《等那一天我們在操場上接吻》（2025新版）: 答案
51 答案
范震升推開那座小教堂的門。學校旁邊小徑走進去的那座小教堂。
教堂裡空無一人，明淨的陽光注滿了室內，灰白色的地版與牆身像乾涸了的海床。
聖壇，壁畫，彩色玻璃，燒了一半的蠟燭。范震升隨便選了一個位置坐下來，離開的人，像把時間的流動也帶走了。
范震升閉上眼，試著默禱，他記得各種語言或時代的經文，但他卻無法做到真正的祈禱。
他並無意把自己僅存的情感，投放於俗世以外。
范震升身後傳來腳步聲，他回頭看去，程芳靈進來關上教堂的門。
「會長、我、我……我睇過周邊……無、無見到其他人。」
范震升輕拍他身邊的位置，示意程芳靈坐下來：「咁係好事。」
程芳靈握緊手機，她跟范震升剛才在圖書館外，看完許愛悠舞蹈演出的直播，范震升突然就拉著程芳靈，要趕來教堂裡。
當兩人來到的時候，教堂卻空無一人。
「你到底……要搵邊個？」程芳靈問道。
范震升只是握起程芳靈的手，像虔誠的信徒般說：「如果世上再無罪人，就唔需要有教堂。」
█
許愛悠回頭看去，雙手掩起嘴巴。
她千思萬想，也絕無想到她會在這裡現身。
「小弦……！？」許愛悠驚訝輕呼。
殷詠弦穿著雪白無瑕的修道服，從眾多舞蹈社社員的身後步出，手中握住兩張紙張。
楊希曦也再無法運用她端莊的微笑，而是靜靜皺起眉頭。
殷詠弦臉上平靜如昔，有如她每一次禱告，每一次懺悔，每一次期盼贖罪與赦免。
「頭先妳睇到嘅表演，」殷詠弦說「並唔係嚟自舞蹈社。」
「咩話……？」楊希曦瞇起雙眼。
「妳眼前見到嘅所有舞蹈員，係一個鐘前，已經加入咗『真理研究社』，佢地全部唔係舞蹈社嘅成員。」
許愛悠雙手掩住嘴巴，不斷倒抽涼氣，再一次忍不住眼角的淚水，但相比她剛才在舞台上不自覺的熱淚，這是她真正發自內心的淚水，就像在鄉間裡，靠在阿北胸前時的淚水。
殷詠弦揚起手中的申請書，那是所有演出的舞蹈社成員，加入真理研究社的申請書，簽署人是社長殷詠弦本人。
「妳……！」楊希曦忍住抖動的眉頭，但又挽起微笑說：「但妳同許愛悠一樣有禁令在身！就算係真理研究社，一樣要受處分──」
「所以我亦同時解散咗真理研究社。」
殷詠弦舉起第二張申請書，楊希曦嘴唇打戰，露出難以置信的驚愕：「妳，妳、妳、到底……」
「頭先嘅表演，全部都係所有人自發性，既唔屬於舞蹈社，亦唔屬於真理研究社。學校講過，我同許愛悠，禁止『參加社團校內或校外所有活動、會議、訓練』，只要唔係社團組織嘅，就無問題啦，係咪？By the way，依件修道服真係我自己俾錢買嘅，所以應該唔計。」
殷詠弦手掌鬆開，兩張申請書如雪片滑落到後台的地上，楊希曦趕前低頭凝看。
那上面是學生會的蓋印，時間約莫是一個半小時前。
「尤天勇……？」
楊希曦想起他剛才於暗處裡的微笑。你最後還是選擇放過許愛悠──
「今次唔關阿勇事，係我嘅意思。唔，大概都係嘅，我地一齊咁耐，佢點諗我好難唔知。」
楊希曦抬頭一望，卻是坐在最角落椅子上的 Mimi。
對了。楊希曦瞬間明白到。Mimi 是秘書，她處理過所有場地申請的文件，她借尤天勇之手安排針對許愛悠的計劃，Mimi 也一樣知道。
