萬年議題，隨心寫: 現在學生的壓力，比以前大了，還是小了？
網上常見唔少人話，香港嘅學生、小朋友，一代比一代痛苦同大壓力，尤其小學全面全日制令課時大增，又有TSA。以前小學半日制、冇 TSA，就係天堂咁嘅幸福童年。
亦有人認為，相比以前，而家做學生係好幸福，以前點樣點樣更辛苦更大壓力云云。
相比以前，而家嘅學生、小朋友，壓力係大咗、定係細咗？
呢個問題冇得答，畢竟冇人嘅兒童及青少年時期可以跨越幾十年，去親身體驗同比較，只可以根據有限嘅數據同個人觀察去比較。個人粗略觀察所得（「以前」主要指80至90年代）：
－－－－－－－－－－－－－－－－－－－－－－－－－－
1.小學操練
以前：學能測驗(注意，唔係學「科」測驗，呢兩者常見混淆）（1978 - 1999），再久遠就中學入學試（1962 - 1977）、小學會考（1949 - 1961），全部會影響中學讀邊間、甚至有冇得讀。半個世紀亦係一代又一代默默挨過，唔見鬧出大風波。
而家： TSA，傳媒、考評局已 N次指出：TSA唔對學生作個人評分、唔影響學生前途，只計算全校整體成績供教育局內部參考，反而搞到咁多爭議咁多反對聲音，要求改善甚至取消，點解呢？
－－－－－－－－－－－－－－－－－－－－－－－－－－
2.小學主科
以前：6科，中英數，社會，科學，健教。
而家：4科，中英數，常識(1996 - 2025)。5科，中英數，科學，人文(2025/26學年起分階段推行)。
如果全部科目達到某成績，就有獎勵或唔使罰，以前過6關，而家過5關(1996 - 2025係4關)，邊個易呢？
－－－－－－－－－－－－－－－－－－－－－－－－－－
3.小學默書
以前：全世界一樣，一星期兩次，中英各一。
而家：從多間小學官網及一些網上家長論壇的普遍觀察所見，似乎只有極少數小學仍是一星期兩次，常見是一星期一次、一個月兩次。
－－－－－－－－－－－－－－－－－－－－－－－－－－
4.小學學制
以前：半日制
而家：全日制
所以，以前就係大把課餘時間任玩任睇卡通嘅天堂幸福童年，而家就慘絕人寰，係咪？某些人總係拎呢點嚟無限放大，但呢D人永遠唔會講：
- 如「3.小學默書」所述，以前默書頻密，半日制掛名多咗嘅課餘時間，往往係畀準備默書佔據。
- 星期六長週，呢個半日制代價兼怪胎，最痴線係下午班星期六都要倒塔咁早返，對於唔慣早起嘅下午班小學生，絕對係折磨，遇寒冷天氣更甚，仲有星期五傍晚放學、到星期六晨早返學，「追更」式嘅緊逼時間。仲仲有升中後面對全日制，初期適應亦係痛苦。
- 小五全年同小六上學期，仲有加操學能測驗。
- 呢條片必睇：輝煌豐盛嘅80年代，享用小學半日制、冇TSA、大把玩樂時間嘅天堂幸福童年，到底係點？當時港英政府旗下，公信力極佳嘅傳媒香港電台王牌節目《鏗鏘集》話你知----
不快樂的小學生(1986)
https://rumble.com/v706y8u--15.6.1986.html
留意18:00(可見1986年時一名小學生被家長體罰，小腿上的藤條痕)，畀著而家，仲唔報警報社署？
因此，所謂半日制「天堂」，尤其對下午班而言，只不過是犧牲了一半的HAPPY FRIDAY和星期六、打亂了生理時鐘、並被準備默書和操練學能測驗填滿的假象，並不比全日制輕鬆。
半日制最大亦可能係唯一真實好處，或許只剩下午餐那一頓安樂茶飯，可以喺屋企享用媽媽嘅廚藝，唔使挨監獄式飯盒。
