上年年尾,我有個客人不幸過左身,女仔黎,都幾可愛,廿五歲,佢同佢男朋友係一次交通意外中過身。

我之前每個月都會見佢一次,同佢update番d市場資訊同review番個portfolio,從佢說話中,其實都睇得出佢對未來既婚姻生活好憧憬,佢男朋友都係一個好仔黎。

我最後一次見佢係二千一三年十一月,佢話計劃緊結婚,仲話遲下請我去飲,老實講,聽到朋友既喜訊,當然開心啦。(基本上我當客人都係朋友咁睇。)

但好可惜既係,十二月,一次車禍,兩個人,就唔係呢個世界喇。

收到呢個消息時,遺憾之餘,我第一時間整理番晒d文件時,要將佢放係我到既投資退番俾佢屋企人先。





喪禮大約係一個月後,我八掛問下個朋友,點解咁遲先搞喪禮?佢話,有陣時死者家屬無咁多錢,要去幾間殯儀館格下價,最重要係,喪禮都要揀好日子,有陣時要隔好耐先搵到好日子搞喪禮架。

咁話晒相識一場,於是去左鑽石山間殯儀館,鞠個躬,講聲拜拜。

殯儀館唔係第一次去,但每次去都好壓抑,感覺好唔舒服,見到家屬喊到豬頭咁,個心都戚戚然,拿住拿住,基本上個靈堂得黑白兩色,最colorful就係d鮮花,特別顯眼,望住d花,唔知點知會諗番起個女仔,諗住佢果個好陽光既笑容。

靈堂正中間掛住兩張大相,一張係個女仔,一張係女仔個男朋友(未婚夫),個喪禮應該係兩家人合埋一齊搞。


隔左兩個禮拜左右,我再約個女仔既媽媽,做番d文件轉交手續,佢媽媽係一個好傳統既女性,內地落黎,份人都好nice,大約50歲,睇得出今次喪女對媽媽既打擊好大。





我:姨姨,節哀順便呢d係阿佳(女死者)生前放係我到既資產,我依家俾番你啦。

媽:唔該晒你!果日(喪禮)都有見到你,有心。

我:都係相識一場,應該既。

媽:遲d我屋企會辦喜事,希望你都會黎啦。

我:一定一定!





我心諗,岩岩過左白事,辦番場紅事沖喜下都好正常既,於是諗都唔諗就應承左。

點知,呢次真係大開眼界喇!

又隔左一個月,其實我已經無咩印象,你話無我良心又好,記性差又好,生離死別見太多,感覺不大,如果唔係發生件特別事,我應該都唔會記得呢個case。

有一日,公司無啦啦收到封信,秘書姐姐拎黎俾我,信封面係寫我個名。

一拆開,吊左聲,又係喜帖,無錢無錢無錢,我呢個初戀都未試過既人,真係唔係好明結婚究竟有幾開心?

不過呢個炸彈唔係紅色,係白色,都幾令幾優雅,耳目一新,邊個fd咁有taste呢?我懷住好奇既心打開左佢。

。。。。。。

SHIT !





做乜9?竟然玩d咁既野?

冥婚!

不過我份人就真係好仆街既,我第一時間諗,點樣鬧洞房丫?我真係第一時間諗埋呢d野,第二件事就係,洗唔洗俾人情?

至於我有無諗過唔去?當然無啦,我份人好奇心都幾重丫,難得有人請我去冥婚,人一世物一世,咩都見識下啦。

講番張帖,都幾特別,用字同正常婚禮既無咩分別,不過無簽名,地點係香港既一間廟,唔開名,時間夜晚九點,係一個星期之後。

老實講,果個禮拜既心情真係既期待又怕受傷害,好似睇鬼片咁,愈驚愈想睇。

事前同朋友講定,如果十二點我都無打電話報平安,記得幫我報警,我就無同屋企人講,廢事佢地擔心啦。





去到間廟,都係鑽石山,就算夜晚幾光猛,無我想像中陰陰沉沉既感覺,可能係市區既關係啦,不過就無咩遊人喇。

地點係其中一個偏廳(唔知係咪咁叫),一入到去,震撼眼球丫!兩大個紙紮公仔,一男一女,比例同真人一比一。

一到去,見唔到熟人,見有人上緊香,我就有樣學樣,上枝香,跟住求奇搵個位坐定定,唔係好敢郁,成日覺得果兩個公仔望緊我。

隔左陣,男方女方家屬一齊由門口並排入黎,手上捧住佢地個神主牌同埋靈相,行到果兩個大公仔,就放低個神主牌係佢地面前,再放相。

跟住有人唔知係邊到拎左一大班紙紮野,有金飾,龍鳳鐲,衣紙,仲有樓,跟住放係側邊個焚化爐入面燒,跟住拎左兩個酒杯,針滿酒,再拎塊紅布蓋住女方個神主牌,全場人起身鞠個躬,咁基本上成個儀式就完喇。

(應該有遺漏,但我實在記唔起喇。)

成程大約一個鐘左右啦,跟住家屬就多謝同送走d客人,原來冥婚係無飯食架,好肚餓。

總括而言,同想像中,電影中,好大出入,純粹似係一個宗教儀式,都幾感動,生不能同生,死卻能同眠,除左果兩個大既紙紮公仔有d陰森,其他一切都好。





我行去荷里活Food court食個飯,就係鑽石山個地鐵站搭車番屋企。
已有 0 人追稿