情人節那天，我在衣櫃中找到我生命中的天使: 第二十四章(最終章) ： 表白，成唔成功呢？

 
  今次真係大件事啦，就喺倒數呢啲咁重要既時刻居然可以因為咬到條脷呢啲小事而表白失敗，有冇咁戲劇情呀，唉……
 
  但係就喺呢個時候舞台人既主持人再次開口。
 
  「多謝各位嘉賓既倒數儀式，Wow，好興奮呀，好地仲有一分鐘就到新一年啦。」
 
  咩話？原來頭先個倒數係指倒數仲有最後一分鐘？好地地要個咁既倒數有乜用呀？大會既人有冇腦架？唉，不過咁都好既，即係話阿敬佢仲有機會啦，阿敬你唔好再錯過今次呢個機會啦。
 
  「阿敬你有冇事呀？我睇你真係好痛苦喎……」


 
  「冇，冇事，不過呢樣唔係重點，其實我想講既係呢……」
 
  阿敬佢深呼吸，等自己調整好節奏之後就準備再次表白，不過今次就係真正既倒數，如果錯過咗就唔會再有第二次機會。冇幾耐之後，主持人亦開始讀出倒數既數字。
 
  『我地最後倒數，五！』
 
  「小櫻呀……」
 
  『四！』


 
  「其實我………」
 
  『三！』
 
  「一直都……」
 
  『二！』
 
  「好中意……」


 
  『一！』
 
  就喺阿敬佢連句說話都未講完既時候，小櫻鬆開阿敬對手，然後衝上前緊緊攬住阿敬，仲要係成個身緊緊貼住嗰隻攬。
 
  「阿敬我好中意你呀！」
 
  『Happy New Year，Yeah！！！新年快樂！！！』
 
  就喺呢一刻，我，羨婷同埋阿敬都呆咗咁望住小櫻，我地計劃咗成晚要阿敬佢可以向小櫻表白，但係點都估唔到最後會係由小櫻佢主動上前表白。
 
  「小…小櫻你…你…你………吓？你講咩話？！」
 
  「我咪話中意你囉，我好中意你呀，但點解你好似唔開心咁既，唔通你其實唔中意…………我…………」
 


  小櫻睇起嚟好似有啲失落。
 
  「唔係…只不過……我…我…我…………」
 
  「點解你中唔中意我都要諗咁耐架……」
 
  「唔係呀…我當然中意你啦，只係我本來都諗住趁而家同你表白，但係點知我都未講完你就講………咗……」
 
  「嘻嘻，冇辦法啦，我驚唔可以喺倒數呢一刻同你表白呀嘛，如果你又咬到條唎咁咪好可惜囉。你知唔知呀，聽講呢只要喺倒數完既呢一刻攬住自己心儀既人再同佢表白既話，咁呢一年既關係就會變得好甜蜜架啦。而且………」
 
  「而且…？」
 
  「而且我知道你今晚已經為我付出咗好多，你對我做既我係知架，我知你喺戲院到留意我中意咩劇情，我知你喺餐廳到盡量配合我既興趣同我傾計，我知你喺摩天輪到好努力咁安慰我，呢一切…呢一切我都係知道架……」
 
  阿敬塊面再次紅起嚟，而且怕羞到唔敢講野。


 
  「咁遲先比回應你，真係好對唔住。其實我好想第一時間同你講我好中意你架，只不過我好驚………」
 
  「點…點解你會驚呀？我點都唔會拒絕你架喎，有乜野好怕呀？」
 
  「咁係因為…因為我怕一切都係我自己會錯意，所以每次當我感覺到你對我都有意思既時候我就會變得好緊張，然後下意識好自然咁迴避你，之不過就算我點避都好，我個心入面都係不停咁諗住你，我算我迫自己去諗其他男仔都好，到最後都係只會諗住你。之不過，就喺頭先坐完摩天輪之後我就同自己講，就算事實只係我自己單戀緊你，我都要同你表白，唔好比自己有機會後悔。就係因為我諗得太多搞到而家先至向你表達心意……遲咗咁耐真係唔好意思…………」
 