－－－－－－－－－－－－－－－－－－－－－－－－－－
5.中學關卡
以前：三鑊：中三淘汰、中五會考、中七 A-Level。
大多數日校中學，中一至三各有6班（甚至更多），中四五只有各4班，完咗中三，會淘汰最少1/3人。
中五會考放榜後，升中六嘅玩法，絕對刺激好玩 Amazing：全港性大洗牌，可能要搶的士撲中六位、新聞連續幾日提著「中六收生程序進入第X階段，剩餘中六學額幾多⋯⋯」，只有約30%會考生可升中六。
就算升到中六，都唔好以為一勞永逸、過咗海就係神仙，短短一年多D之後，就嚟鼎鼎大名、全球數一數二地獄級反人類難度嘅 A-Level。
仲有，某些大學，例如中大，相當睇重會考，如果會考個別科目失手，就算如有神助，喺 A-Level 表現突出，亦可能無法彌補，註定同呢D大學無緣。
而家：一鑊 DSE 一炮過，冇中三淘汰、冇搶的士撲學校嘅荒謬畸形現象、冇投考大學要睇兩個公開試成績、冇地獄級反人類難度A-Level。
－－－－－－－－－－－－－－－－－－－－－－－－－－
6.公開試競爭
以前：會考，最少103,047人（1978年），最多172,321人（1983年）（唔計只供重讀嘅2011年終極會考）（1977年及之前數據從缺）。
留意，如前述，以往普遍存在中三淘汰，如果冇呢關，會考肯定仲多人。亦因為呢關，令到墊底嘅最少1/3人中三止步，冇得參加會考將條curve 拉低，變相增加會考難度。
而家：DSE，最少47,891人（2022年），最多81,355人（2013年）。
然後，而家讀書競爭，大過以前？？？
資料來源：考評局官網，1978至2024年數據。
－－－－－－－－－－－－－－－－－－－－－－－－－－
7.公開試「死亡之科」中文科
以前：(呢度只講1993 - 2006)會考，一年半時間，讀26篇範文(實際上32篇，因部分詩和詞合輯成1篇範文計算)，平均一年讀17.33篇(實際上21.3篇)，有鼎鼎大名嘅怪獸文章《陳蕾士》。仲未計 A-Level 中國語言及文化。又係多年都唔見引起咩大爭議。
而家： DSE ，兩年半時間，讀12篇範文(實際上16篇，原因同上)，平均一年讀4.8篇(實際上6.4篇)，只有以前(21.3篇)嘅約30%，未聞有類似《陳蕾士》咁嘅怪獸文章，有篇《岳陽樓記》更係以前中二就要讀，反出現咁多爭議指係「死亡之科」？
－－－－－－－－－－－－－－－－－－－－－－－－－－
8.假期
以前有，而家冇：英女王壽辰、孫中山壽辰、英聯邦日，注意後兩者非紅日，係咪放假視乎個別校政，但如撞到星期六日，冇補假（或許極個別學校有）。
8月暑假當中，有兩日紅日「重光紀念日」，形同虛設，年年必蝕，搵笨。冇暴雨警告制度，除非8號波(或以上)，否則水浸都冇停課呢回事。而且以前秋颱好罕見，8號波幾乎暑假限定，即係又係形同虛設。
而家有，以前冇：教師發展日（1至3日，視乎校政，教師發展日已知1999/2000學年先開始有）、5月1號、佛誕、7月1號、10月1號、隔年有嘅選舉翌日假。再冇同暑假重疊嘅搵笨紅日。
好彩嘅話，仲有紅黑雨假。近年秋颱增加，風假機會增加。例如2023年9月至2025年9月，淨計呢3個學年嘅開頭，已經9日風雨假（23年4日、24年2日、25年3日。以前？幾年未必有1日，成個學生時代加埋，都未必有9日）。
以前定而家假期多？好明顯啦！
－－－－－－－－－－－－－－－－－－－－－－－－－－
