我做金融呢行，遇過好多古靈精怪既客: CASE I 你老婆死左未？
先講第一個，印象都好深刻下。
六月頭，因大陸親戚介紹下，識左一個男人，係深圳開左間工廠做橡膠既，四十幾歲，已婚，無仔女，標準大陸佬樣，陸軍頭，大肚腩，Polo shirt，識廣東話，不過發音唔準。
六月份其實壓力都好大，因為有半年既Target要meet。
咁同個大陸佬（王總）傾左幾次電話，佢話手頭上有500萬可以用黎投資，咁我咪上深圳見佢啦，傾詳情，反正家在大西北，上深圳仲近過出旺角。
其實都唔係第一次番大陸見客，所以都駕輕就熟，B2十分鐘到深圳灣再轉的士，去佢南山區間廠到。
去到，第一次見到佢，比想像中高大，高我半個頭（本人都唔算矮），有少少壓迫感，但其實份人都算好nice，中間都有講有笑。
我：你想我係香港幫你投資d咩丫？股票？樓？
王：都可以，反正筆錢放係到都無咩用。
（類似呢d對話就唔打出黎喇，唔係重點，下刪一個鐘對話，跟住就開始來料喇。）
我：咁你有無諗住做投資移民落黎？ （一定有香港市民diu我）
王：唔啦，我老婆唔落得黎。
我：點解既？
王：佢過唔到關架。
我：咁無辦法啦。
（雖然我仲好好奇，好想問落去，但見到佢好似有d難言之隱就算數啦，不過我心諗，唔通佢老婆係非法入境或者犯左法？）
結果同佢傾多陣，夜晚七點到，就同佢去左間餐廳食飯，八點半就食完。
王：不如你上黎我屋企啦。
我：唔洗麻煩你啦，仲早，我轉頭搭車番香港得架啦。
王：今晚一齊再研究下，聽朝一早同你一齊落香港簽約啦。
其實我好唔慣係人地屋企過夜，仲要係大陸，不過因為個男人係親戚介紹，親戚都講到佢好好仔咁，又咁熱情留我，我推左一陣都唔好意思，又驚得失佢，斷估唔會訓訓下無左d器官既！我果陣真係諗埋呢d on9 野。
跟住佢揸車去左佢屋企，半個鐘到，我都唔知去左邊，類似香港既圍村啦，一幢兩層，每兩幢痴埋一齊，因為我見到有兩個正門，簡單d講，即係一個圍欄圍住兩個單位，每個單位有兩層，但睇落又唔係豪宅黎，有少少殘殘地，好暗，大陸d街燈真係差過香港好多。
一入到佢屋企，就發覺部電視開緊，但無人係到睇緊，應該係佢老婆走開左姐。
跟住同王總坐係梳化，研究緊A股H股，但一直無人望部電視，我對咩鳳凰衛視又無興趣，佢又專心研究緊，我咪諗住熄左佢啦，廢事嘈住晒。
我：不如熄左部電視啦，反正無人睇。
王：唔好！我老婆好鍾意睇。
但由頭到尾都無見過佢老婆出現，到呢一刻，我忍唔住問。
我：王總，你老婆呢？
王：佢夜晚無化妝，唔鍾意見人。
我：哦。 （心諗：睇乜野電視丫咁）
話口未完，部電視無啦啦轉左台，轉左個我又係唔識既台，我個心好突然咁跳左一下大大力既。
我：做乜自己轉台既？
王：隔離果家人都係用呢款電視機，佢個遙控有時會控制埋呢邊。
嘩！有無咁神奇？但聽落又好似好合理咁，信住先。
大約十點到，部電視終於熄左，強調，係佢自己熄既，解釋當然又關個遙控事啦，之後個廁所燈無啦啦開左，又開又熄，閃左幾下，跟住熄左。
佢解釋係：電力供應不穩，成日都係咁架啦。
但我覺得，根本就好似有個人睇完電視去廁所咁！！！
你老味，我好似入左間鬼屋！
有人問我點解仲唔走？一黎如果我自己一個出去，我會仲驚，二黎存僥倖心理，幻想佢既解釋係事實，我自己諗多左姐，三黎，錢作怪，唉！
十一點左右，佢就話要休息喇，我呢d夜貓當然仲好精神啦，王總帶左我上二樓間客房，佢自己就去另一間房訓，都係果句，由頭到尾都無見過佢老婆。
咁我訓係張床，又訓唔著，又唔想亂諗野，咪玩下手機，上discuss睇post囉，去到大約一點左右，我聽到出面有喊聲，低聲啜泣果隻。
我嚇到即刻跑去道門到，check多次有無鎖好，仲sit左張紙仔係門隙到，一開門張紙仔就會跌落地，如果佢有鎖匙入過黎，起碼我知道先，呢招我去旅行住民宿時成日用，如果第二朝張紙仔跌左落黎，我會即刻check一次財物，睇下有無唔見野。
因為我係果d一訓就訓死左既人，人地係隔離打麻雀我都可以訓得著。
講番正題，聽把聲，似係王總既喊聲，估唔到佢牛高馬大都會喊，不過人地d家事唔理得咁多啦，兩點鐘左右就訓左喇。
第二朝八點訓醒，即刻去望紙仔，跌左落地，個心涼一涼，睇下有無唔見野先，好彩，所有野都係床頭櫃到，d器官都仲係到。
出到廳，已經見到王總係到睇電視。
我：王總早晨，咁早起身既？
王：慣左喇。
跟住同佢出街食個早餐，就落香港簽約，去到關口時，佢同我講左番說話。
王：唔好意思呃左你，其實我老婆已經死左，但我一直都感覺到我老婆同我住埋一齊，佢仲未走架！自從佢死左，部電視就會無啦啦自己轉台，甚至係開關電視，隔離無住人，唔關遙控事，d燈我就唔知關老婆事定關電力公司事，反正佢成日都會閃閃下，不過都係自從我老婆死左先變成咁，琴晚我驚講出黎會嚇親你，所以先呃你，你問我關於老婆既事，搞到我諗番起佢，琴晚都忍唔住喊左陣，我真係好愛佢。
王：我都有諗過移民，反正大陸得番我一個，老爸老媽都唔係到喇，但我放唔低佢（老婆），我驚佢唔識跟住我走，又驚佢過唔到關，因為呢到皇氣好重，d公安會唔俾佢過架！
講講下，我見到佢眼尾又有d淚光，我拍拍佢膊頭，對住一個用情咁深既男人，我都唔知講咩好，我未拍過拖，唔係好明。
之後落到香港，好順利簽左約，同佢食左餐飯，就送番佢去關口。
到左夜晚，打個電話俾番親戚先，一黎多謝佢啦，二黎話晒個客都係佢介紹，禮貌上都要報告下既。
我：舅父，傾好左喇，多謝你丫，遲下上黎請你食飯。
舅：唔洗啦，我當幫個好朋友。
我：要既要既，係wo，你知唔知王總老婆既事？
舅：咩事丫？
我：佢老婆死左件事
舅：死你個頭！好地地做咩咒人死？王總同佢老婆係我隔離丫，佢請左我去佢屋企食飯多謝我，洗唔洗俾個電話佢地聽？
我：下？！咁唔洗喇，我都食飯先，拜拜。
我收線都收唔切。
到依家我都唔知，係王總純粹講大話嚇下我，定係我舅父時運低，不過由佢啦，下次打死我都唔會再去佢屋企。