  講完之後，佢地分返開冇再攬住，各自既臉上面都展示住好甜蜜既笑容。
 
  「不過其實我今晚夠膽出嚟同你表白，最緊要係多謝兩個人……」
 
  「你想講羨婷同阿傑呢，係唔係呢……」
 
  「你…你點知架？」
 


   「喺餐廳嗰時我見到你不時都望住部手機，而羨婷佢地就係咁用手機打字，我大約都估到佢地喺到教緊你啲唔知乜野啦係唔係呀？」
 
  呢個小櫻係咪痴線架，點解咁都知既？我知啦，你一定係開咗掛既……
 
  講完之後，小櫻擰轉頭望向我同羨婷匿埋既花槽喺到大叫。
 
  「喂，你地兩個可以出嚟啦！」
 
  唔係掛，原來你一早就發現我地匿埋咗喺到架啦，你唔早講……
 
  我同羨婷兩個好唔好意思咁走返去小櫻同阿敬佢地嗰到。
 
  「嘻嘻，乜小櫻你發現咗啦……」
 
  「羨婷你做到咁明顯，我又點可能唔知呀。」


 
  「哎呀，比你搞到我都唔好意思添。」
 
  「不過點都好，我都要多謝你地，如果冇你地我諗我同阿敬都唔可以喺埋一齊。」
 
  「我都真係除咗多謝之外都唔知講咩好啦，唯有搵日請你食飯啦阿傑，又去返嗰間餐廳好唔好？」
 
  「其…其實都唔使多謝既……」
 
  「唔洗咁謙喎，我係真心感激你地架。」
 
  講完之後，小櫻就蹺住阿敬隻手，然後兩個人就好甜蜜咁互相望住對方，然後喺到傻笑。
 
  「好啦，既然我同阿敬終於都喺埋一齊，就當然要單獨咁過我地新一年既第一日，我地走先啦，拜拜。」
 
  「拜…拜拜……」
 
  我同羨婷兩個望住小櫻同阿敬既背影好快就消失咗喺人群之中，而家就得返我同羨婷兩個人喺到。
 
  「估…估唔到佢地話咁快就走咗，而家得返我地兩個喎。」
 
  「阿敬就好啦…我都想有人同我表白呀…………」
 
  羨婷佢轉過頭嚟望一望我。
 
  「算啦冇野啦………」
 
  羨婷佢講既時候語氣好失落……咪住先，羨婷佢話想有人同佢表白……唔通……機會嚟啦，阿傑！
 
  「放心啦，你咁可愛，一定大把人追你既，信我啦。」
 
  我的媽，我知唔知自己喺到講緊乜野呀！
 
  「主人你…你……你正一大蠢材！」
 
  羨婷佢講完之後就跑走咗，佢走既時候我隱約見到佢眼角到好似有啲眼淚。
 
  「唔係呀……我………」
 
  阿傑你有冇再低B啲呀！仲解釋？追啦！
 
  之不過唔知係唔係我平時做得太少運動既關係，我跑極都追唔到羨婷佢，如果我加速，羨婷佢都會加速，而且仲要比我跑得更加快。
 
  「羨婷，唔好走啦！…………哎呀……」
 
  我花咗我全身既叫羨婷佢唔好走，結果叫完之後就好似全身冇曬力咁仆咗落地下到。
 
  雖然仆親係好痛，之不過估唔到咁樣做居然可以成功令羨婷佢冇再跑。
 
  見到羨婷佢企咗喺到，我就當然要把握呢個機會企返起身追上去啦。
 
  「羨婷你做咩要走呀？」
 
  羨婷用佢帶住淚水既眼睛睥住我。
 
  「走？我咪走去搵人同我表白囉。」
 
  「就算係都唔洗而家跑去搵人同你表白架。」
 
  「唔去搵其他人仲可以點呀？」
 
  「咁你仲有……」
 
  哎呀，點解好地地講到呢一刻就突然講唔出口架？表白啦！
 
  「我仲可以有咩呀？我又唔係主人你既女朋友。」
 
  「咁只係……」
 
  比羨婷佢咁樣講一講，我都唔知點樣反應至好。
 
  咁佢又冇講錯既，因為我都未正式同羨婷佢表白。
 
  「其實一直以嚟我都唔係好知我同主人你到底係乜野關係，你話係咪天使同主人咁簡單？我又覺得唔止，但係咪情侶關係呢？主人你又冇承認過喎。直至尋日阿敬喺餐廳入面話我係你女朋友嗰時我見你都冇講啲咩，好似係默認既時候，你知唔知我嗰刻其實真係好開心，之但係點知頭先喺戲院入面你就咁正式話我唔係你女朋友，到底我而家同主人你係咩關係呀，我好亂呀……嗚…嗚…………」
 
