《等那一天我們在操場上接吻》（2025新版）: 我們
58 我們
原來是這種味道。
當我們的故事暫時劃上句號。當我們的約定終於實現。
當世界始終沒有因為我們而改變。當我們仍然身處在這不完美的世界裡。
當我們仍然願意去相吻的時候。
操場外整個校園爆發出各種喧嘩，讚嘆，鼓掌，叫囂，歡呼。
阿北與許愛悠，稍為離開對方的嘴唇。
兩人相視而笑，又環顧起整所哄動的校園，眾多穿著白色校服圍觀的學生們。
「一年睇兩次，」阿北說著「今年返學真抵到爛啦。」
「咪住，」許愛悠卻正色說「點為之『一次』先，楊希杰同方潔海，果度起碼『幾十次』喎。」
「有無呀？」阿北錯愕道「俾盡咪『十幾次』。」
然後，阿北與許愛悠又繼續相吻，校園再次爆發出熱烈的歡呼與激掌，各種吵鬧像一片豐饒燥動的海洋。
直到兩人又再放開，許愛悠微笑說：「咁依家點呀？」
「咁我地咪正式拍拖囉。」阿北說。
「吓！」許愛悠瞪大凝怔的雙眼「乜之前唔係嫁咩？」
「吓！」阿北也睜大眼晴說「之前妳都無話係。如果之前都計，咁第一日係幾時開始計呀？」
許愛悠瞇起眼晴歪起嘴，想著說：「咁你都岩嘅，拍拖無記念日又好似差咁啲。」
「許愛悠。」阿北握緊她的雙手說。
「係。」許愛悠像立正般說「響度。」
「妳可唔可以做我女朋友──嘩，原來妳真係會臉紅。」
「妖！」許愛悠羞笑著揮打阿北「我點都係女仔嚟嫁，生理反應，okay？」
「好啦，咁最後答案。」阿北抱緊許愛悠。
許愛悠深吸了一口氣說：「你真係想同我一齊？」
「嗯，」阿北點頭說「我希望我地可以繼續一齊。」
許愛悠握起阿北的手掌，再次扣緊他的指間。
「阿北。我唔係要去試探你定係乜野……」許愛悠用沉緩的語氣說「而係，我同你經歷依一年嘅野，確實係因為我嘅任性，我嘅一啲衝動，一啲執著，甚至不切實際嘅幻想去做出嚟。我絕對唔會忘記，你陪我經歷嘅依一切，亦唔會忘記你係我身邊嘅時候，我有幾咁快樂。亦唔會懷疑你有幾鍾意我。但係……但係，我相信我仲要啲時間，去睇清楚我自己，到底我想做嘅野，想去爭取嘅野，想去改變嘅野。即使離開咗學校之後，離開咗依個操場之後，係咪都仲係一樣。依個過程入面，我可能、我可能未必會一直留係你身邊，呼……」
阿北抱起許愛悠，許愛悠也靠在他的肩上，閉上眼呼吸著兩人之間的空氣。
「如果妳最後發現，妳想要嘅野，同過去依一年或者依家唔同呢？」阿北在許愛悠耳邊說。
「不論結果係點，」許愛悠在阿北耳邊說「我都一定會話俾你知，一定會番嚟你身邊。我係你女朋友嚟嫁嘛，只要我地仍然係我地，我地一定會再見。」
阿北故作驚訝地看著她的臉：「吓，妳頭先講到咁，我以為妳 say no。」
「吓，」許愛悠甜笑著說「我無話過唔 say yes 喎。」
「既然係咁，」阿北也呼了口氣說「我都答應妳，作為妳男朋友，我一定會等妳，一定唔會放過妳。不論妳去到幾遠，不論妳又咩新想法，不論想或唔想再『拯救世界』，我都一定會等妳。可能無咗妳係我身邊，我又係會自己一個匿埋屋企睇電視，一個人漫無目的對所有野都無興趣，但我亦一樣唔會忘記妳帶俾我嘅所有野，由萬聖節嘅時候，到聖誕節嘅時候，到妳整俾我食嘅每一樣野食，妳帶俾我嘅每一次感動同埋快樂，妳帶俾我嘅每一種改變──仲有今日，依一日我地兩個企係依度，操場嘅正中心，就係依一瞬間，我永遠永遠都唔會忘記。」
許愛悠張開雙臂展露美妙的笑容，阿北也再次與她相擁。
他們都感受到，這不只是男女之間情愛的擁抱，而是真真正正來自純粹的欣賞與祝福，懷抱希望與期盼的相擁。
「或者，」許愛悠抱著阿北的背，閉著眼說「到我真正唔會再亂咁走、會永遠留你身邊嘅時候，個世界可能已經變曬。」
「或者會嫁，」阿北吻起許愛悠溫熱的額頭「但我對妳有信心，妳永遠都會係許愛悠。我最愛嘅許大小姐。」
「我都對你有信心。」許愛悠張開眼「你永遠都我最愛嘅打靶仔，死仔北。」
阿北與許愛悠望向校園的人們，每一個年級、每一個班別、每一個社團、每一個位置的學生們。
每個人、每位男女，每一種的氣質、情緒、姿態。每一份的快樂、孤獨、悲傷。那狂呼雀躍的林強、那高傲霸道的鄭雪蕾、那乖順忠誠的郭允箏、那冷峻深邃的范震升、那純真怕生的程芳靈、那嚴謹內歛的何子晉、那老練成熟的尤天勇、那自律穩重的莊繞盈、那虔誠深情的殷詠弦，那溫柔體貼的傅恩薇、那端莊聰慧的楊希曦。
還有更多、更多，曾經經歷這一年的每一個人。
到下次再見的時候，我們會否仍能真心不變。
我們，能否仍是我們。
「喂。」許愛悠回頭過來，拉了拉阿北的手。
「嗯？」阿北望向許愛悠。
「還掂都係，咀多陣先啦。」
「好呀。」
耀目的陽光之下，他與她，阿北與許愛悠，仍然在操場上接吻。
█