友愛的決擇: 第四章：慧俊的感情關係

放完長假後，第一日返學永遠都係最辛苦，所以遲咗起身，以致連出門時間都遲埋，

著完衫，連早餐都無食，就走人

上完堂，我就去咗阿J屋企，因為我約咗阿寶同阿J傾重要事

阿J係讀fashion design，佢早前參加咗學校搞嘅fashion show，佢就搵咗我做佢model，兼叫埋阿寶一齊整件衫。

時間好趕，聽日就係deadline



阿J：『咁耐架！』

我：『sorry 囉！點呀，條裙整成點呀？』

阿寶：『差唔多啦，縫埋你啲珠就搞掂架喇』

珠？我嘅腦海當時一片空白，個腦停頓咗幾秒先識得反應過嚟

我即刻喺我個袋不斷搵，焦急起嚟將成個袋倒轉，我先醒起今朝趕住出門唔記得咗帶



阿J同阿寶兩個望實住我，我回佢哋一個十分內疚嘅表情

我：『err…. 我...好似唔記得咗帶』

『吓！！』佢哋同時間大大聲嗌咗出嚟

我：『咁...點算呀？

阿J：『點算？返屋企攞啦！番你屋企幾個站咋嘛』



阿寶：『你屋企有冇人呀？叫佢哋攞比你啦』

我：『daddy媽咪都返晒工....啊！阿謙！』

阿J：『好啊，叫佢拎過嚟比你，順便我哋又可以見下佢個樣』佢個樣笑淫淫咁

我：『咪發姣啦你！等我問下佢先啦』

『喂，阿謙？』
『係呀，咩事呀？』
『你...依家得閒嗎？』
『ok吖，我得閒』
『我張枱上面有包珠，我趕住用，唔知你方唔方便拎嚟比我呢？我依家喺大圍朋友嘅屋企到』
『哦，好啊，冇問題！』
『唔該晒呀！我喺大圍火車站等你』


『OK！』

半小時後，我已經喺大圍火車站見到佢

『唔該晒你呀！真係唔該晒！如果唔係急住用，我都唔會麻煩你』

『得啦，你講咗好多次唔該我啦，嗱，你要報答我架haha』

『haha，冇問題！不如你跟埋我去我個fd屋企吖，佢話想見下你喎haha，順便俾下啲意見我哋，好嗎？』

『吓，見我？haha好啦，橫掂我冇嘢做』

我哋一路行一路傾計，我就話咗俾佢聽我聽日要做model行catwalk

『haha得唔得架你』



『我當玩下嫁咋，啲人都係睇衫啫』

『你有冇練過行catwalk先？著住高踭鞋行一條直線，因著扑親喎』佢一路講一路噤住個口笑 『車！你理得我！係喎，我有2張飛，媽咪聽日會嚟睇，你嚟唔嚟呀？晏晝2點鐘開始』