  唔係掛，原來羨婷佢一直以嚟都係咁諗架？咁即係……
 
  「原來你係咁諗……架……………」
 
  「不過既然主人你頭先都講得咁白，我都知一切都係我諗得太多啦，我而家就去搵返第二個男仔！」
 
  「我當時唔係咁諗架！」
 
  「唔係咁諗又可以點諗呀？唔係就唔係架啦！」
 
  「咁只不過係因為……」
 
  「咁咪即係因為主人其實由始至終都只係將我當做一個好普通好普通既人嚟看待囉係唔係呀？」
 
  聽到呢到我真係火到嚟埋，你又要我解釋但係又唔比解釋，咁即係點呀？你玩曬啦！你唔好以為自己唔開心就可以亂講野唔理其他人既感受喎！
 
  呢個時候我心入面既怒火再次燃燒起嚟，好想搵啲野塞住羨婷把口，等佢唔洗喺到嘈住曬，之不過我又唔似得頭先喺餐廳咁身邊有食物塞住佢把口喎，結果…………
 
  「講夠啦！」
 
  講完呢句之後，我就諗都冇諗就將個頭伸前，用力Kiss落羨婷佢細細既嘴，用我既嘴唇緊緊貼住佢既嘴唇，等佢唔可以再出聲亂咁講野。
 
  我地既嘴唇緊緊咁貼埋一齊，大約錫咗十幾秒左右之後先至分返開。
 
  不過到底點解我呢個毒男突然之間會有咁既勇氣我都唔知，只不過我呢個咁衝動既決定似乎真係幾成功，羨婷佢冇再講野不得止，佢仲冇再喊，成個人冷靜返落嚟。
 
  「主…主人你……居然………」
 
  羨婷既臉開始有點泛紅起嚟，講野既時候個嘴係到震下震下咁，睇嚟係比我頭先既舉動嚇到。
 
  「你邊到都唔洗去，我而家就正式話你知你就係我女朋友，所以你唔好再嘈落去，你聽到未呀！」
 
  「但係之前喺戲院……」
 
  「之前喺戲院我之所否認係因為其實我根本未正式向你表白過所以我先咁講。不過你唔洗理，以後無論邊個問起都好，我都只會話你係我女朋友，聽唔聽到呀！」
 
  我一口氣講完之後，羨婷佢既臉上面出現咗一個我從都未見過既幸福表情，一個我咁耐之嚟都未見過既幸福表情。
 
  「主人我……我好中意你呀！」
 
  羨婷佢成個人攬住我，佢既頭就貼住咗我既心口。
 
  呢一次，好似係第一次唔係因為羨婷佢因為用完魔法太攰所以先攬住我，而係因為佢想攬住我而攬我。
 
  「主人……你其實……一早肯咁坦白咪好囉………」
 
  「吓？」
 
  羨婷佢抬起頭，單起隻眼不特止仲要向我伸埋脷。
 
  「就係主人你成日都咁唔坦白，先至迫到我要出呢招呀，你都唔知我等咗你講呢句說話等咗幾耐呀！」
 
  「原…原來頭先嗰啲都係扮架？」
 
  「嘻嘻，我係唔係好好戲呢？邊個叫主人你咁遲鈍喎，如果要等到主人你同我講真心話都唔知要等到幾時呀！」
 
  「咁…咁……咁…………」
 
  雖然我冇望到自己個樣，不過我感覺到自己塊面變得愈嚟愈熱，睇怕我塊面已經紅到成個蕃茄咁。
 
  「主人你而家講咗出嚟係咪輕鬆咗好多呢？」
 
  我輕輕推開羨婷。
 
  「我…我…我都廢鬼時理你呀。」
 
  講完之後我就頭也不回咁行開咗，之不過羨婷佢好快就追咗上嚟。
 
  「主人你都去邊呀？」
 
  「夜啦，要返屋企。」
 
  羨婷佢蹺住我隻手。
 
  「咁我就同你一齊返去啦，好唔好呀，男 – 朋 – 友？」
 
  「是………是但你啦！」
 
  「好野！我真係好幸福呀………呀…係啦……」
 
  講完之後羨婷佢合埋對眼嘟長個嘴，個頭慢慢哄嚟我面前，而且愈哄愈近。
 
  「做咩啫你。」
 
  「我想主人你錫多我幾啖呀，頭先錫錫咁舒服，主人你錫得嗰一啖邊到夠呀，嚟啦，唔………」
 
  「行開啦，都…都唔知你想點。」
 
  「主人你又咁怕羞啦，不過唔緊要，主人你唔錫我，就等我主動錫主人你啦！你唔好郁啦喎，我嚟啦，唔……」
 
  大佬，我只係個毒男嚟架喳，邊到會有勇氣大街大巷錫你呀！
 
  我鬆開咗羨婷蹺住我既手，然後出盡全力向前跑。
 
  「你追到我既話你想幾時錫咪幾時錫囉！」
 
  「主人你等比我錫都得啦，因為你點跑都唔會夠我快架啦！」
 
  「你追到先算啦，哈哈！」
 
  就係咁，我同羨婷喺倒數呢一晚既故事就告一段落，不過真係點都估唔到，開頭仲以為只係幫阿敬表白，點知最後自己可以正式同羨婷佢喺埋一齊。至於我同羨婷正式成為男女朋友之後會發生咩事？呢啲野就真係要將來先知啦。
 
  不過其實事情仲未完，因為到咗第二日﹐我一早起身睇電視……
 
  「第一則新聞，對於初次運行就出現停電事故，摩天輪公司就此喺報紙上發聲明向公眾道歉，公司調查後指係因為摩天輪其中一條電線短路，不過短路既原因就暫時未明。」
 
  我睇完之後吞咗一啖口水。
 
  呀……希望冇人會知個真相啦………
-----------------------------------------------------------------------------------------------------------------------------------------

多謝咁多位讀者一直以嚟既支持, 遲啲仲會有個後記, 講下我對呢個故或者每個角色既感覺, 希望大家都會支持我啦 :)
羨婷同阿傑既故事就要暫告一段落
不過之後會唔會再有外傳我就真係要諗一諗, 原因就喺後記到再同大家講啦

最後都要講多一講, 如果中意個故既話就share比朋友睇啦, 仲有記住要喺紙言到「追稿」呀
如果唔係我會冇咩動力寫文架 (笑)