Mimi 望向正兀自掩嘴抽泣的許愛悠，帶著得意驕傲的微笑：「師姐，六年嚟我一直想超越妳，我諗我今次真係做到。哼。」
許愛悠終於明暸一切後，她第一件要做的事情是──
「嘩！！！小弦！！！哈哈哈哈哈哈小弦！！！！我愛妳我愛妳我愛妳我愛妳我愛妳我愛妳我愛妳呀我愛妳呀！！哈哈哈哈哈哈哈！！」
許愛悠衝前緊抱殷詠弦，她涕泗滂沱的臉狂吻著殷詠弦的臉與嘴唇。
「等、等陣先，小悠，妳咁樣，咁多人又見到、又會──嘩，妳啲口水──」
「我唔理呀我唔理呀我唔理呀我唔理呀我唔理呀我唔理呀痴線嫁，哈哈哈哈，理得佢地啦吔屎啦佢地！！！我愛妳呀小弦，我好愛好愛妳呀！！！哈哈哈哈其他人食屎啦！！哈哈哈哈哈哈哈哈小弦小弦小弦小弦小弦小弦小弦小弦！！！！！」
殷詠弦無可奈可地笑著搖頭，抱住許愛悠亂跳亂叫像快要傾倒的身體，任由她對自己又親又吻。
這一次，她終於可以甘心情願抱住她了。
█
『我愛你。真係嫁，我真係好愛好愛你，你要信我呀打靶仔，哈哈』
「嘩，你仲睇緊？你要睇 loop 多次呀？」
宋紀彤從大學的茶座亭裡，買來雜誌以及兩杯水果冰茶，一杯給林之年，一杯給自己。
林之年沒有理會宋紀彤的挖苦，又再拉動時間軸，將許愛悠表演後在台上的發言看了又看。
『我愛你。真係嫁，我真係好愛好愛你，你要信我呀打靶仔，哈哈』
宋紀彤看著完全入神的林之年，沒好氣地搖著頭，只是喝了一口冰茶，用茶液消解身心的暑氣，打開手中新買《Astronomy》。
「我同小悠拍咗咁耐拖……」林之年終於說，但仍然看著屏幕「我從來無見過佢依個表情，用依個語氣，去講一句『我愛你』……」
「人地有新男朋友喇……應該。」宋紀彤翻動雜誌的彩圖，笑著道「你死咗條心啦。」
「痴線！」林之年笑著罵道「我死咗心好耐，但我向來都係愛悠BB粉絲團成員，不論我同佢係咪情侶。喂，我都係男人，鍾意睇有魅力嘅女仔好正常姐。妳咁多女朋友，夠鍾意鄭雪蕾啦。」
面對林之年的反詰，宋紀彤用意味深長的眼神說：「我就好老實，我鍾意雪蕾BB個外型嘅姐。」
林之年也搖了搖頭，又再重播起許愛悠最後的告白。
『我愛你。真係嫁，我真係好愛好愛你，你要信我呀打靶仔，哈哈』
──我等妳黎搵我，小悠，仲有阿勇。
█
禮堂的社團表演結束後，觀眾陸續魚貫離場，學生也好，家長也好，每個人都似乎意猶未盡，特別最後一段壓軸的舞蹈演出，成為了每個人津津樂道的話題，走廊間駐足著在離場後仍在攀談，說笑及閒聊的人群。
在人群之間，楊希曦一個人站走廊的圍欄前，沉默不語。
「喂。」
楊希曦轉頭望去，是身材矮小的鄭雪蕾，她似乎稍為了補了點妝，眼角猶有點不自然。
楊希曦倒是再沒有微笑的力氣，只是說：「恭喜妳喇師妹，有許愛悠加持，妳依家應該贏硬。」
現在許愛悠因為殷詠弦的緣故而規避了處分，那阿北就再無弱點，而鄭雪蕾亦可以心無旁鶩地參選。
鄭雪蕾也將雙手放在欄杆上：「唔知嫁，今日演出咁成功，名義上負責嘅，始終都係妳，可能都係入妳數。我要首輪過半數先穩贏，都未必。」
楊希曦不置可否地說：「其實當日都係尤天勇嚟拜托我，叫我參加會長選舉，佢話有信心我一定會贏。諗諗下，會長都唔知有乜好做，我都唔應該搵野煩我自己。」
