一覺瞓醒，你竟然同我講香港有喪屍2-雙龍: Zombie 24：比賽？比咩賽？

經過一晚的休息，寒天龍等人恢復了不少元氣，看起來精神多了。一個男人突然把門打開，帶他們到一個明顯看起來是飯堂的房間。
 
「哼！你哋係第一個有噉嘅待遇嘅人，都唔知點解Amy姐咁中意你哋？食飽啲啦！全部都係罐頭冇毒㗎！」語畢，男人便坐到別的餐桌吃著他的早餐。
 
「點呀？食唔食？」莫子謙拿起罐頭端詳著。
 
寒天龍思考了一會，把罐頭打開，聞了聞，又舔了舔「食啦！我覺得佢唔會害我。」
 
望著寒天龍大口吞嚥，羅悅佩也跟著打開罐頭狼吞虎咽，畢竟腦力跟體力已經被之前的事消耗得七七八八。其他人見狀才緩緩拿起罐頭跟著把早餐吃下，途中不忘查看其他人的身體狀況。
 




突然一陣風刮過，Amy倏地坐到餐桌上。看她的裝束，明顯有悉心打扮過。少女粉色的背心配小黑圓點白色短裙，還化了一個淡妝，青春少女的模樣令她看起來有點可愛，完全看不出她是一個新人類。
 
「點呀？食飽未？抖多一陣就帶你哋去競技場，贏咗就可以同邦哥傾條件，不過太過份嘅話，佢有機會會殺咗你哋！」
 
接著，Amy放下一支紫色液體的藥針「想贏，可以用佢，但係佢話係測試版，可能有副作用喎！」
 
阿柳把口裡的沙丁魚急速吞下「毒品？」
 
「應該係可以變成佢哋噉，成為新人類！」諸葛一明裝作推眼鏡的手勢猜測道。
 




Amy被諸葛一明的理解驚訝到「肥仔，醒喎！噉都俾你估到。不過，佢只可以變成好似我噉，變唔到邦哥咁勁！」
 
見眾人沉默不語，Amy再度開口「私人俾多支你，想俾邊個都得。」
 
「如果……我打咗支針，我可唔可以變返做人？」寒天龍拾起藥針問道。
 
「唔知！因為係新嘅改良版，用唔用隨得你，但係進化失敗可能會死！」
 
寒天龍頓時心裡發寒，毛髮直豎，一直看著手上的藥針若有所思發著呆。
 




「俾一支我！要打就一齊打！」胡炎陽伸手想要拿走桌上的另一支藥針，卻被Amy搶先拿起塞到寒天龍手裡「唔係俾你㗎！」
 
「龍仔，不如老竇代替你去競技場啦……」寒一鳴望著發呆的兒子語重心長地說。
 
「我諗你哋搞錯咗一件事，唔係淨係龍哥一個去，係你哋全部都要去！」Amy嘴角泛起一抹得意的笑容。
 
為了不激起Amy的恨意，寒天龍特意用哄笑的方式說「Amy妹妹，妳睇我老竇都唔係後生咯，不如俾佢同啲女仔留喺度吖，佢哋本身又唔識打，出到去咪又係冇嘢睇，妳話係唔係先？」
 
「係囉！Amy妹妹，我哋出去好快就會輸，都冇睇頭，悶親呀大佬就唔好啦！」董敏敏勉強擠出一抹笑容。
 
「唔係我話事㗎，個肥仔搞開，我跟返佢個規矩咋，唔理係邊個，個個都要上場。」Amy攤開雙手搖搖頭回應。
 
「點睇Amy妹妹都係勁過佢啦，妳冇理由話唔到事㗎喎？」李孝順隨即打蛇隨棍上追著問。
 
Amy的笑容在此時已經消去，隨之而來的是狠狠地瞪大雙眼，那尖銳的目光彷彿要置人於死地般「我想睇！我就係想睇你哋全——部——人都玩！」




 
眼見阿柳想起來抗議，寒天龍立即按住他「Amy妹妹，有冇方法可以令佢哋唔洗死？咩方法都得，求吓妳話俾我知吖！」
 
Amy完全沒有想自己的偶像竟然那麼卑微地哀求自己，突然心跳加速，面紅耳熱，害羞得別個頭去。心裡不由得心花怒放，更想原地跳舞歡呼，但另一方面又覺這樣的寒天龍不夠Man「我考慮吓！一陣有人會帶你哋出去。」
 
