情人節那天，我在衣櫃中找到我生命中的天使: 第二十一章：在高處唔敢望世界流動

 
  死啦，我係咪又做錯咗啲乜野呀，羨婷佢一句聲都唔出就坐過嚟，我真係好驚呀……
 
  呢個時候羨婷佢伸隻手過嚟我到蹺住我隻手，個頭就慢慢挨落我個膊頭到。
 
  羨婷佢咩…咩…咩事呀？又會咁主動都有既？！唔通因為車廂入面得返我地兩個所以先係咁？可能因為最近上得太多ThisTV啦，我而家個腦入面已經充滿曬成人台先有既野啦……
 
  「主…主人……我…我…我要………」
 
  你要？唔住掛，雖然我地喺個車卡入面做啲咩係唔會有其他人會知啫，但係都唔洗咁主動下話？哎呀，我下面啲血又集中埋一齊啦……


 
  「你要乜…乜野呀……」
 
  「我…我…我要你……」
 
  羨婷講既時候語氣十分之柔弱，呼吸聲慢慢變得急促，塊面亦變得愈嚟愈紅，全身震緊既同時仲要將我隻手蹺得愈嚟愈緊，我完全感覺到自己既手臂正慢慢陷入羨婷佢既心口入面，嘩，真係哥哥不行了呀……
 
  「你要…要…要我做乜野呀？」
 
  「我要你…你…坐喺我旁邊就夠啦……」


 
  「噢………原…原來係咁呀……」
 
  可能係因為現實同我FF既內容實在太大出入掛，聽到呢句之後我既內心即刻平靜好多，不過而家諗返起又係既，以我平時認識既羨婷嚟講又邊可能會咁主動先得架？
 
  「我…咪…坐…咗喺你身邊囉……」
 
  羨婷佢聽到之後細細力點咗一下頭。
 
  「你…你唔好一直喺到耷低頭啦，不如望下出面啦，你睇出面既風景幾靚。」


 
  羨婷佢嘗試抬起頭望下出面既風景，但係好快又耷返低個頭。
 
  「羨婷你冇…冇事呀嘛？你係咪唔舒服呀？」
 
  「我唔係唔舒服呀，只係……」
 
  「只係點呀？」
 
  「我講…講出嚟都得，之不過主人你唔可以笑人架喎……」
 
  「我唔笑啦，你快啲講啦。」
 
  「其實呢……我…我…我畏高架……」
 


  「哈哈哈……」
 
  咩話？天使都會畏高？有冇再離譜呀？雖然我頭先應承咗羨婷我唔會笑佢，但係聽到啲咁過癮既野又真係好難忍住唔笑。
 
  就喺我笑緊既時候，羨婷塊面變得更加紅，嘟長個嘴，做出咗一個好嬲既表情。
 
  「喂呀，主人你又話唔笑我既，乜你咁衰架……」
 
  「我都唔想架，我又邊會諗到原來天使都會畏高先得架。」
 
  「咁主人你都唔洗笑到咁大聲架嘛，搞到人地咁唔好意思……」
 
  「對唔住囉，不過你畏高既話點喺天堂到生活呀？」
 
  「咁又冇所謂，因為我畏高都只係短時間既事，只係比少少時間我習慣下新既高度咁我就唔會再怕架啦，咁所以呢……」


 
  羨婷佢坐得更加埋我到，幾乎我地既身體已經緊緊貼埋一齊。
 
  「咁所以……主人你只要繼續比我咁樣一直坐喺你身邊就得架啦。」
 
  「當…當然可以啦。」
 
  發…發達啦！開頭仲以為羨婷佢一定會爆曬seed去幫阿敬架啦，估唔到佢會咁主動走過嚟陪我，呢種感覺真係好正呀。
 
  我地就咁坐埋一齊，兩個人一句聲都冇出，靜靜咁享受喺埋一齊既時光。
 
  不過話時話，唔知阿敬佢地嗰邊又點呢？雖然我而家好開心啫，但係講到尾我地坐摩天輪都係為咗要幫阿敬佢追到小櫻，萬一我同羨婷兩個只係顧住自己而冇理到佢，搞到阿敬追小櫻既計劃失敗咗既話咁咪好大件事？
 
  「其實呢……」
 


  「我知主人你想講咩，不過主人你唔好出聲住，我想好似而家咁，舒舒服服同主人你一齊睇多陣風景先。」
 
  「咁…好啦……」
 
  羨婷佢咁講既話應該已經計劃好所有野掛，都係一陣先再講啦。
 
  時間大約過咗五分鐘。
 
  「羨婷，我諗都係時候架啦，始終我地今晚出嚟既目的主要都係幫阿敬，如果你中意既話我遲啲再同你一齊坐摩天輪啦。」
 
  「嗯，我知道啦。」
 
  羨婷佢放開咗我隻手，然後由衫袋入面拎咗部電話出嚟。
 
  「有得同主人你一齊坐摩天輪真係好開心呀，嘻嘻。不過要幫阿敬既話我就要變做對愛情好敏銳嗰個人格先得架，主人你知道要點做架可？」


 
  「我當然知點做啦………………出嚟啦，另一個羨婷！」
 
  嘩，呢種感覺真係好正呀，好似卡通片入面叫比卡蕉出嚟咁。
 
  之不過羨婷聽完之後呆咗一呆，之後就用咗一種好無奈既眼光望住我。
 
  「主…主人你喺到……做咩呀？」
 
  「吓，唔係咁咩？」
 
  「哎呀，主人你唔好玩啦……」
 
  「得…得啦，你唔好嬲住先啦，我知道你要聽到啲愛情既野先得呀嘛，咁……羨婷，我地要幫阿敬佢向小櫻表白，好唔好？」
 
  講完之後，羨婷既眼神立即變得非常之銳利，銳利到簡直可以插死人，而呢一種眼神就足以証明而家既羨婷而經爆咗seed。
 
  「好！有我係到就一定冇問題！」
 
  就喺我地準備好諗住要幫阿敬佢手既時候，車廂入面響起咗一段廣播。
 
  『各位乘客注意，接下來將會係摩天輪全日最後一圈，本公司非常感激大家既乘搭；Your Attentions Please…………』
 
  唔係掛，得返一圈喳？！