「就算我推動許愛悠版本嘅校規修訂，重新審議妳細佬嘅接吻事件，賦予更多自主權俾學生，妳都無所謂？」
楊希曦望向前方人群熱絡的操場，緊握欄杆沒有說話。
「我……」鄭雪蕾清了清喉嚨說「我唔鍾意受人操縱，亦唔鍾意欠人人情。許愛悠佢灌票俾我，不論佢之後點，我都需要還番個人情俾佢，亦當係……了咗佢個心願啦。」
楊希曦望向鄭雪蕾，不覺有點好笑：「妳竟然會去求人，仲竟然係因為許愛悠，嚟求我。」
鄭雪蕾忍住不露出厭惡的表情，只是淡然地說：「我唔係求妳，而係依件事對妳都有好處。既然我地雙方無一方係穩贏，我地故且試下公平競爭。」
楊希曦抬頭想著：「啊，原來阿北佢……從第一日搞校園電視台，都只係一個用嚟交換嘅條件？」
鄭雪蕾用指頭捲起髮梢：「校規修訂動議就算過到聯席會議表決，都要再經過全校公投，要80％先通過，或者到時會被否決呢？」
楊希曦悠長地吁了口氣說；「或者我當日唔應該係 Mimi 手上救妳。」
鄭雪蕾卻爆發一連串仰天的大笑，笑得楊希曦對她投以冷眼。
「哈哈哈哈！算啦，妖，哈哈，依家 Mimi 救咗許愛悠，變相都還咗俾我。哈哈哈，妳唔鍾意嘅，即刻掟我落樓囉。」
楊希曦露出聽見完全不好笑的冷笑話的表情，只是說：「下次開會見。」
「到時見。」鄭雪蕾說。
楊希曦轉身，隱入走廊的人群當中。
█
「好啦，小悠，唔好再錫啦、哎呀……」
兩人離開禮堂走到操場外後，許愛悠仍像樹熊一樣抱住殷詠弦，繼續一直親吻她的臉頰。
「我唔理妳呀，妳一定要俾我錫番夠本。」
許愛悠幾乎把整個整個身體都靠向殷詠弦，殷詠弦笑著拖起腳步，又說：
「對唔住呀……小悠。」
「嗯？做咩呀？」許愛悠把頭埋在殷詠弦的頸間。
「果日……其實係我偷拍我地兩個接吻，係我將張啲相放上網。當我聖誕晚會果陣見到妳同阿北跳舞，我就好唔甘心……我好想至少佔有妳一次。我、我唔會推卸責任，係我對妳唔住……」
其實許愛悠大致已經猜到真相，但她只是搖頭，溫婉地說：「唔緊要啦，妳今日都英雄救美啦，係咪。反而係我累妳……無咗真理研究社。」
殷詠弦也搖頭說：「我本身都想解散咗佢啦，反正我覺得自己無咁嘅資格去擔任社長，二嚟係……我開始覺得信仰又好，信念又好，有無一個社團都係無分別。」
「小弦。」
許愛悠站正身體，握起殷詠弦的雙手。
「係？」殷詠弦也正眼看著許愛悠。
「正如我好多年前已經同妳講過，」許愛悠說「信仰嘅野我唔知咁多……但係，信我呀小弦。今日嘅妳，絕對有資格為任何人禱告，絕對有資格去祝福同埋關心任何人。我今日得到妳關懷同原諒，用妳地嘅講法……我應該要『感恩』？」
「哈哈，」殷詠弦牽緊許愛悠的手心「唔淨係我，成件事都係 Mimi 嘅構想。佢一日突然嚟教堂搵我，要我幫忙做兩件事。我問，點解佢要咁做，佢話：『當妳有能力去救一個人嘅時候，妳先係真真正正咁贏咗佢。』」
許愛悠發出像是自嘲又是歡快的笑聲，想起陸運會場上，那誓死要跑過自己的 Mimi。
「Mimi 佢都大個囡啦，正衰妹。」
「好啦，行啦，佢仲係校門口等緊妳呀，我應承咗佢，要帶妳過去搵佢。」
許愛悠失笑說：「吓哈？妳應承咗個打靶仔啲咩呀？」