『好呀，聽日得一堂，放咗學嚟睇你行catwalk仆親haha』

『喂！！』之後大大力拍咗佢手臂一下

『痛啊！講笑姐』

『抵死！鬼叫你笑我！』我用兇狠嘅眼神望住佢

『好啦好啦，最多聽日我幫你錄video，得未？』



『好呀！嗱，今晚我哋會出去食，咁我請你啦，當係報答你拎嘢比我』

『好！』

我哋上到阿J屋企，阿J好搞笑咁叉住條腰同阿謙say Hi，相反阿寶就好含蓄咁say Hi

我立即比包珠阿J，佢就用佢嘅一對巧手一粒一粒咁縫落條裙到，阿寶就做佢嘅助手

我冇嘢做，我就陪阿謙坐喺sofa到

阿謙：『你個fd幾搞笑喎haha』

我：『佢係咁架，你悶唔悶呀？不如我哋玩wii？』

阿謙：『但係你個fd縫緊嘢喎，會唔會騷擾到佢架？』



我：『放心啦，佢做art嘅嘢就最專心，你同佢講嘢佢都唔會聽到』

我同阿謙玩咗大半個鐘，阿J好快就完成條裙

阿J伸一伸懶腰：『終於搞掂！阿慧，你快啲去試下，我想睇下著出嚟個效果點呀！』

我：『哦！』

我試完條裙，就從阿J間房慢慢行出嚟

阿寶：『嘩！好靚呀！』

阿J：『咦！OK喎！唔錯吖！』

阿謙仲更加O咗嘴，之後細細聲嘩咗一聲

當時我有種感覺，就好似喺婚紗舖試緊婚紗，而阿謙就係等緊我出嚟嘅未來老公

當時嘅我簡直幻想過頭，口快快向阿謙講：『點呀？你覺得條裙點？好睇嗎？』

我轉咗一圈

阿謙：『好靚呀』

我唔知佢係話緊我定係條裙

自問真係睇得電視劇多，不自覺間好似啲女主角咁好開心笑咗出嚟，就好似有一種幸福嘅感

覺，不過好快我都清醒番，即刻叫阿寶幫我影番張相，之後即刻send比阿俊睇

--------------------------靚唔靚呀？

俊俊：
ok 啦

--------------------------車！無眼光！

俊俊：
無端端做乜鬼model吖

--------------------------你理得我！

send埋個好嬲嘅表情符號我就同佢哋一齊落街食嘢

我哋依啲學生哥，食嘅當然係平民餐，想食得貴啲扮high class啲嘅平民餐廳就當然係去大家樂啦！

我：『點呀，你食咩餐啊？依餐我請你』

謙：『吓，乜你講真架？第一次女仔請食飯，有啲唔好意思添haha』

我：『講啦，男人老狗咪咁婆媽啦』

謙：『咁呀，我要D3 配汽水吖，多謝晒喎』

我：『特登叫你幫我攞嘢過黎，依餐抵請你嘅』

我哋四個買完，食完，就諗住傾聽日fashion show啲細節嘢嘅，點知阿J對阿謙嘅嘢十分之有

興趣，係咁問佢問題，以下係一少段........

阿J：『喂，其實你有冇女朋友架？』

謙：『吓，無呀』

阿J：『竟然冇？睇你個樣，無女朋友都實有大把女痴住你啦，係咪先？』

我：『你都覺呢，曾經我都有同佢咁講過』

謙：『haha，女fans 算唔算呀？得閒我都有upload啲片上youtube，有唔少人話過我係男神嘅，不過依啲都係笑下就算啦haha』

阿J：『嗱！我話俾你聽啦，做生不如做熟，阿慧我依個朋友呢就唔錯嘅，等佢比佢個Hi Hi男朋友飛咗之後呢，你記住要安慰佢，之後乘機而入呀，知嗎？見你睇落咁好仔，我先醒你咋』

我：『喂！J！你講乜呀！』

阿J：『我有講錯咩？記得你先搵你，無事就可以幾日都唔搵你嘅，佢依啲咁嘅人邊係講真感情架，佢隨時搵第二個之後又飛你，跟住又話想同返你一齊，到時你唔好又喊住向我同阿寶訴苦！』

