一覺瞓醒，你竟然同我講香港有喪屍2-雙龍: Zombie 45：吓？點解要跟住我？
「咩喎！我好想瞓床呀！我好想喺一個正常嘅地方沖涼呀！」嘉莉扭著身體撒嬌道。
「我成年冇返過去，間屋可能好臭，又有老鼠曱甴，都唔會有熱水。」
嘉莉又再靠過來「你咁耐冇返去，可能有返電呢？」
「沖涼用咩？煤氣定電？」水手服突然上前詢問。
「電囉！」
聽到我的回覆後，水手服隨即轉向鼓手說「阿冰！去，沖涼。」
佢叫阿冰……喂！等陣先！妳哋有冇理過我嘅感受？間屋我㗎！
阿冰看著我，似乎想跟我說什麼，一副欲言又止的模樣。
突然，大堂的音樂戛然而止，取而代之的是喇叭裡傳出一句帶有雜音的急促呼喊「喂！幫手呀，愈嚟愈多隻喇！」
眾人聽罷，立即跳回大堂。除了嘉莉，她氣定神閒地站在扶手電梯上方，彈指一響，擺出射擊姿勢，對準下面那堆喪屍。隨着她指尖無形的紅光閃過，一槍一隻，彈無虛發。
我被她那神乎其技的能力吸引住。心想著自己或許也能做到，便目不轉睛地盯著她的一舉一動，試圖捕捉她發射的時機和動作。
「喂！你一直睇住我做咩？我好可愛呢？」嘉莉俏皮地向我眨了眨一邊眼睛，笑著問道。
我沒有回應，而是選擇別個頭去。
「你又唔理我！信唔信我射穿你嗰度吖啦！」嘉莉作勢瞄準我的胯下。
我突然嚴肅起來問道「如果我而家要殺妳，妳覺得妳打唔打得贏我？」
當然，我沒有這個打算，只是想探知她的實力極限，總感覺她不單單只有射擊這項能力。
「嗯……可能會死。」嘉莉歪著頭想了想，過了幾秒才回答。
「我講吓啫，唔好放喺心，我唔會殺妳！」
「定係話，你唔捨得殺死我？嘻嘻——」嘉莉笑著回應。
佢真係傻得好似Mayu……
大堂突然傳出彩髮女生的叫聲「嘉莉，帶埋佢落嚟幫手呀！」
嘉莉聽罷，立即勾著我的手臂，把我拉到大堂去。
我環視了四周一眼，連一隻會動的喪屍都沒有，全都倒在地上。不是頭被扭斷，就是身首分開，根本就沒有我幫忙的份。
「妳哋都殺晒啦，仲幫咩？」我半瞇著眼，表現得極其無奈地問道。
彩髮女生遞上兩大袋從前面的超級市場拿到的物資給我「幫手拎嘢，我哋喺裡面拎咗好多嘢呀！」
「拎去邊？」
「你屋企囉！佢哋話去你屋企吖嘛！」銀髮結他手一邊收拾音響，一邊回應。
「我屋企邊度塞得落咁多人呀？」
嘉莉笑著搭話「得啦！我哋會自己搵地方坐，快啲幫手啦！」
呢幾條友想點呀？頭先就打打殺殺，而家就好似同我好Friend噉……
阿冰見我呆若木雞站在原地，便開口問我「Sorry，我哋真係好想沖涼，俾我哋打攪你一陣，得唔得？」
「我哋頭先仲係敵對……」
彩髮女生用肩膀輕輕撞了我一下「不打不相識吖嘛！你都話對我哋無敵意咯，行啦！」
我覺得，就算我拒絕，她們還是會跟著我，尤其是旁邊這個一直笑嘻嘻的嘉莉。對著她，我彷彿完全拿她沒有辦法，而且，我已經感覺不到她們對我的敵意了。
我們雙方邊走邊自我介紹，才得知她們是剛出道的偶像團體。
「妳哋都幾黑仔，出道兩個月就遇到喪屍！」
正當我繼續往前走，卻突然被彩鈴輕輕撞了我一下「嗰邊呀，去嗰邊先。」
我跟著她們來到銀行大廈旁邊的巴士站，一輛車身印有她們肖像的粉色小型貨車，就停在其中一個站牌前面。
「妳哋仲有架私伙車，經理人喺裡面？」
「死咗！」站在我身後的葉巧娜突然出聲，把我嚇了一跳，但看來她沒有打算再進一步解釋給我聽。
我本來打算坐到副駕駛座，但卻被李若冰搶先一步「你揸車，我唔識路。你識揸車㗎呵？」
邊有人坐咗先問㗎……
其實路程很近，走過去也只不過幾分鍾的時間，不過既然她們要求，那我唯有駛出巴士站，把車停到前面的馬路旁。
「吓？到㗎嗱？咁近使鬼揸車咩！」芷晴表現出有點不滿，可能是冷氣吹不夠的關係吧。
「我上去執吓先，順便開個窗吹吓，一陣再落嚟接妳哋。」
「我都要上去，我幫手，嘻嘻。」嘉莉跳下車跟著我。