9.放完暑假
以前：開學禮翌日(通常9月2號)已經正式硬食 full schedule。
而家：要時間適應吓，9月頭一至兩星期，要半日制、早D放學。
這一看似微小的安排，實則體現了教育觀念的進步——從過往要求學生單方面適應學校的鐵板一塊，到現在學校願意主動配合學生的心理節奏，給予過渡和緩衝。
－－－－－－－－－－－－－－－－－－－－－－－－－－
10.家教
以前：家家戶戶（尤其公屋）打仔女打到開巷，冇人認為有問題，視作正常家教。畀老豆老母藤條無雙亂舞（藤條已經算低武力），再成手成腳藤條痕，返學畀人睇到、被恥笑（變相雙重懲罰），係家常便飯、甚至係必經過程。
而家：新世代分分鐘唔知藤條為何物，打一下手板一條藤條痕，已經又報警又報社署，最大懲罰，可能係冇iPhone冇iPad 玩。
－－－－－－－－－－－－－－－－－－－－－－－－－－
11.師權
以前：老師大晒，師權龐大，絕對權威，冇正式投訴機制，莫講學生，連家長都怕佢哋（除非黑底、或家長係學校高層或大捐款人，或係咩達官貴人）。有電視節目《五稜鏡》講述一宗針對老師違例體罰事件，已被投訴批評教唆學生拒絕老師管束；有本雜誌《YES!》破天荒，設校園投訴專欄，畀學生一個匿名批評教畜、學校嘅宣洩空間，已經引起唔少哄動爭議，被教育界視為離經叛道嘅眼中釘。
而家：老師要待學生如朋友，就算鬧學生鬧得大聲D，都可能被學生/家長投訴，學生當面鬧返老師轉頭係正常事。家長更唔使講，係老細中嘅老細。
－－－－－－－－－－－－－－－－－－－－－－－－－－
12.「教精學生」資訊
以前：資訊匱乏，一些圈子狹窄、見識有限、校園生活就是全部的學生，往往會把校園事物不必要放大，容易被制度的權威嚇倒。例如被無理記過，只能找同儕傾訴、鑽牛角尖、甚至做傻事。
而家：資訊爆炸，網上大量資訊教精學生，校園事物，甚麼TSA、缺點小過大過，根本係過眼雲煙不值一提，唔使在意。例如被無理記過，到 Instagram / Thread訴說，火速有回應話唔使在意，記過根本不痛不癢，冇人會睇冇人會理，唔影響升學就業前途。
以前有冇人會咁教精D學生？冇，就連最「離經叛道」、最被教育界視為眼中釘嘅《YES!》雜誌，都唔會咁講(至少我冇見過)。
又試想，假如早在80、90年代已出現TSA，又會唔會有咁多資訊，指出TSA唔對學生作個人評分、唔影響學生前途，呼籲學生、家長唔需要為TSA緊張、操練？
當然，資訊爆炸是雙刃劍。它一邊為學生『除魅』，讓他們看穿制度的虛張聲勢；另一邊也帶來了全新的壓力——社交媒體上的同輩比較、網絡欺凌、以及永無休止的資訊焦慮。舊時代的學生只需應付學校和家庭的單向壓力，新時代的學生則要面對來自四面八方、全天候的社會壓力。
－－－－－－－－－－－－－－－－－－－－－－－－－－
13.中學體育衫校規
以前：中學唔准喺校外穿著體育衫，要帶體育衫回校換衫。其實相當無謂繁瑣，百害無一利：增加重量負擔(尤其對鞋)、換衫浪費時間、洗多一套衫、(最重要)換衫過程往往係欺凌、甚至性騷擾嘅一大熱點。
而家：街上可見大量穿著體育衫嘅中學生，可見呢個年代，中學普遍准許學生穿著體育衫回校離校，減少繁瑣換衫程序，亦減低欺凌甚至性騷擾風險，方便又安全。
－－－－－－－－－－－－－－－－－－－－－－－－－－
14.冷氣
以前：返學涼冷氣，係天荒夜譚。最多只有電腦堂限定。