「多謝！」
 
寒天龍目送Amy離開後才坐下來「唔該你哋唔好咁衝動！放過我哋基本上我覺得係冇可能，但係幫我哋爭取一啲條件可能仲得，只係唔知一陣競技場係咩玩法。」
 
「佢俾得支嘢你呀，都唔方會係啲咩正常比賽啦！」諸葛一明這話的確很有道理。
 
就在大家還在猜想的時候，早前的男人又再出現「阿龍哥，Amy姐俾你哋㗎，十分鐘後我嚟帶你哋去競技場。講真，我都好想睇吓你點解可以令Amy姐對你咁好！」
 
眾人看著男人放下的物品，除了寒天龍和胡炎陽的武器外，還有多把刀具和鐵棍之類的武器。在確定大家都手持最少一種武器後，胡炎陽又再提起藥針的事，但再度被寒天龍拒絕。
 




「點解你係都唔俾支嘢我㗎啫？」
 
「如果可以唔用嘅話係最好，我唔想你哋是旦一個變喪屍……」
 
羅悅佩握緊寒天龍的手「阿龍……」，她沒有提議任何的可能性，只是補上了一句就沒有再問口「要贏一齊贏，要死一齊死！」
 
聽到這句後，大家似乎都認清眼前的事實。反正逃也逃不掉，躲也躲不掉，合力解決困境才是唯一的方法。
 
 十分鐘比想像來得要快，但對有可能死的人來說，多活一秒就是多活一秒。競技場上已經有好幾十人在中央等待著，那些大鐵籠裡的人無一倖免，男女老幼全都被迫出賽。而且不像寒天龍等人全副武裝，全都近乎手無寸鐵，徬徨地張望著四周。
 
喪屍的吼叫此刻格外明顯，在本來困著人的大鐵籠處發出。每聲嘶吼都令人不寒而慓，更有人被嚇致失禁淚流滿面。放眼望去，從它們把手伸出鐵籠外胡亂張爪，就已經知道它們已經急不及待想衝出來，亨用美味的新鮮人肉盛宴。
 
寒天龍等人邊走邊留意著四周，眼前的觀眾席跟競技形成了很強烈的對比。新人類大聲呼叫，雀躍無比，甚至興奮得瘋狂搖著圍欄，搖得它發出「吱吱咚咚」的嘈音。
 
「好喇！大家靜啲！好開心今日邦哥同幾位大佬大家姐一齊嚟睇比賽。我！阿陳哥今日好開心！一陣呢，我就會放晒啲喪屍出嚟，你哋就盡量殺啦。阿邊個，放啲武器入去。」那個面相噁心的肥男在臺上嬉皮笑臉地大叫。




 
肥陳蛇頭鼠眼，一副小人相，競技場上有些人已經怒視著他，只是他還懵然不知，一個腦勁傻笑。但就算一打一，他畢竟是個新人類，普通人跟本打不贏，只能在心裡咒罵著這個死肥仔。
 
「嗱！你哋準備好未呀？喪屍就要出嚟喇！」肥陳擘嘴大笑，露出一副淫竊樣。
 
跟他不一樣的邦哥等人，到此刻都沒有表現出興奮的樣子，只有Amy在那邊跳上跳下向寒天龍揮手。而寒天龍也跟著揮了揮手，為的就只是賭Amy到時會出手幫自己。
 
就在肥陳大叫「開始」後，被困著的屍群傾巢而出，衝向場上那堆美味無比的活刺身。