不能愛上的星級女神2: 試飲綠茶

「冇事吖嘛你？」Hilary關心我，我搖搖頭：「冇事。你覺得我係咪衰咗啲啊？」
「少少啦。咁要睇你其實點諗先。」她反問我。
「其實我唔係真係諗住趕盡殺絕，我只係想佢知道我唔好蝦。」我說。
「出嚟社會做嘢，保護自己多啲係重要嘅。」她扶起我，又溫柔地說：「我帶你去食間好好食嘅日本嘢，唔使咁在意唔了解你嘅人。」我略帶深意地望向這個比若嵐大兩年的女人，她的眼神是那麼深不可測，但樣子又是這麼平易近人。

「呢度兩樣野最出名，－係個每日限定鰻魚刺身、另一個係佢哋嘅綠茶。佢個綠茶係店長每三個月親自去買成里乃綠茶，只有成日幫襯嘅客人先可以試佢哋自創嘅抹茶甜品，而且係師傅根據每個唔同客人度身訂造。」
「厲害喎。」
「你試吓個茶先…」她沖了很濃給我。
「umm…我其實，平時唔算特別好綠茶。」我婉轉地說。
「你唔鍾意佢個味？」她好奇問。




「少少啦，不過…你講到咁我都可以試吓嘅。」
「試吓啦！呢款綠茶同其他綠茶好唔同，或者你試咗就會鍾意呢？」她笑起來有酒窩，眼睛也會笑，難怪這麼受圈內外及上流社會男人歡迎，桃花那麼旺盛。我呷了一口，它那種回甘和平時真的很不一，入口很順滑，亦少了些平時我不太喜歡的那個說不出的味道。
「真係…平時喺人哋口中同自己口中嘅綠茶，原來可以去到咁高層次。」說完這句，我下意識望向Hilary，她與我對望，我有種覺得這個綠茶就如她一樣的感覺。她仿佛看穿了我的心思一樣，忽然偷偷竊笑：「你唔係講緊我吖嘛？」我有點靦腆，笑笑說：「拿，你講架咋，我從來冇話過你係綠茶架。你自大呀你關小姐！」
「咁我喺人哋口中聽返嚟、同埋喺八卦雜誌入面睇返嚟嘅向瑾瑜先生，都同我今日認識嘅你好唔同。」她也笑笑說。
「講嚟聽吓？」我翹着二郎腿洗耳恭聽。
「我有聽過你專情嘅版本、聽過你劈腿嘅版本、聽個你靠女人上位嘅版本。」她烘近我，略帶溫柔直視我眼眸沒有閃躲：「但係我喺你眼入面見到嘅你，一啲都唔複雜。」

對於她的眼神，雖然略帶不適，但我並沒有左右閃避，反而想起Gary要我好好向她學習的事。「我曾經睇過一本心理學嘅書係講一啲有反社會人格嘅人，佢哋通常望住人嘅時候都會有一種不經意嘅掠食者眼神。」我再烘近一點她，好奇一問：「唔知呢個會唔會係你享受溝仔嘅其中一個原因呢，關語芯？」
「你呢句嘢有前設喎…」她退後了，把長髮搬到一邊，三七角度翹起二郎腿拓著腮笑笑望向我，又反問我：「咁你對個個女仔咁暖咁有風度，又係出於咩心態先？」
「乜你覺得我對頭先個女記者好暖好有風度咩？」




「我淨係feel到你在意佢。」她拿過我的杯，喝我的綠茶，唇印留了在杯上。我看著她，又看著那個唇印。在娛樂圈那麼久，才驚覺眼前這個女人才是最真實的人類，她願意向我顯露自己黑暗的一面，記得第一日詩姐問我知不知道若嵐的暗屬性，莫講她，我連Candice的也未知道，現在卻已經隱隱感覺到關語芯的暗屬性，亦狠狠被她拿捏到我potential的暗屬性。

我沒有喝到那杯茶，但我邀請她一起研究劇本，因為經過剛才的交流，我知道她一定可以幫我揣摩角色心理、激活暗屬性，演活辛浩揚由正漸變邪的角色心路。我亦已向Candice報備，Gary開口讓我向Hilary學習的事。

然而，她想也沒想就把我帶回她家中，她家在何文田，是近三千呎的複式單位，看下去只有她一人居住。相信單位市值過億，但我更相信這是她用自己「手段」得來的。