見到唔少巴絲打都有興趣去認識下類似既計劃,咁等我負責任啲,講返啲潛在既風險。開頭既Chapters提到既交流生活係的而且確好吸引,但快樂往往需要唔開心先顯得珍貴,並唔係所有野都會一帆風順既。 

雖然交流計劃會講到一年後既你會學到一口流利既外語、多左個second home,second home country,但事實都會有人係學唔到外語、同host family關係鬧疆、遇上歧視問題、理想與事實不符、意外事件等等,甚至有人因而提早返歸(Early Return)。咩為止意外事件?我當年認識既一個美國女仔H,同佢一齊去過機構搞既旅行,係旅行後個零月後突然收到佢Send黎既短信話因為俾當地既校長性騷擾,投訴不果,決定左提早飛返美國。又或者,唔覺意未成年而宿醉街頭,亦會bye bye。所以要過一年並唔係食生菜咁易,希望真係打算去馬既讀者為自己做好準備,任何時候保護自己先最重要! 

一年闖蕩表面風光,背後辛酸都可能好甘,例如$。有巴打問咁樣玩一年要幾銀,十萬,對我自己屋企黎講都唔係一個小數目。記得十一月果陣,我從 楓既口中知道機構將會同旅遊公司合作搞一個15日既旅行團,由首都玩到北部 Iguazu大瀑布,仲會過埋巴西跳下舞,而且全團都係交流生。相信每一個人都Lam哂俐,不過15天團團費要8000港幣,而我當年每月既零用錢都只係2000港幣。由於先前初來報到,好多野日用品都要買,又或者買貴左,仲有學校個首都遊,我自己1蚊都無儲起。但我真係好想暫時離開一下萬物簫條既General Roca,大拿拿8000蚊,於是特登請左一日假係阿根廷既朝早即係香港既夜晚打俾老豆。 

[Description: D]  “喂,老豆,近排點呀” 
“都OK啦,你又點呀,果邊天氣仲係咪好凍呀?” 
[Description: D]  “十一月開始春天,日頭暖返啲,無咁難頂啦” 


“咁咪幾好,野食果啲慣唔慣呀?” 
[Description: D]  “都無問題呀,大部分野都好好食呀。係呀,老豆,黎緊個機構會搞個去北部既旅行團,全團都係交流生一齊去,我想去見識大瀑布呀” 
“哇,又要幾錢架?” 
[Description: D]  “要8000港紙” 
“咩話,又8000? 上2個月先額外俾左幾千蚊你去首都,轉頭又8000?你當你老豆識印銀紙呀,錢要返工搵架大佬。” 
“咁⋯⋯” 
“呢8000我真係俾唔到你,亦唔想有求必應,成10萬蚊俾你去交流一年,仲想點呀?阿仔,老豆搵錢都好辛苦架” 

可能我將自己代入左Host Family買野唔睇價錢既生活,老豆既反應完全係我意料之外,但字字鏗鏘,逐句逐句將我屌醒,屋企人付出十萬唔係想我純粹享受人生,食下鬼妹,而係要學到野,最易見係西班牙文,最想見係一個更加成熟既不思,一個會識為自己將來幾個月做planning既不思。聽住老豆堅定而心痛既訓話,我感覺全身乏力,一句都反駁唔到,因為根本理虧。兩行眼淚無聲無息咁隨住掛斷既電話而湧出,不單係呢趟旅行既打算幻滅,而且對自己一而再咁要求一筆錢去玩覺得好慚愧。
 


 
幾個月後,成熟既不思都最終能夠去得成呢趟旅行,係無增加零用錢既情況下,儲到10,000蚊去左Buenos Aires同Iguazu。我會係後面既篇章細說詳情。 

 
 
已有 0 人追稿