友愛的決擇: 第三章：澳門之旅

  ↵星期日，同屋企人飲茶，我永遠都係行得最快果個，快啲攞籌，快啲有位吖嘛

『hi！唔該4位吖！』

『咦！多咗一個人呀？』

『係呀！』

我同依個知客姐姐好熟，因為我阿媽好熱情，佢去到邊都會同人打交道



媽咪佢哋終於慢慢咁行到嚟

知客姐姐：『無見你哋一排喇喎』
一見到我阿媽，佢嘅笑容永遠都咁燦爛，原因係我阿媽新年時錯手比咗封100蚊嘅利是佢

媽：『haha 係呀！之前比較忙』

知客姐姐：『咦，你個仔呀？之前未見過嘅』

媽咪嘅表情變得十分興奮，隨即右手搭住阿謙右邊嘅膊頭



媽：『係呀！靚唔靚仔呀？』

依個時候阿謙顯得有啲尷尬

我：『咪玩啦媽咪！』

媽：『hoho，其實佢係我朋友個仔，佢會暫時同我哋住，所以佢都會同我哋一齊飲茶』

都係因為果100蚊利是嘅緣故，基本上我哋冇乜等過，好快就有位比我哋



媽：『謙謙呀，你鍾意食咩隨便叫啦，唔駛同auntie客氣架』

阿謙：『哦，好呀！』

我：『媽咪呀，我依個禮拜開始放Spring break喇，依個禮拜唔使返學』

媽：『係？謙謙，咁你呢？』

謙：『我都係』

媽：『oh Perfect！不如我哋搵日去澳門玩吖？喂daddy，好嗎？』

爸：『你哋去啦，公司好忙，行唔開』



媽：『謙謙，阿慧 你哋負責plan行程，我book房！』

阿謙：『嗯』

媽咪嘅心情超high，最搞笑係我同阿謙嘅反應都好平靜

我早就已經習慣咗媽咪嘅熱情，而阿謙可能比較緊張第一次同我哋去旅行

最後，我哋已經決定咗星期五出發，星期日返


咯，咯，咯

『阿謙？你得閒嗎？』



果日係星期二......

『ok呀，入嚟吖！』

『咦，你有嘢做呀？唔阻你啦，等陣再搵你啦！』

『啊，唔係呀，我搵緊去澳門有咩地方去炸嘛，jot down啲notes諗住遲啲同你傾』

『啱喇，我都係想搵你傾依樣嘢，你搵到咩地方呀？』

『我搵咗個網站，吃喝玩樂乜都有，我哋可以喺依個網揀』http://www.macautvl.com/

『幾好喎！』

傾咗3粒鐘，終於搞掂。夜晚嘅時候，媽咪返到屋企，我哋就同佢講咗我哋嘅plan，佢好滿意



，佢仲另外買埋水舞間嘅飛.....三日兩夜嘅行程變得非常豐富。果日媽咪比咗$50百佳禮券我哋，

叫我哋去買啲零食......就係咁,第二日我同阿謙落咗街去百佳買零食, 順便睇下有咩要買一次過買埋,

一去到百佳,我哋就即刻行去賣零食果行

謙 ：『你揀啦』

我望嚟望去都唔知揀咩好

我：『不如一人揀2款啦』

我同阿謙企咗喺度, 大家都無出聲, 大家都係上下左右咁望



過咗一陣....

我：『你鍾意食咩味嘅糖架?』

謙：『橙味』

跟住我就是但攞咗包橙味嘅糖...

謙：『你食開咩味嘅香口膠架』

我：『綠箭果隻』

佢跟住攞咗盒綠箭...

我：『你鐘唔鐘意食棉花糖架？』

謙：『鐘意呀！』

我就揀咗size最大嘅果包棉花糖...

謙：『咁你鍾唔鐘意食朱古力架？』

我：『都ok架』

佢就揀咗薄荷味嘅朱古力...