依個時候，阿謙用一個難以形容嘅眼神望住我，而我亦因為阿J講完依番說話之後，亦唔敢直視阿謙。
我用沈默嚟代表當時阿J的確話得我冇錯

－－－－－－－－－－－－－－－－－－－－－－－－－－－－－－－－－－－－－－－

話說阿俊已經追咗我3次，飛咗我2次，至於真正原因，我唔清楚，因為佢講分手嘅原因

都係好無稽嘅理由。第一次，因為我唔上佢屋企？第二次，因為無講4日電話所以感情變淡？

但係分手之後日日都至少打2次電話俾我。果時我喺度諗，佢究竟對我仲有冇feel？佢當我係咩？朋友？

分咗手點解仲要日日call我？唔係話感情淡咗咩？佢點解比希望我？當然，佢咁做我當然忘記唔到佢啦，

當佢又話想我做返佢女朋友嘅時候，當我支支吾吾唔知應唔應

承嘅時候，佢就好無賴咁話『有考慮嘅空間姐係其實仲想同我一齊啦，係咪？我都知架啦,haha』

認真，當時嘅我就真係好想，因為我仲愛佢嘛，不過女仔係咪應該要有返啲矜持先，

所以過多3日，佢再問我時，我就話『是但啦！無所謂！』扮到好唔在意做返佢女朋友。

唔好話我答得好衰咁，事實上我都唔知佢有冇玩嘢，不過之後，見佢對我都唔差，咁以前嘅嘢就算啦

－－－－－－－－－－－－－－－－－－－－－－－－－－－－－－－－－－－－－－－－

阿寶：『唉，做咩無端端講阿慧啲嘢姐，不如講返聽日嘅fashion show 啦』

當時嘅我真係好多謝阿寶幫我解開依個咁尷尬嘅場面走嘅時候已經8：30pm，我就同阿謙一齊返屋企

其實初頭一路行嘅時候，我哋都冇乜點講嘢，不過我就feel到阿謙耐唔耐都會望下我，見佢一副奇怪嘅表情，

我就知佢應該有嘢想問我

『做咩呀？係咪有嘢想同我講？』

我估佢應該係想問我關於頭先阿J講嘅嘢

『其實你而家同佢一齊開唔開心？』

依個問題我冇直接答佢，我以微笑嚟回應佢，希望佢明白微笑係一個咩嘅答之後，

我喺個袋攞出餘下僅有嘅fashion show入場票比佢，佢係聰明人，應該估到我喺佢問完問題就比張入場票佢 同佢問嘅問題有咩關連

_____________________________________________________________________

一個禮拜前....

Whatsapp：

---------------------17/3 fashion show 我行catwalk呀！2點鐘！我知你果日冇堂上架！你嚟唔嚟睇我呀？ 我有飛呀！                         
俊俊：
我果日約咗friend踏單車呀！

----------------------我第一次行catwalk，唔會有下次架啦！你過嚟支持下我啦！你同你啲friend再約囉！好嗎？                         
俊俊：
我哋都約咗好耐難得果日大家都得閒，你send相比我睇囉！

我無覆佢，因為我好唔開心

_____________________________________________________________________

到第二日，正式要行catwalk 嘅日子，我媽咪負責幫我化妝，冇幾耐，阿謙都到咗，我whatsapp佢叫佢嚟後台搵我哋

喺電視見到fashion show嘅節目，後台嘅人各有各自己嘅崗位，每個人面上掛上一面認真嘅樣子，要求完美嘅效果，

而且做事效率高，總係會帶比人緊張嘅感覺。但當時嘅我哋，所有

工作人員都唔係專業人士，model都只不過係又矮又冇身材嘅學生妹，相比真正嘅fashion show，簡直差天共地。

我有依種想法都係全靠阿謙為我錄嘅後台花絮而得出嚟嘅感覺個show完咗，靚相又影完，返到後台，原來阿J，阿寶，媽咪，阿謙已

經等緊我佢哋一見到我就好興奮咁行埋嚟

『頭先你好有自信呀！』『你好有魅力啊！』
『頭先最靚係你！』
『你頭先有無怯呀？』
頭先呢... 啱啱呢....點解呢.....

佢哋一輪咀咁問我搞到我都唔知應該搭邊個好

我：『haha ok la』

謙：『嗱！頭先幫你影咗好多相啦！』

我：『啊！多謝喎！點呀？頭先我表現成點先？』

謙：『唉，好可惜....仲以為你會仆低添』

我即刻回佢一副非常之不俏嘅眼神

媽：haha 好喇！快啲搞掂埋啲嘢我哋去食tea！

到咗夜晚，我send咗啲相比阿俊睇

俊俊：
幾靚吖！

－－－－－－－－你嘅女朋友我當然靚啦！

俊俊：
今個禮拜六不如我上嚟你屋企，我研究咗啲新菜式，幫我試下味

－－－－－－－－阿謙喺度喎，不如我去你屋企啦

俊俊：
唔得呀，果日屋企有人，唔緊要，叫埋佢一齊試

－－－－－－－－哦！好啦！