而家：埋怨學校冷氣太凍，3x度著冷衫。偶然一日「無冷氣日」，係大新聞（當然隨著氣候暖化，呢點好難直接比較）。
－－－－－－－－－－－－－－－－－－－－－－－－－－
15. SEN (特殊教育需要)
以前：冇呢個概念，除非極端到要讀特殊學校(即係去到盲/聾/啞/斷肢/弱智嘅級數)，否則只會被標籤懶、蠢、曳、唔聽話、心散、攪攪震，罰完鬧完打完先講，或者罰完鬧完打完都冇得講。喺呢種「一刀切」嘅教育思維下，無數有潛能但需要特別支援嘅學生，被簡單粗暴咁歸類為失敗者、麻煩製造者，學習權利被剝奪，自信心被摧毀。這是那個時代背景下，無聲無息卻又影響深遠的悲劇。
而家：有特別照顧支援，例如測考加時、專屬獎學金。雖未必完美，但從『零』到『有』，本身就是一個相當大的飛躍。
－－－－－－－－－－－－－－－－－－－－－－－－－－
16.大學學費
以前：1986/87學年$4,800(每年，下同)，其後連續11年，每年均有遠超通脹，達雙位數百份比嘅瘋癲加幅。最誇張係1992/93學年$11,600，1997/98學年$42,100，5年累積加幅達263%。1986 - 1997 這11年間，累積加幅達777.1%，真係樓價都冇升得咁瘋癲。
1997 - 2009，香港每月個人就業收入中位數(下稱「中位數」)大致維持$10,000左右，2003 - 2005更有減薪潮，大學學費維持$42,100。讀3年，要12.63個月中位數。
而家：2010年起，中位數年年增加，至2024年$22,000左右，大學學費仲係$42,100。讀4年，要7.65個月中位數(留意，已經讀多一年)。
$42,100維持長達27年，至2025/26學年才略為上調，雖然連續3年每年上調約5.5%，但仍遠低於多年通脹、更遠低於1986 - 1997的瘋癲。
－－－－－－－－－－－－－－－－－－－－－－－－－－
17.獎學金
以前：門檻極高，神童級學霸專利。對絕大多數學生嚟講，完全係另一個次元咁遙遠。而且如果唔係名校，好可能根本冇獎學金機制，就算全級第一都冇。
而家：「親民」得多，可能普通學校、中下成績都有機會。因為生育率低，越低 Band越冇名氣嘅學校、收生不足殺校危機越大，所以越要靠銀彈拉客保命。獎學金的功能已從單純的「精英嘉獎 」，擴展到兼具「招生誘因 」。
2008年，政府成立 $10億香港特別行政區政府獎學基金，2018年向基金額外注資$8億，2019/20學年起頒發更多獎項。
真人真事：我見 Facebook有人出post話，佢00後小六子女，獲得獎學金，佢冇提及獎項名稱、金額、獲獎原因，post有一張支票相，支票印有校名，其他資料佢幾乎全部遮晒。幾個月後，獎學金得主升上Band 2C至3A之間嘅中學，可見佢嘅成績，好可能係中等至中下 ----- 咁都有獎學金？
4年後，佢又出post話，呢位已中四嘅00後，又拎獎學金，同樣冇提及獎項名稱、金額、獲獎原因。
留意，當事人係基層家庭，住新界公屋、讀區內公屋街坊學校。
這個例子正正反映出，在生源競爭下，學校不得不以銀彈政策吸引學生，使得獎學金的門檻大大降低至相當「親民」，惠及了更多以往無法觸及的普通學生。
－－－－－－－－－－－－－－－－－－－－－－－－－－
18.出行/School Trip
以前：一年一次去郊野公園HEA幾粒鐘嘅秋季大旅行，最巴閉就係小六臨畢業前宿營，去海洋公園已經係難以想像嘅終極 Boss 級豪華活動，而且基本上未到中六七預科班都唔使旨意。遊學團？乜嚟架？食得架？（除非你讀貴族學府或超級名校）。
