一覺睡醒，發現阿爸變成女人: Ch.6

我抹乾眼淚，坐直身子，再次面對「阿媽」，她同樣紅着眼，與我對視着。 

我強忍淚水，深呼一口氣，吐出埋藏多時的心底話：「其實你係咪好嬲我，所以無等我就走咗？我唔係有心話你，我一直都好後悔好內疚，但我唔知可以點做，好怕你嬲咗我⋯⋯」 

我以為做錯可怕、道歉更難，但原來無法彌補，才是一輩子遺憾。 

所有道歉字句，猶如回音般，只得自己聽見，永無答覆。 就連對方是否討厭自己，你亦無從得知，都只能憑感覺空想，為自己施下內疚魔咒，甘願纏繞一輩子。 

「對唔住，我唔係一個乖仔。」說罷，眼淚又不爭氣掉下來。 





「阿媽」頓了頓，眼角劃出一滴淚。她沒作理會，卻以紙巾為我抹淚：「當初生你出嚟，唔係諗你乖定曳，只係想你健康開心。 無論你係咪乖仔，你永遠都係我哋嘅宗仔。」 

她逐說：「你當晚唔喺度，或者係件好事。 本身我哋傾緊計，但突然覺得好眼瞓，所以想訓一陣。可能出於直覺，你阿爸唔放心，一直望住儀器唔敢訓，點知心跳由80幾突然跌到50、50變30、最後直接變0。 佢反應已經好快，即刻彈起身、叫姑娘醫生過嚟。所有人推曬藥物儀器跑過嚟，打完強心計無反應、即刻做心外壓，依然無反應，打多幾支、繼續搓心，搓成二十幾分鐘，都係無用，完全無呼吸脈搏同心跳。 最後，佢唔想我繼續受苦，決定由我走。睇住自己最親最重視嘅人，上一秒有講有笑、有心跳有靈魂，下一秒毫無血色，成個人僵硬凍冰冰，陰陽相隔。呢個畫面，其實好恐怖、好難受。」

 即使當時不在現場，單憑阿媽親口描述，我已驚訝得毛骨悚然，但最令我震驚，為阿爸未有講述真相、亦不曾提起此事，僅淡然交代一句，阿媽於睡夢中逝去，過程安祥無痛苦。 

我無法想像，他當刻作出決定的心情。愛對方，當然盼望生存保命，但活過來以後，繼續受病魔折磨，病情一次比一次嚴重，到底是愛她還是害她？ 

「佢從來都無話過我知⋯⋯我嗰晚仲走咗去玩，訓到電話都聽唔到，但佢一句都無怪過我。」也許，我一直錯怪阿爸，他比我想像更愛阿媽，反觀自己，直到失去才懂得珍惜後悔，能夠做到的，就只有保留遺物而已。





 但我始終不理解、也無法接受他處置阿媽遺物做法。 

「點解要怪你？人死不能復生，講比你知，只會更加自責難過，佢唔講，係唔想你再承受打擊。」

 「就算佢唔講，我都會怪自己。」我緊握拳頭道，「阿媽」見狀，輕掃我膊肩苦笑：「其實要講對唔住嘅，應該係我，係我無做好父母責任，令大家咁痛苦。」 

「我知你都撐得好辛苦，係為咗我同阿爸先堅持。你走咗之後，阿爸反而笑多咗，更加唔比我提起你，收埋曬啲合照。」我示意阿媽望向周圍，無奈續說：「我諗唔洗我講，你都應該見到。我甚至懷疑過，阿爸係咪出軌。」

 她面色一沉，朝阿爸睡房方向走去，揮手示意我跟隨。





 「你應該無入過去？」 

「無，佢一直閂門。」 

「唔止閂，仲有鎖門。」她轉動門把道。 

我錯愕追問：「你一直喺度望住？」她搖頭，指向腦袋位置：「佢話我知。」

 「係阿爸話你知？即係佢聽到曬我哋講嘢？咁佢真身喺邊？」我好奇得不斷發問，她則耐性解答：「我可以睇到佢記憶，靈魂依然喺身體，但就算醒翻都唔會記得太清楚。」

 「哦。」剛才的對話，真誠又赤裸、更互相擁抱。若果阿爸清醒過來，擁有這段回憶，相處會否變得尷尬奇怪？  

「阿媽」望我一眼，像是看破我心思：「你唔想佢知道？」 我坦白從寬：「自從你唔喺度，我一直唔知點面對阿爸，好似講多幾句就會嘈交，代溝越嚟越大，唔明佢點諗。」 

「男人就係咁，唔鐘意講出口，怕肉麻尷尬。佢唔講，唔代表佢唔關心你，你應該知道，點解佢成日訓梳化。」 我別過臉，不想承認。 





她笑了笑，然後純熟從褲袋抽出房間鎖匙，兩三下就扭開門。

 門後景象，並非我想像中簡約整齊，反而雜亂無章、佈滿阿媽生前用品。

「點解⋯⋯佢唔係拎曬去回收？」 

「呢個，就係我翻嚟原因之一。」她邊說，邊走入房間，自然地攤坐在床上，我跟隨身後，坐在椅上，觀看四周。