我哋就係咁嘅情況下每人揀咗2樣零食，情況真係有啲搞笑，因為成個過程我哋都無望住對

方，就好似對住啲零食自言自語咁。揀完之後，我同佢都笑咗一笑，我哋都好似諗緊同一樣

嘢，之後我哋就去俾錢lu

行到去出口，竟然比我撞到阿俊（冇錯，佢同我都係住喺馬鞍山），不過佢望唔到我，之後

我即刻走過去捉住佢隻手

我：『喂！』

俊：『嘩！嚇死人咩！』

我：『無膽鬼！係呢，你嚟百佳買咩呀？』

俊：『親友嚟咗屋企，所以我咪買啲飲品呀壽司呀返去攞』

依個時候，有個人行緊過嚟...

係喎！遺忘咗阿謙！

當我正想介紹阿謙比阿俊嘅時候，阿俊已經開咗聲

俊：『咦！你肯定係阿謙呢！』

謙：『啊，haha係呀，你好！』

我：『你點知佢係阿謙呀？』

俊：『見佢攞住袋嘢行埋嚟，肯定係識你兼同你住果個男仔喇，你話佢個樣都ok架嘛』

阿俊講完，阿謙塊面即刻紅咗，而且搞到我都好尷尬

我：『咩..咩呀？我..乜我有講過咩？..... 阿謙呀，不如你拎啲嘢返屋企先，我遲少少先返』

謙：『OK！冇問題！bye bye』

俊：『bye』

『點呀？你要買啲咩呀？』我一邊講，一邊繞住佢隻手

『我要買3盒壽司，買一箱汽水，買2銅薯片，仲有要買我平時食開果隻薄荷糖』

『嘩，咁多嘢你拎得到架喇？』

『無辦法啦！唔通落嚟再買過咩』

買買下，我就同佢講起後日去澳門嘅事

『後日我同媽咪，阿謙去澳門玩呀』

『咁正？咁我咪唔洗call你囉？等我去搵其他女仔陪我先』

『好呀！咁我哋係咁先啦』我扮嬲咗佢

諗住佢會氹返我，點知俾佢識穿咗

『yeah~我回復單身啦！！』

我即刻睥住佢！

『好啦好啦！BB，講笑啫，快啲行啦！仲要買汽水薯片架！』

買完，我幫佢拎住袋嘢去到佢屋企一半路程嘅時候，就比返佢拎，跟住自己返番屋企

星期五果日，陽光普照，啱晒去旅行嘅天氣！不過晨早7點要起身，執埋啲行李，

趕住搭9：30 果班船。

果時我仲未訓醒，出到廳，一邊合埋隻眼，一邊食早餐

因為我合埋咗隻眼，所以唔知點解摸來摸去都摸唔到個包

謙：『haha，你仲未訓醒呀？你個包喺度呀！』佢遞咗個包比我

我：『啊，唔該！』

媽：『要走喇！攞埋啲嘢上車食，唔係miss咗班船架啦！』

咁我就唯有一手攞住杯橙汁，一手拖住個喼，跟媽咪，阿謙落去停車場

我係媽咪個女，照計當然我坐車頭啦，正當我諗住開門嘅時候......

謙：『不如你坐後面啦，咁你咪可以成個身訓喺張座椅上恰一陣囉，唔係你今日冇精神玩架啦』

我媽咪用好溫柔嘅眼神望住阿謙

『吖，你真係細心....』

我：『係喎，唔該晒！』

心諗：真係咁大個女第一次遇到咁細心嘅男仔，如果佢係阿俊就好

泊完車，去到碼頭已經 9：20am

上到船，我哋嘅座位表係 媽咪空位 枱 我阿謙
媽咪話我同阿謙大家同年紀，坐埋一齊多啲交流下喎

不過交流嘅機會往後再搵機會啦，因為開咗船無幾耐我已經開始頭暈所以已經訓咗覺....