「我頭先同佢講。咦，小悠──？」
許愛悠沒等殷詠弦說完，卻突然拖著她往反方向走：「啊！小弦，我爭啲唔記得咗一個人！唔好理阿北住，佢等下唔洗死嘅，妳陪我過嚟先。」
「吓？」殷詠弦先是驚訝，突然又有似曾相識的親切感，這是她熟悉的、那奔放率性的許愛悠「邊個呀？」
許愛悠沒有回答，只是牽著殷詠弦急步往前。殷詠弦只得跟上，卻發現許愛悠正往學校的後門步去。
終於許愛悠來到後門，若干參觀者與學校正緩步離開，門旁是兩隊站崗的男童軍。
「何子晉！」
在眾多男童軍當中，長得最高的那人回過頭來，他穿著畢挺的童軍服，一塵不染的皮鞋，別著耀眼勳章的軍帽。
「許愛悠……？」
何子晉望向許愛悠，她雙眼通紅穿著舞衣，臉容有點髒亂，正牽著穿著修道服的殷詠弦。
許愛悠向殷詠弦點了點頭，然後放開她的手，往何子晉步去。
何子晉雙手負後，維持著筆直的站姿。許愛悠一步一步向他走來，來到他的面前。
「我好多謝……」許愛悠垂著眼簾說「我好多謝……你一直以嚟鍾意咗我咁耐，但係，對唔住，何子晉。我無辦法去回應你對我嘅感情……我無辦法留係你身邊，因為我……我真心鍾意嘅，係另一個人。可能……我咁講好殘忍，但我諗你要明白，我從來都……唔可能去鍾意你。」
█
步操只能一個人去訓練。
跑道上，操場上，空地上，停車場上，走廊上，山徑上。
原地踏步。向前踏步。轉身踏步。敬禮踏步。
停步。
左右腳的速度，手臂揮動的幅度，眼神的角度，敬禮時間點的準確度。
沒有人可以告訴你答案，你只能一個人，不斷踏步，不斷停步。
烈日之下，暴雨之下。酷暑。寒冬。
他都只是一個人。
「啊……」
何子晉聽見許愛悠的告白，他終於明白了。
他並不是一直在追求答案，而是他一直在逃避，這一切事物根本沒有答案。
紀律。榮譽。秩序。地位。
愛。
這皆非真正的答案，而是答案從一開始就不存在，只是他透過不斷的行進與追求，透過刻苦與忍受，逃避最終無可避免的否定。
無論再困苦，他也不想放棄，因為放棄了，就無法再逃避。
「許愛悠……」何子晉緩緩地說，軍帽的前緣始終遮蓋他的雙眼。
「係。」許愛悠抬起認真傾聽的臉。
「我真係好鍾意妳。」何子晉說「從一年級我第一眼見到妳開始，我就覺得妳係要我等嘅人。一直以嚟，我去搵妳叫咩名，妳係咩班別，妳係咩社團，妳做緊啲咩，我都係有希望……終於有一日，我可以真真正正、正正式式咁樣同妳講：我鍾意妳，而妳會有一個答案俾我，會認同我嘅想法。」
許愛悠稍一點頭，她知道她今天已經哭得太多，但眼裡還是再次泛起流動的熱淚：
「我知道，我好對唔住。我應該一早就俾答案你，而唔係利用你，唔係去借你男童軍嘅勢力去……去做我自己想做嘅野。」
「我承認，我有對妳失望過，」何子晉低頭說「但上學期係我幫助妳嘅過程入面，仍然係我依六年過得最踏實嘅一段時間，或者只係錯覺，但我終於覺得，我六年嚟時間唔係白過，唔係一無意義。」
許愛悠抿住嘴唇，用乾啞的聲線說：「我唔認為係一無意義，我唔知你嘅經歷，我亦好遺憾，我本人俾唔到你想要嘅解答俾你。但我相信終有一日，你會搵到你想做嘅野，你會知道有啲咩，係你無論如何都真正想做。」
