出走一年:阿根廷的月光特別圓: Ch.8 三月見真章

Ch.7 三月見真章 

從起初陌生既街道，到General Roca既街道名都開始背得7788。阿根廷，呢個曾經神秘既國度，初來報到時抱住遊人既心態匿係面紗後面所認識既阿根廷一切都好似好美好，好理想。不過，但凡新鮮感減退以後，係幻象背後既往往都係令人難受既現實。正如巴打問到，歧視問題嚴唔嚴重？係小班教學既學校，大家都好友善，歧視問題真係好少，最多都只係佢地”Chino” “Chino” (Chinese) 咁大叫明知我唔係幾鍾意既名。比較難受既反而係行街既時候，大部人迎面而黎既路人都會明顯咁上下打量下我，感覺好似我有36E身材，而成街都係咸濕佬咁。開頭我曾經因為General Roca幾乎完全無Asian而覺得開心，唔洗好似某國留學生咁去到邊都堅守住自己既鄉音；可惜，事與願違，佢地對Asian既過份「熱情」同好奇令我感覺太煩擾，不斷成為焦點真係好累人既一件事。 

似乎遠走高飛到再遠，都放唔低自己原本既身份，三個月來我不斷咁努力咁跟住阿根廷既文化去"Live like a local”。事實係，除左表面果層Party，Hea，瞓晏覺既文化之外，我撞上了冰山。呢刻腦海又諗返起出發前有個老鬼忠告我地一年交流，開心既最多都係20 30%，而唔開心既先係多數  。 

 

經Felipe介紹之下，我開拓左一班新既朋友仔，但除左週末Party見下面，同Felipe一齊去踢下波之外，閒時都係甚少互相聯絡，而學校既同班同學第一個月後都係好少聯絡。所以平日既下晝，無學返，唔想瞓，無朋友既日子，日復日，當每日既高潮都只係同Host Grandma上西文堂，孤獨既日子慢慢變得平常。 





與此同時，Host Dad因為工作關係唔係Town既日子越黎越多，我亦察覺到Host Dad係屋企既時候，Fernanda都多數去下旅行或Stay out。最可怕既事，最後都係避免唔到，係十一月尾既時候，最憂愁既日子，Host Grandma同我話，我既Host Parents已經搞緊分居既手續，之後Fernanda會同Felipe搬去Buenos Aires。而因為我既交流生旅程係Under呢個分區既機構，所以我無得選擇跟Fernanda去Buenoas Aires，更加要準備搬去另一個Host family，另一個Host會係點？未知，因為阿根廷人既效率係真係好慢，下個月就係Christmas，我連自己將會身處一個點樣既屋企都未知。 
 



 
被迫幫機構賣廣告既巡遊，由於我完全唔記得要帶支區旗去，咁我唯有自己畫一幅，效果唔錯。