我做金融呢行，遇過好多古靈精怪既客: CASE III 古董股票
我有個女性朋友，家住屯門圍村，近黃金海岸果邊，好不幸佢爸爸前年過左身，留左一大堆遺產俾佢。
雖然圍村人重男輕女，但成家人得佢一粒女，當佢如珠如寶咁鍚，所以佢都有少少港女格。（無意攻擊香港女性，但搵唔到一個更好既term。）
我同佢係中學同學黎，同班左五年，中三至中七，升上大學之後，甚至畢業後都有出黎gathering下，當然只係一大班人果隻，未試過私底下兩個人dating啦，咁大家都應該get到我同佢熟悉既程度。
咁係佢爸爸過身後半年左右，佢整理爸爸既遺物入面，無意係床底下發現左一個鐵箱。
順帶一提，佢爸爸留左兩幢村屋同一塊地皮俾佢，其他資產例如現金果d就真係唔多清楚，我都無問。
講番個箱，都好殘舊下，生晒銹，大約一部家用printer咁大左右啦。
裡面裝左好多古董，或者再講清楚d，入面裝左好多舊股票，係一張張果d股票。
一大疊股票紙（我都唔知點叫呢d野），又黃又舊又殘，擺左起碼幾十年，好驚摸一摸都化灰，但睇下上面寫既野。
嘩！嚇Ｑ死我，每張紙起碼值成百萬，我好驚掂爛左就大檸樂喇！
我個女性朋友，因為都知道我做呢行，所以就叫我幫佢處理左呢d股票佢，但係，大姐丫，你叫我幫你用電腦買賣股票就識姐，我唔係玩開古董架。
但話晒相識一場，我對令女既抵抗力都比較低既，嗲兩嗲，又係咁煩我，唉，我幫你搞掂佢啦。
（當初佢打電話黎係話：我有d股票唔識處理，可唔可以過黎幫我睇睇？）
我太純情，好易俾人呃，算，當做善事。
出門當然靠朋友啦，一有唔識，即刻打俾同事問下先，差唔多半間公司既同事問晒，得一個人講既野係最幫到我：不如你去間公司問下啦。
仲有好多無聊回覆架：
當牆紙貼幾令丫。
去廁所用，去一次用一球，幾過癮。
摺心心送俾條女。
等等啦。。。
咁我就打算幫佢分下類先啦，睇下邊d公司已經執左，邊d公司仲健在，果種標階體真係睇到我眼都殘。
最後大約有八成公司我係聽都未聽過，上網search完，應該都執左。
我：呢八成既應該都淪為廢紙喇，你一係就擺多幾十年，再捐俾香港歷史博物館啦。
女：吊你咩，幾百萬wo。
我：好巴閉咩，我夠捐過幾百億，精啦。
女：喂，幫幫手，搞搞佢丫。
我：得啦，我幫你打電話問下。（心諗：搞搞你就得）
跟住幫佢打左去間銀行問，你依家已經接駁到我地既客戶服務主任，但由於線路繁忙，請稍候x 100次。
等到終於有人聽電話，我將個情況由頭到尾講一次俾佢聽，雖然我見唔到佢個樣，但我諗佢一定係Ｏ晒咀，個接線小妹妹聽把聲應該仲好後生，似係岩岩出黎做野無耐，佢話要問下經理先，咁我都無為難佢，留低左電話就收左線。
係等銀行回電話既途中，無所事事，就係佢間舊村屋入面周圍睇下摸下，雖然我唔識玩古董，對古董一竅不通，但有d 野feel到既，感覺上間屋入面好多值錢既。
我：你間屋入面既野好似都好耐歷史咁。
女：我唔知丫，我同我老豆呢輩人都係住新起既村屋（佢用手指指住好遠既地方）呢到其實係我阿爺住既，我細細個時都會間唔中黎玩下，大少少已經無印象。
我：咁好地地今日痴邊條線黎呢間屋丫？
女：咁老豆都去左咁耐，新屋果邊d手續丫都搞好晒，見今日放假得閑，咪過黎睇下囉。
呢個時侯電話響起，係銀行打番黎，內容大致上都話ok，只要辦番d簡單既手續就可以喇。
呢個時候其實我已經功成身退了，只恨佢唔留我係到食飯，有少少嬲姐，不過總算親眼見過實體股票，都算一場收獲啦。
第二朝早上，個女性朋友打電話俾我。
女：我都係唔賣d股票喇。
我：點解既？
女：廢事麻煩啦，又唔係等錢洗。
根據我對人既觀察，一定有妖孽（古怪），係我好奇心氾濫成災之下，終於俾我chok到個答案。
女：我琴晚夢見阿爺，阿爺同我傾左好耐計，佢話間舊屋既野其實都係留俾我地呢d後輩，可以賣，但唯獨唔可以賣間舊屋，間屋係祖屋黎，建起一塊好好既風水地上面，再三叮囑我千奇唔好賣。
我：咁關d股票咩事丫？
女：諗諗下都係算啦，我突然間好想保留住舊屋個環境，唔想郁到入面任何一件野，我覺得賣左既話，阿爺會唔開心。
我：咁都岩既，你阿爺咁鍚你地，得閑多d去拜下佢啦。
跟住我收左線喇。
-------------------------------------------------------------
順提一帶，大家可能會質疑實體股票到依家仲有無用？事實上，股票係你對一間公司既擁有權，有好多公司都有過百年歷史，所以一百年前，你係呢間公司既老板（股東）之一，一百年後都係
實體同電腦只係記錄方式既不同，但係法律上都係有效，分享少少，如果你有呢d實體股票，你去番你間證券行or銀行，存入番張實體股票，跟住間證券行or銀行會pass去中央結算所核實，等幾個工作天，你電腦個股票戶口都會出現番條數
至於張實體股票，佢會唔會俾番你，我就真係唔知喇。。。