呢個交流計劃規定全部學生都要住係當地人既家庭,正路就係住足十個月,但事實同經驗所見能夠共處足十個月而無轉過寄宿家庭既只係一半左右。 

一到步 Neuquen 機場,接機大堂塊玻璃已經滿佈左我地班交流生既名。 

 
等行李既時候,我即刻落足眼力搵我個名,仲好驚搵唔到自己個名,要好似以前睇過一套電影咁流浪機場。原來我個名係左上角,用中文名拼音寫又幾親切,人唔高,搵左2次先搵到  。人生第一次等行李緊張到出埋汗,一係好驚自己個行李被寄失(老母: 阿根廷人做野好亂架),二係對住未來一年既「米飯班主」,第一句講乜好?自我介紹?西班牙文既Hello: Hola? 又如果我D西文學得太慢,而佢地又唔識英文,咁咪GG? 

行李已攞,就跟住大隊去會一會我地既host family 啦! 

“Welcome! Bienvenido! 不思” 離遠已經聽到一把幾好J既女聲叫我個中文名拼音。當我仲苦思緊講邊句開場白好既時候,Host Mum(下稱Fernanda) 已經一啖錫左落我塊「臉豬登」,雖然早有預習熱情既南美習俗,不過硬食埋host dad 啲鬍鬚同host bro 塊臉啲汗,我先回一回神,意識到「哇屌,正呀喂」。點解? 我用圖答你。  



“Everything alright on the long trip?” Fernanda再開口。我興奮到跳起,原因當然唔係佢把聲,而係佢能夠用英文講到一句句子,咁就代表我既頭幾個月不至於又盲又聾又啞 。睇緊既巴打可能會諗:搵個MK都識啦;但係呢件事係全西文既南美一啲都唔簡單,例如 楓個host family就正正係完全唔識英文,二個月後佢已經轉左host family。 

Host Dad話Neuquen 只係最近既機場,我地住既地方係東面45公里外 一個叫General Roca 既小鎮。同 楓講多2句廣東話然後就攬一攬道別,佢既Host family住係西面既山區入面,下次見佢怕且係回程既時候。(Neuquen既山區似瑞士多過貴州,而且南部算係較富有既地區)上車之後,我就跟Host Family 出發「返屋企」了。





 


沿路上既果園全部都種左呢啲一排排既樹黎做organic wall 係全數平房既郊區顯得特別神奇 
 
 
 
已有 0 人追稿