而家：去郊野公園HEA幾粒鐘嘅旅行可能一年兩次。除咗旅行，仲有咩「全方位學習日」。海洋公園？香港迪士尼？好可能幼稚園旅行、影畢業相已經去過。
最誇張係 ，公屋街坊小學都有飛機遊學團。未必豪到去南北極，但中國大陸、東南亞、日韓、歐洲、澳洲已經係「常規操作」。
真人真事：
個案 A（小五足球小將）：
上面提到攞獎學金嗰位家長，另一子女，小五聖誕假已經「賣甩」老豆老母，跟學校定機構去日本做足球集訓。從社交媒體所見，佢喺富士山景球場踢波、之後去東京迪士尼。記住，係新界公屋家庭、區內屋邨小學、小五。
個案 B（環遊世界）：
隨便開一間公屋小學（例如屯門安定邨、天水圍天華邨某東華三院小學）嘅官網，你會懷疑自己去咗「港島半山頂級豪華貴族國際名校」網站。
「交流團」、「研習團」多如繁星，目的地包括：澳洲、西班牙、芬蘭、丹麥、英國、奧地利、加拿大、日本、馬爾代夫……當然仲有大量中國大陸。
此外仲有：
頒獎禮： 一年 9 次（獎項多到令人懷疑人生，以前？唔罰你唔鬧你唔打你，已經係恩賜，頒獎？全級考頭三才有資格上台）。
生日會： 隔月一次（以前？幼稚園先有，小學邊有呢支歌仔）。
本地參觀：無數個，6月頭臨近大考，都仲去海公(而家學生壓力大到冇喘息空間？)（以前？畀盡一年一兩次，海公？如前述，未到中六七唔好諗）。
https://www.twghtskp.edu.hk/tc/activities?year=All
https://www.twghlthlp.edu.hk/activities
(只係冰山一角例子，GOOGLE 小學 遊學團/研習團/交流團 之類字眼，仲大把震撼嘢)
90 年代玩超任版《心跳回憶》，見到日本高中生修學旅行去北京或澳洲，真心震撼羨慕，覺得日本好豪，香港好寒酸。當時心諗：「Game 啫，現實係咪真係咁正先？」。後來了解多咗，先知日本高中修學旅行，其實都係以國內為主（京都奈良、沖繩係標配），海外唔算多。
而家，個世界逆轉咗：
日本高中生修學旅行，仲係去京都睇寺、奈良餵鹿居多；香港連公屋小學都玩到去歐洲、澳洲、加拿大、馬爾代夫！
同當年玩《心跳回憶》嗰種震撼羨慕感相比，而家嘅逆轉感覺，真係不可思議。仲要《心跳回憶》係高中，而家香港係小學！
如果穿越去「豐盛輝煌、人間天堂」嘅80至90年代，去某間屯門公屋小學門口，放學時間，宣讀201x-202x年，同一間小學嘅遊學團通告，估下會點？
場景可能係咁：
穿越者： 「喂，細路！知唔知 30 年後，你哋學校會帶師弟師妹去邊度 School Trip？」
學生 A： 「去邊？荔園？定太空館？係咪終於有得去海洋公園喇？」
穿越者：「錯！去馬爾代夫考察海洋生態！去芬蘭探聖誕老人！去巴塞隆拿睇高第建築！去維也納金色大廳聽音樂！仲海洋公園？到時連去東京迪士尼都係小菜一碟咋！」
學生 B： 「馬爾代夫？係咪即係黃金海岸個新商場呀？有冇麥當勞食㗎？」
學生 C (眼神死)： 「癡線佬... 走啦，唔好理佢。」
家長 D： 「先生你冇事呀嘛？東京迪士尼都仲話小菜一碟？去海洋公園已經夠晒奢侈啦！我連飛機都未搭過呀！我個仔連回鄉證都未有呀！」
家長 E (眉頭深鎖)： 「先生，你係咪青山偷走出嚟㗎？搭輕鐵去元朗都要幾蚊雞咁貴啦，乜嘢芬蘭、巴塞隆拿、維也納？都唔知你講乜地方！我做大興紡織廠，老公做三行，做十世都去唔起啦！你唔好呃細路啦！」