我哋出咗氹仔碼頭嘅出口，停咗係度，四周圍望下去威尼斯酒店嘅shuttle bus 喺邊

依個時候，阿謙攞咗佢部camera出嚟影

“早晨呀！我係謙仔！我嚟到澳門啦，今日陽光普照，但我陣間拍多旅程嘅嘢比.......”

媽：『咦！原來謙謙有拍片依個興趣架？ha～同我一樣！』

媽：『佢叫咩名呀，等我又subscribe佢先！』

我：『err...好似係叫him jai』

跟住我阿媽即刻走去阿謙隔離，我就慢慢行過去

媽：『謙謙，介唔介意join 埋auntie 呀？』

謙：『當然冇問題啦！』

之後佢哋以自拍嘅方式錄影緊

“Hi~大家好呀！我係嚟攝鏡架！”
“haha，今次係佢帶我嚟澳門架，我哋依家會去酒店check in！陣間見！”
“陣間見！byebye”
媽咪竟然做咗個飛吻嘅手勢.....

媽：『好嘢！出發！』

 依三日兩夜嘅行程當然好豐富啦，行街，大三巴，食葡國餐，睇水舞間...

媽咪仲幫我同謙謙影咗好多相，當然仲有拍片啦，最後我都俾我阿媽迫一齊拍，

就係咁，我相信我個樣好快就會公諸於世，真係可悲....

果刻當然希望可以拍得我靚啲啦haha

回程果日，又係咁，唔使多講，一樣喺船上訓足全程

返到屋企，我即刻搶住第一個沖涼。

爸：『點呀？澳門好玩嗎？』

謙：『嗯！水舞間超正！仲有好多好味嘅嘢食』

媽：『haha，daddy你唔去真係可惜lu，我哋仲影咗好多相添。謙謙呀，陣間阿慧沖完你去沖吖，沖完睇相』

謙：『哦，好呀！』

我沖完涼，即刻whatsapp阿俊，話俾佢知我返咗嚟

－－－－－－－－－阿俊，我返到啦！有無掛住我先？ 8：01pm

俊俊：
有....掛 haha  8：28pm

－－－－－－－－－乜你咁耐先覆我架，打緊機呀？8：29pm

俊俊：同緊女神傾緊計呀！

－－－－－－－－－頂你！邊個女神咁巴閉呀！連自己個女朋友都唔理！

俊俊：
你未來奶奶呀！啱啱比佢話完我間房好臭又好亂喎，之後又鵝咗勁耐！

－－－－－－－－－haha，你啲俊俊味！

媽：『阿慧！謙謙！出嚟睇相喇！』

－－－－－－－－－唔同你講啦！出廳睇相！bye

媽：『嚟嚟嚟！開始啦！』

爸：『嘩，水舞間好似好好睇咁喎！』

媽：『係呀！你無去睇真係可惜！』

我：『嘩，媽咪！依張你影到我咁核突架！』

媽：『我冇影過依張喎！』

我即刻睥住阿謙！點知佢係到奸笑！隨即我打咗佢一下！

之後睇到一張笑死我！果日食早餐，諗住偷影阿謙食嘢個樣，點知比我影到佢擘大個口準備
食嘢個樣，我即刻對住阿謙大笑！



謙：『打和囉！』

媽：『haha，你哋真搞笑！』

我：『都好似差唔多喇喎！之後果啲都係食物相嚟嘅，唔睇啦！我返房！』

媽：『咪咁急住啦！睇埋先！好戲在後頭呀！』

謙：『乜我哋仲有影人照咩？』

媽：『呵呵！睇埋先啦！』



我：『嘩！』 謙：『嘩！』 爸：『嘩！』

媽：『haha！都話好戲在後頭架啦！』

我：『媽咪呀！你有冇搞錯呀！影埋啲咁嘅相！』我細細聲同媽咪講

我望下阿謙，佢dup低咗頭，無出到聲，睇落超尷尬....

只有媽咪喺度傻笑

我無佢咁好氣，即刻飆入房上高登睇故