以靠其他人幫手』
 
  收到呢個訊息之後，阿敬佢既在線時間就冇再更新過，雖然我之後嘗試問佢點解唔洗我地幫，可惜佢都冇再覆我，而我就唯有靜靜咁喺到聽下到底佢地車廂入面將會發生咩事。
 


  「小櫻你唔好喊啦。」
 
  「但…但係我真係好驚呀，我地會唔會落唔返去架……嗚…嗚……」
 
  「咁…呀……不如小櫻佢捉住我隻手先啦！」
 
  「捉住你隻手？捉…捉住咗啦……咁跟住呢？」
 
  「跟住呢……我…我都冇諗過喎，我只係好單純咁覺得你搵到啲野捉住既話會冇咁驚掛……呀，有啦，你不如望下窗外面。」
 
  「窗…窗外面？窗外面有乜野好望喎……」
 
  「你望咗先啦。」
 
  接住落嚟聽筒到聽到既只係一片安靜。


 
  「你睇下，我地呢到係就係黑曬，但係你唔覺得正正因為咁既意外，窗外面既夜景反而變得特別靚既咩？」
 
  「係…係呀……」
 
  「有個咁靚既景唔睇咪好浪費囉，如果你繼續喊既話，對眼就會比啲眼淚搞到濛曬睇唔到架啦。我地咁難得可以坐摩天輪，不如你唔好喊啦。」
 
  「嗯………」
 
  「而且我都走唔到既，就算個車廂轉唔返落去我都會一直陪住你啦。」
 
  「嗯……」
 
  「咁所…所以………」
 
  「所以？」
 
  「冇…冇野啦，我地都係睇風景啦。」
 
  「嗯，多謝你呀，都係有你我先冇咁驚喳。」
 
  「噢，唔…唔洗多謝……」
 
  「咦，點解你塊面好似好紅……算啦，可能係呢到太暗我睇錯掛。」
 
  「係…係囉……太暗你睇錯啫……」
 
  就係咁耳筒入面入再次回復返平靜，無幾耐之後，車廂入面既燈又再次著返，而摩天輪亦開始再次轉動。
 
  『由於摩天輪電路固障，為各位客人帶來不便，本公司深感抱歉，技術部門已經啟動後備電源系統………』
 
  呼，好彩個摩天輪有後備電源啫，如果唔係都唔知要坐幾耐。
 
  就係咁，我地全部人都平安無事，慢慢順住摩天輪既轉動落返嚟地面。
 
  之不過，距離倒數既時間亦愈嚟愈近……


---------------------------------------------------------------------------------------------------------------
第二十四章就會係最後一章，大家記住多多支持我啦