老師 F(推眼鏡、嚴肅)： 「呢位先生，請唔好妖言惑眾散播謠言。我哋學校秋季旅行係去大棠荔枝山莊燒烤，已經係極限挑戰，每位收費 $20，已經好多家長嫌貴喇。去完仲要寫 200 字悔過書... 呀唔係，係遊記。去歐洲？你估我哋學生係港督個仔定李嘉誠個孫咩！你再唔走我報警拉你！」
結果，穿越者被當成「異想天開的瘋子」，被警方列作「傻人發現案」處理，關進去青山醫院去了（就在屯門，很方便）。
－－－－－－－－－－－－－－－－－－－－－－－－－－
19.學業未竟全功，早早告別校園嘅支援
以前：可能完中三已淘汰。冇支援，展翅青見、毅進、再培訓（年齡下限30歲）通通都冇。工業學院（部分 IVE 前身）嘅低級課程種類單調，幾乎全部係機電車工程類。女仔通常認為「男性化」、「唔適合女仔」，唔願意入。男仔入，就面對全男班和尚寺格劍環境，兩者都唔係好事。而且，怕污穢怕體力勞動的話，幾乎只有電子工程可以揀得落手。
而家：幾乎保證完成中六（除非自願退學）。支援有展翅青見、應用教育文憑（前稱毅進）、再培訓（年齡下限已下調至15歲）。完成中三可報讀職訓局 DVE（職專文憑），課程種類豐富，除咗機電車，仲有資訊科技、人工智能、商業、美容、設計、酒店、健體、音樂及媒體、無人機娛樂、甚至連電競都有。就算怕污穢怕體力勞動，都仲有大把嘢可以揀。
https://www.vtc.edu.hk/admission/tc/programme/s3/diploma-of-vocational-education/
－－－－－－－－－－－－－－－－－－－－－－－－－－
以下兩點，與學制、校園生活無直接關係，但也能反映出 「古今」小朋友和學生，在生活、福利分別。
20.公共圖書館
以前：一個嚴肅到令人窒息嘅地方。基本上都係得正經到悶、悶到暈低嘅書（偉人傳記、十萬個為什麼）。漫畫？畀盡得啲D歷史、偉人傳記漫畫，最盡最盡，得一套《加菲貓》。想搵《叮噹》睇？食懵你啦！講出嚟隨時被圖書館職員白眼，連自己阿媽都鬧埋一份：「圖書館係睇正經書、求知識嘅地方！唔係畀你睇公仔書！要睇返屋企睇！」
而家：去兒童圖書館行個圈，你會以為去咗漫畫喫茶店——《多啦A夢 (叮噹)》、《名偵探柯南》、《金田一》、《老夫子》…… 甚至係近年流行嘅繪本，應有盡有。以前被視為「閒書」、「毒物」嘅漫畫，而家係圖書館嘅重點館藏，家長仲會陪仔女一齊睇。
－－－－－－－－－－－－－－－－－－－－－－－－－－
21.學生折扣優惠
以前：地鐵學生優惠半價，博物館可能有折，然後？沒有然後了。
而且地鐵學生優惠，存在陷阱，甚至係一種地理與制度嘅雙重歧視。
地鐵 (MTR)： 地鐵地頭嘅都會區學生，係天之驕子，享有半價。
九鐵 (KCR)： 完全沒有半價！ 12 歲或以上（包括學生）即要畀成人全費。（唔知九鐵 (KCR)係乜？證明你活喺幸福年代，問 Google / AI 大神啦）。
這裡有幾個極度荒謬的現象：
獨市生意，硬食全費： 香港人口大倉喺新界，而九龍塘以北同荃灣以北嘅鐵路服務，都係九鐵獨市。
大專院校集中地： 最諷刺係，九鐵沿線正正係全港最多大學/大專嘅地段（理大、城大、浸大、中大、教大前身教院），但偏偏冇學生優惠。