眼見其他人依然坐在車上，完全沒有想要理會的感覺，我便打算捉弄一下這個傻妹。
「一陣得我哋兩個，妳唔驚我會對妳做啲乜嘢咩？」
她彷彿被我的話嚇到，停下了腳步，然後低著頭，害羞地說「嗯，一陣要溫柔啲，我會驚。」
吓？呢條友咩事？
「……我，我講吓笑，唔好咁認真。」我連忙解釋，不想她對我有什麼誤會。
但嘉莉卻對我做了個鬼臉「咸濕仔，我又點會咁益你呀，我哋識咗半日都冇！」
死𡃁妹！
一打開門，屋內果然傳出一股悶熱焗促的氣味，但所幸的是，它並不臭。正當我想把窗戶打開的時候，才發現當日離開時，原來留了一條小縫隙，難怪味道不算太難聞。
「呢個係你女友？」嘉莉拿起我放在窗檯的相框問道，但臉上表現得有點不太自然。」
我望了望那張我跟Mayu在北海道旅行時拍的滑雪照片「嗯，佢係Mayu。」
「唔似香港人嘅？」嘉莉認真地看著照片裡的Mayu。
「佢係日本人。」
「……我都係Mix嚟！」
「唔怪得妳個樣鬼鬼哋啦，Mix邊度呀？」我好奇問道。
嘉莉想了想，然後忍住臉上快要展露出的笑容，向我大聲說「……我巴西㗎碌柒，哈哈——」
我的額角彷彿瞬間滑下三條粗黑線「……偶像都講粗口嘅咩？」
「我上網睇到㗎！好似好好笑。係呢，咩叫碌柒？」
「妳都係問返妳隊友啦。」她這一問，倒是令我感到非常尷尬。
嘉莉放下相框，整個身體貼著我撒嬌「佢哋就係唔肯講呀！快啲話我知呀！」
「妳睇嗰陣冇睇留言咩？應該有人講㗎？」
「……我，我唔識睇，有啲字未學過……」嘉莉喃喃地說道。
條友玩我定扮嘢，明明廣東話講得咁好。
「妳認真唔識？」我禁不住內心的好奇問道。
「嗯，我仲學緊寫中文，識講唔係好識寫囉！」
「碌柒就係男人下面，粗口嚟㗎，唔好講咁多呀！」為了不讓她繼續學壞，我只好無奈地向她解釋。
「咩碌柒呀？你想對我哋個嘉莉做咩？」門口那邊突然傳來膠袋的摩擦聲和彩鈴的問話。
「佢教梗我咋！」
嘉莉連忙解釋，但這樣的解釋，顯然只會令其他人產生不必要的誤會。
「呢啲嘢唔使你教！」李若冰立即衝上前一把抱緊嘉莉，轉過身用背對著我，卻回頭狠狠地瞪了我一眼。
「喂！妳解釋都解釋得好啲吖！」
為了化解這個無謂誤會，我只好把事情的來龍去脈從頭說了一遍。
「又係呢個！咪叫咗妳唔好問囉！」夢潔搖著頭責怪。
突然，我瞄到一旁的彩鈴趴在餐桌上抽搐著身體，隱約還聽到她忍笑而發出的「噗嗤」聲。
「喂！妳條友肯定知道會變成噉，特登咁大聲講，等我俾人誤會，係咪吖？」我對著彩鈴不滿地罵道。
看到她笑得捧著肚子，我便百分之百確定這是她的惡作劇。
我沒好氣地走回房間，正想換套衣服時，檯燈突然亮了。我立即跑出房間把其他電器都打開，確認整間屋子的電力狀況。
「喂，你唔好嘥電啦，用晒嘅話，一陣你負責出去搵油呀！」芷晴跪在地上，繼續將要用的家電接上這臺體積如微波爐大小、發出陣陣噪音的黃色機器上。
「咁大舊嘢係邊到搵架？」
「佢叫萬瓦逆變器，噉都唔識！冇鬼用！」芷晴揶揄道。
我沒有理會她，而是嘗試把它舉起「嘩，咁重，妳哋都搬到上嚟，勁！」
「巧娜搬㗎，你真係要多謝佢，一陣有凍嘢飲，仲可以煮嘢食。」芷晴回應。
「仲有熱水沖涼添呀！」嘉莉笑著插話。
我立即望向在一旁默默在收拾物資的葉巧娜，單憑她那瘦削的身體，真的有可能搬得動這台「重型鐵盒」？這個東西至少有二百磅，我真的很懷疑。
「真係佢搬㗎，你唔使懷疑，係佢用能力搬㗎。」一旁的李若冰彷彿看穿我內心的疑問，眼神堅定地搭話道。
雖然機器有點嘈，但至少有電可用，也沒什麼去抱怨的了。看來之後我也需要找個方法弄一台回來。如果水叔的船在我這邊，我應該也不用擔心電力的問題。
想著想著，我還是想過去看一下雯雯他們。
「我出去一陣，妳哋想食嘢沖涼就自便，唔好整爛我啲嘢就得喇！」