不能愛上的星級女神2: 清除障礙

我真的不敢揣測李思晴在想什麼。其他媒體都在報道我昨天制服色魔的事，但李思晴卻偏要將我和Hilary拿著劇本回Hilary家的相片，還有貓仔靠在我肩膊上哭的相片放出來，標題是「溝女王向瑾瑜一腳踏多船 夕陽下偷食粉絲」。天啊！一篇比一篇刺激，這個李思晴明明說會手下留情，怎麼昨天被貓仔激－激之後，文筆還比她上司的更鋒利？

我完成了王監制新劇的Casting，找到了還在我附近跟蹤我的李思晴，把她拉到我車上聊天。
「點呀？你搵我？」她今日也沒有帶她的招牌圓框眼鏡，穿了輕便連身裙亦換了個女裝手袋。
「你真係唔肯放過我架喎李小姐？」我差點被她氣死。
「我放過咗架啦！我冇放到你第二日朝頭早着住同一件衫喺Hilary屋企樓下出嚟果張相，亦都冇放貓仔同你差啲kiss果張…」
「你…」我指著她，抿緊唇，很生氣卻一句也罵不出。
「點呀？我話過就係唔會俾你溝到女！」她偷笑。
「你話你咁做咩居心呢？又話唔會恩將仇報。我真係信你一成、雙目失明！」
「幫你掃走塵埃，六根清淨～」




「咁唔該你掃走埋你自己。」
「唔好意思喎，我唔係塵埃～」
「我知，因為你係好大舊塵！」
「你去死啦你！」她用手袋打我這下真的很女人，她𣉢起一半眼睛，眉頭緊皺地盯住我，我被她逗笑：「我死咗你一定少咗好多樂趣～」

此時，Candice致電給我，我望了李思晴－眼，下了車小心地接聽：「喂Candice？」
「向瑾瑜你而家喺邊呀？」她的語氣似乎有點焦躁。
「呃…我頭先見完王監製，而家啱啱上車。做咩啊？」我剛說完，李思晴下了車，靠在我車身一臉奸狡地望向我。
「你同我過嚟。」她似乎要跟我來個審死官劇情，「我而家唔方便喎…」我有點害怕李思晴。
「你而家唔過嚟，你以後都唔使過嚟啦！」她生氣地切了線，我吞吞口水，唯有傳訊息找張星凡和Paco求救。





「女女啊？」她對我的奸笑實在令我不敢有多餘表情。「你放過我啦…」我捂住臉，語氣無奈又誠懇地對她說。
「你咁靚仔，我唔信你冇女朋友！」
「你放過我啦李小姐～」
「做咩啊？你唔係真係食粉絲咁cheap啊嘛？」她睥視著我，我澄清：「－定唔會！你唔好再亂寫喇李思晴，人地係女仔黎，－陣你寫到佢冇男仔追，你係咪賠返個男仔比佢？」她似乎有點不是味兒：「我自己都冇男朋友，邊度搵個賠比佢啊？」
「咁你就留返啲時間識男仔，唔好成日跟蹤我啦～」
「而家又可以工作又可以識男仔，我覺得好好喎～」
「你邊度有識男仔呀？」我好奇問。她走近我，烘近我：「咁你介紹自己比我識囉！」
「你跟咗我咁耐，仲未識我咩？」我取笑她，並重新回到車上，她也毫不客氣坐到我的副駕位置。





「咁你又冇同我真正傾過計。」
「小姐，你係娛記黎㗎喎。一張相都可以俾你寫到天花龍鳳，你啲文筆仲鋒利過你上司，係你面前我點敢亂講嘢啊？」我再次被這個小妹妹氣死。
「咁…我應承你，只要你話係秘密，我就唔寫！」她向我豎起尾指，有點可愛地向我傾前。
「咁兒戲嘅～」她強行拉起我手與我勾手指尾打印：「當你OK~」此時張星凡致電給我。
「喂Mark哥？」
「點呀瑜哥？個記者仔仲喺度啊？」他問我。
「係呀。」我回答。
「我哋去Happy hour，你照嚟，佢要跟就跟，請埋佢！」
「你講真？」
「我唔係女人啊，唔鍾意講反話㗎瑜哥～」他取笑我。
「得，你喺邊，我而家過嚟。」