廢紙一張： 當年幾多新界中學生、大專生，銀包明明有張「地鐵學生優惠乘車證」，但每日搭九鐵嗰陣，依然要無選擇地支付成人全費。望住張地鐵優惠證，喺九龍塘以北同荃灣以北，形同廢紙，嗰種「睇得唔用得」嘅心情，真係百般滋味在心頭。
誤墮法網： 更大鑊係，唔常接觸九鐵嘅市區學生，未必知悉呢個兩鐵分歧（學校又冇教），以為「學生搭鐵路就有半價」，而喺九鐵誤用小童飛，隨時中招被查飛組罰錢。
題外話一講：
2007 年兩鐵合併係好錯——錯在太遲！
根本 80 年代初，九廣鐵路英段電氣化時，就應該將此線交予地鐵營運，而非成立甚麼狗屁垃圾九鐵公司。呢個絕對係香港交通史上一大敗筆，其中一點，就係令九龍塘以北同荃灣以北嘅學生，被剝削咗足足20年。
而家：「全日制學生證」簡直係一張「社會特權卡」，優惠覆蓋衣食住行娛樂：
交通： 港鐵半價（包括原九鐵路線）(機場快線、涉及羅湖及落馬洲站之車程除外)、輕鐵半價、九巴長途即日回程半價。
以前學生搭鐵半價，係市區專享，荃灣以北、九龍塘以北學生，要捱成人價，而家終於平權。
音樂 (最癲呢樣)： 以前買隻新 CD 都 $100 起跳。而家 YouTube Premium、Apple Music、Spotify、KKBOX 全部有學生 Plan，接近原價半價，HK$3x - $5x 一個月任聽。
娛樂： 海洋公園、迪士尼樂園年票折扣；戲院、唱 K 有折扣。
飲食： 大量快餐店、米線店、茶餐廳，著校服或出示學生證有「學生餐」或折扣。
科技產品： Apple、Samsung、Microsoft、ASUS、Dyson、小米等 IT 產品，豐澤/百老匯等連鎖電器店，都有「教育商店」折扣或學生專屬優惠網。
－－－－－－－－－－－－－－－－－－－－－－－－－－
20、21這兩點，將對比從「校內」延伸到「校外」，證明了現在的小朋友和學生，不論是在學校裡還是社會層面上，都享有比以前優厚得多的資源和優待。
－－－－－－－－－－－－－－－－－－－－－－－－－－
現在的學生、小朋友，真的比以前更大壓力更痛苦？真的不比以前幸福？總結以上21點的比較，無論是從升學競爭的激烈度、物質生活的舒適度、個人權利的保障度，還是社會提供的機會與安全網來看，答案已不言而喻。
另外，網上所見，類似話題，常有人提出失實言論，總係歪曲以前幾好、而家幾差，有必要作事實澄清。先講明：我完全唔係話而家學生絕對幸福冇壓力、教育制度冇問題。我只係反對用假歷史去證明「而家一定比以前慘」。
A.失實言論：「 DSE 一試定生死，會考同 A-Level 有兩次考入大學機會」
事實澄清：
所謂「會考 + A-Level = 兩次入大學機會」嘅講法，係將「連環淘汰賽」扮成「雙重保障」。
現實係：
會考唔過 → 無資格考 A-Level → 出局
會考通過 → 只係獲得「去第二次一試定生死」的入場券
A-Level唔過 → 一樣同大學無緣
連埋中三淘汰計落， 中三、會考、A-Level 三關，每一關都係「唔過就出局」，係三關一刀切的死線，
而唔係乜春「兩/三次考入大學的溫柔慈悲機會」。
如「5. 中學關卡⋯⋯」所述，如果會考個別科目失手，就算如有神助，喺 A-Level 表現突出，亦可能註定同某些睇重會考嘅大學無緣。
－－－－－－－－－－－－－－－－－－－－－－－－－－
B.失實言論：「以前多重關卡淘汰，係好事，畀唔係讀書材料嘅人早日解脫，走學術以外嘅路。而家硬要全民坐到中六受公開試洗禮，畀假希望唔係讀書材料嘅人，根本冇必要，仲係浪費時間同金錢。」
