不能愛上的星級女神2: 一千次日落

我和貓仔在警署落完口供之後，已經差不多黃昏時分。
「點呀你？見你面色唔係幾好。冇事吖嘛？」我關心問。她強顏歡笑：「冇…諗起啲唔好嘅嘢啫。」我沒有追問，只是邀請她到一個附近迷你的海旁公園看夕陽。我們坐在長椅上，太陽在我們左邊十點左右方向緩緩落下。

「你信唔信呢個世界有報應？」她開口便這樣問我，我點點頭：「都信㗎！我覺得我嗰種信唔係話淨係信天道循環、因果報應，而係我由心而發唔想動搖要求自己善良嘅信念。」
「點解咁講？」她好奇問。
「因為我知道有時未必一定係善有善報、惡有惡報。但係我會希望個天真係有眼，啲壞人未死只係因為好戲在後頭。」我苦笑。忽然她眼泛淚光，低下頭無聲地痛哭。「做咩啊貓仔？冇事吖嘛？」我被她嚇到，立刻將紙巾遞給她。
「如果真係有報應嘅話，我真係唔知點樣面對……」她伏在我肩上，淚濕了我肩膊。
「冇事喎。有邊個後生嘅時候未錯過？最緊要知道錯咩、行動去改…」
「冇用架…所有嘢都返唔到轉頭，佢呢一世都唔會原諒我…」她哭很更激動。我不知應該如何安慰她，亦不敢擁她肩膊，怕會有太多身體接觸。
「你望下個日落？你知唔知，好多人話夕陽無限好，只是近黃昏。黃昏之後，就係漫長嘅黑夜。」我接著說：「黑夜係好凍、好漫長，但係總會過去，之後又係另一個晨曦。」她呆呆地望向我，沒有說出話來。




「我同你返去先啦，你喊到個妝都溶咗啦。」她輕輕印了印眼邊的淚痕，搖搖頭：「我唔想返去住。」
「咁我陪多你一陣。」
「唔使啦，你今日去完活動一定好攰，你要早啲返去休息啊瑾瑜。」明明心情不好，卻仍然對我那麼體貼，果然是粉絲團團長。
「你呢個狀態我更加唔會抌低你。」我有點擔心，又補充：「唔單止我要休息，你都應該要休息。你除咗要返工仲要做我嘅團長，我睇得出你好照顧啲團員。所以你更加要養足精神。你都係佢哋嘅支柱之一！」

她低下頭，重新與我眼神對上的一瞬，我看穿了她眼中的柔情，和有種對我不一樣的感覺。夕陽西下，在接近晚霞的景色和氣氛下，她越烘越近。我正在思考如何拒絕比較好，沒有戴眼鏡的李思晴忽然走到我們身邊，打破了貓仔的舉動，仿佛有點故意地說：「向瑾瑜！乜咁啱呀？」我暗地其實有點感謝她的破懷。
「係囉，乜你又咁啱跟蹤我呀？」我刻意帶刺地說。
「冇阻住你溝仔吖嘛章樂言？」李思晴這句似乎有點敵意，我希望只是我直覺不準。貓仔睨了她一眼：「我警告你如果頭先影咗相嘅話，即刻同我delete佢！好嘢又唔見你寫，專系寫埋晒啲衰嘢、造假新聞！」
「都影咗好多架！你男神都未出聲，你憑咩叫我delete 啊？」李思晴一臉得戚。
「咁你成日跟住向瑾瑜，你有咩企圖啊？」




「你估我係你呀？借啲意挨落人地個膊頭，仲想錫落…」
「喂你好啦喎！」貓仔面蛋紅紅地打岔，指著李思晴：「有口話人冇口話自己！你夠喺度搵藉口成日痴住瑾瑜。喔！仲特登唔戴眼鏡，著曬短袖熱褲，唔好話係你想勾引瑾瑜？」
「你好啦喎！…」

我見她們的爭吵成功引來一班途人駐足而觀，我忍不住有點無奈地開口：「你兩個係咪想成條街嘅人都知道啊？」她們左顧右盼，立刻害羞起來。
「其實你哋會唔會考慮吓對方呢？你哋都幾襯呀，成日打打罵罵。」我取笑她們。
「佢？」「佢？」她們同時指住對方，有點嫌棄地說：「我唔會中意佢架喎！」「我夠係啦！」我搖著頭笑了笑，邊站起來邊說：「你地自己諗下先啦！我返去啦！」
「諗咩呀？仲可以諗咩啊？」「你唔好望住我呀，我都唔知！你偶像啊，莫名其妙！」「瑾瑜等埋我…」「仲有我啊…」……

其實對於她倆，我實在是無計可施。既不能告訴她們我的真實身份，又不能告訴她們我已經有女朋友，實在很難做。