何子晉總是嚴肅得近乎笨拙的臉上，終於帶起一絲微笑說：「妳應該一早同我咁講，我可以去鍾意過第二個，然後再俾其他女仔笑我戇居。」
許愛悠還是搖頭：「唔會嫁。當你搵到你想做嘅野，你就會搵到，點都一定會留係你身邊嘅人。」
何子晉循著許愛悠的視線，望向站在後方的殷詠弦。
「不過，可能我就係咁上下蠢，」何子晉說「俾我再揀多次，我仍然會鍾意妳，我仍然會妄想，只要追到妳，就可以肯定我相信嘅一切。」
「我明呀，」許愛悠倒也笑說「我何嘗又唔係同你一樣咁蠢，俾我揀多次，我都係會好似依家咁，搞到世界大亂，煩到身邊每一個人。」
許愛悠與何子晉相視而笑，何子晉伸出手：「好高興認識妳，許愛悠。」
「我都係，好高興認識你，何子晉。」
兩人執手相握，然後放開，許愛悠再一次對何子晉點頭，轉身離開回到殷詠弦身邊。
「Attention！」
突然，許愛悠聽見身後傳來何子晉雄壯的號令。
她回身一望，卻見是何子晉站在最前方，身後兩隊童軍的小隊聽見他的施令，馬上到他身後整齊列陣。
何子晉挺腰收腹，收歛臉龐，雙手垂正，全身剛直，沒有一絲動搖。
「Saluting！」何子晉號叫「Salute to the front──」
何子晉與所有童軍舉起手，那冷峻的軍儀，聽起來卻像一陣夏日涼颯的風。
「Salute！」
何子晉向面前的許愛悠敬禮。從他加入男童軍第一天開始，似乎就在等這一天。
許愛悠破涕為笑，傻氣地笑得樂不可支，也馬上用拙劣的姿勢立正，舉手揮往額旁，向何子晉敬禮。
█
──點解你唔入去睇佢表演？
──因為我、我……已經做唔到任何野，佢已經決定咗。
──點解你唔說服佢唔好咁做？你唔係一直係佢身邊咩？
──正因為咁，我先唔可以阻佢。依件事佢真係想做。
──就算之後，佢再次被訓導組處分？
──佢一早知道，我唔會出賣鄭雪蕾；佢一早就希望，我放棄幫佢推校規修訂，依個係佢可以放過自己嘅方式。
──哈，佢真係好任性。
──由始至終都係。
──難怪我同你一樣，都咁愛佢。
阿北坐在校門口的階梯上，看著逐漸疏落離場的參觀者。
他已收起手機，默默地等待著。
終於，他看見了那兩個手牽著手的身影。
許愛悠與殷詠弦，從校舍的旁邊往他走來。
阿北站起，大概相距約有五六步的距離，殷詠弦跟許愛悠說些了什麼，兩人點頭擁抱。
殷詠弦放開手，讓許愛悠獨自往阿北走去。
殷詠弦只向阿北點頭微笑，然後無聲轉身離開。
許愛悠來到阿北身前，抬起笑臉，說道：
「嘿嘿，等咗好耐呢？」
阿北捧起許愛悠的臉，抹起她臉上一片狼藉的髒污：
「無啦，話咗等妳嫁嘛。嘩，睇妳個樣，喊到呢。」
許愛悠笑意盈盈地說：「喂，本小姐學生生涯壓軸演出﹐仲要大成功喎﹐係咁上下啦，咦，等陣，你對眼，你都有喊呀？」
「痴線！無！」阿北立刻別開頭。
「你唔好扮野，快啲，俾我望下～！」
許愛悠抓緊阿北的手臂，死要望向他的眼角，阿北卻死命抬起頭，
「無，真係無！屌妳唔好搞──！」
許愛悠硬擠向阿北的身上，阿北只抱住她的腰躲開眼，雙眼快要與天空完全平行。
「唔係呢，快啦～！哈哈！你睇住仆親呀！」
兩人一邊打鬧一邊相擁，踉踉蹌蹌的腳步之間，卻始終緊抱著對方。