事實澄清：
- 80至90年代，大部分完成中三就被淘汰嘅學生，係因為成績較遜色、家庭貧困、校園生活極不愉快等原因，被迫離開校園，而唔係自己選擇：「我好清醒，發現自己唔適合讀書，所以追夢去了。」。呢種絕非「解脫」，而係被剝奪了繼續接受基礎教育嘅權利。
- 連政府文書助理( CA )、郵差、水電煤抄錶等基層工種、入讀 CCTVB 藝員/配音員訓練班等，都要求中四或更高程度，實無法認同中三淘汰學生是好事。呢種絕非「解脫」，而是過早淘汰。
- 一個15歲、中三程度嘅少年，可以搵到乜嘢「學術以外嘅路」？如果反問發表呢D偉論嘅人士：「如果你嘅子女，15歲完成中三，就已經「解脫」，然後去行做廚房、M記、車房、地盤、裝修、跟車呢D「學術以外嘅路」，你真係會讚制度好、早釋放佢潛能？」，答案幾乎肯定係絕對唔會，完全暴露咗自相矛盾。
- 而家並冇強迫全民完成中六，如「19. 學業未竟⋯⋯」所述，完成中三即可轉讀DVE，而且課程種類遠比以前多元化。仲有展翅青見、應用教育文憑、再培訓呢D支援。
- 呢D人又往往會話：「以前嘅家長，會接受仔女未完成中五就轉讀工業學院，而家冇家長會接受，只會強迫仔女坐到中六，所以DVE係冇人讀。」
唔該！如果冇人讀，仲會持續開辦咁多年嗎？萬人迷姜濤、2019年全裸「跳海自殺」嘅少女游泳健將、事件導火線嘅台灣遇害女死者等，都係完成中三就轉讀DVE(台灣遇害女死者甚至係中學讀傳統名校)。冇人讀？冇家長會接受？
當然，呢D人又會話，呢3個係極個別例子，除咗呢3個，冇家長會畀仔女未完成中六就轉讀DVE。以前中三轉讀工業學院大把前途，而家讀DVE係冇用⋯⋯總之呢，龍門識飄移，乜都以前好。
以前中三淘汰係「制度幫你選」：你冇得讀中四，轉去工業學院吧；而家則係「制度畀你選」：你升中四定轉去DVE？前者叫剝奪，後者先叫選擇。
口講「唔係讀書材料，就早日解脫好D」好 heroic，但從來冇人主動拎自己仔女去試行呢條「好制度」，呢種就叫：「替歷史的殘酷講好說話，但從不敢替自己家庭採用。」
－－－－－－－－－－－－－－－－－－－－－－－－－－
C.失實言論：「而家D小朋友，要考入名校/Band 1，要學習幾多才藝、要幾多十項全能、琴棋書畫文武雙全樣樣皆精？仲唔痛苦唔大壓力？」
事實澄清：
- 唔通以前要考入名校/Band 1，就唔痛苦唔大壓力？尤其以前適齡學童更多，競爭更激烈，只會更痛苦更大壓力。
- 而家有唔少非名校普通學校，面對收生不足殺校危機，為求保命，當學生、家長係VIP，以近乎乞求嘅方式招生（以前適齡學童多，幾差嘅學校，都唔擔心收生不足，絕對唔會咁樣乞求生源），你嫌 Cheap唔要。普通學校畀敬酒你唔飲，畀Easy Mode你唔玩，係要走去嗰D店大欺客、吊高嚟賣嘅名校/Band 1度飲罰酒、玩Hard Mode甚至Nightmare Mode、Infernal Mode，係咪值得？自己犯賤，係要捨易取難，怪得邊個？以前冇 Instagram、冇 Band 1 排名榜，但有更窄的學位同更硬的淘汰線；而家 Instagram、ranking 搞到人心焦慮，但學位寬鬆、學校求生源。如果你選擇自願擠喺名校窄門，再話「成個時代D學生慘過以前」，咁係你自己的選擇，而非制度本身。
再講，課餘時間學乜學物，係咪一定唔好？根本係睇立場。同一件事，唔同地方、時代，可以完全唔同解讀。
