不能愛上的星級女神2: 造新聞

「真係唔好意思啊，如果唔係因為我，你都唔會整親。」
「冇事喎，頭先醫生咪話純粹係三角軟骨損傷，休息幾個禮拜唔好操勞手腕就得，好少事啫！而且你都幫我俾咗醫藥費，當無數啦。」我輕描淡寫地微笑。
李思晴還是一臉抱歉，扶一扶鏡框低下頭：「如果影響到你拍戲，到時我真係補償唔到俾你…」
「你識咁諗證明你真係唔係有心，我話咗OK，你就唔好再咁婆媽啦！」
「嗯。」她點點頭。

剛下樓她便收到電話，聽完之後面色一變，匆匆忙忙跟我說：「老細話有單突發要我即刻過去，咁我唔送你返去啦，我走先。」送我？我真的被她逗笑。她疾風般跑走了，我便站到一邊回覆一下手機，順便搜尋一下附近的好餐廳與程心吃個午飯。

今天沒有什麼工作，主要和程心計劃一下youtube channel未來五條片的細節、找誰合作幫忙，以及動用一下我市場營銷的策略想想如何做宣傳。很快便聊到黃昏，我逛了逛超市本來打算補充些糧食，結果剛離開不久的程心一臉蒼白跑了進超市，驚惶失措並大聲喊我：「向瑾瑜！你快啲望下…」她用手機打開了剛發佈的全港最大網媒娛樂新聞，標題照片拍到我站在「不舉神醫」招牌的樓梯旁，標題是「激戰兩女縱欲過度，向瑾瑜疑似不舉求醫」，內文還有最近拍到我和若嵐、Candice分別單獨相處的照片。
「話我不舉？」我既激氣又覺得很無稽地望向自己下半身，又望向程心。程心已經笑得躬起了身，指著我，壓低聲音邊發出魔性的笑聲邊道：「你？…哈哈哈哈…不舉？…哈哈哈…」超市其他人也有偷偷望向我們，程心冷靜下來說：「你估，若嵐同Candice睇到會唔會好似我咁，笑到趴喺度？」




「好心你啦！雖然我都覺得好好笑，但係你身為我經理人，係咪應該諗吓點拆彈先呢？」我真的被她氣死了，只能苦笑。
「係喎，Sorry Sorry…」她忍著笑，與我結帳後便回到我家一起想對策。

「老老實實，會唔會係一直跟住你果個記者妹做嘅先？目的係報仇！」因為之前有幾次程心也在，所以她也知道李思晴的事。
「似喇似喇！如果唔係佢做咩咁好死今朝帶我去睇醫生？偏偏就係喺我一落樓之後佢公司有急事走先？我真係唔信有咁巧合。」我思量著今次居然給了她空位去造新聞，真的很不忿。
「咁即係冇得傾啦？我而家幫你問下May姐點拆先，講真，單嘢出咗街都收唔番，只能夠將佢嘅影響減到最低。如果佢單野影響到們Casting，應該可以搵若嵐之前介紹個律師告佢不實指控同誹謗！」她馬上傳送訊息，又寫下不同方案。
「阿程心小姐，你知唔知出律師信幾錢呀？人地若嵐就話大把錢，我邊有錢呀？我真係俾你激死！」我無力又激心地攤靠在沙發背上，一手拍向自己額頭歎了口氣。
「你方死你條女唔會比錢你出信咩？怕咩啫！」
「我就係唔想！佢嘅錢係佢嘅，我唔會食軟飯、亦都唔想同佢有太多錢銀瓜葛。啲記者想點寫咪當佢幫我免費宣傳囉，話唔定廣告商睇到會搵我代言「偉哥」呢？而且佢得果幾張相，一睇都知係借位炒作啦！」我嘗試保持正面思考。
「向大少我真係服咗你！應間佢哋傳傳下傳到你係對住女人先冇反應，到時你打唔到入大陸市場，冇咗幾多個零，你自己諗下！」程心這句相當現實亦甚有道理，我既然選擇了入行嘗試，部分也是因為在兩位女神帶挈下的入息太吸引。如果因為李思晴的報道令我收入受影響，我一定不會放過她。





我沒有開門見山地與李思晴說，但在籌謀可以如何令她不敢再亂造新聞，亦要思考如何報復這單莫名奇妙的「生豬肉」。