《星空之願》(前稱:3A班死亡遊戲): 附錄、

附錄：曦嵐的遺書

呢封係我嘅遺書，而家我心裡面好亂好痛，亂到我可能會寫得好亂，我心痛到我覺得自己再撐唔落去。

我喺一個單親家庭長大，屋企得我同媽咪，佢為咗養我，日日喺外搵錢，成日唔喺屋企，屋企經常得我一個。我見佢咁辛苦，唔敢同佢講我嘅痛，驚佢會再多擔子。我好愛佢，但我就係講唔出口，一直以來我都過得好辛苦，覺得好孤單。

喺學校受到欺凌之後，我每日都好唔開心，夜晚喊到瞓唔著，朝早醒返都仲覺得好攰，成個人都好似冇咗靈魂咁。嗰啲屈辱嘅畫面同聲音好似刀咁插喺我心入面，拎唔走，忘唔掉。一諗起就覺得好似再痛一次，我真係好辛苦，辛苦到覺得自己唔屬於呢個世界。我試過好多次同自己講要捱過去，但每次閉眼，嗰啲聲音同畫面都返嚟，嗰啲羞辱好似劇毒咁喺我心入面散開。我好絕望，絕望到覺得呢個世界再無我嘅容身之處，絕望到我淨係想離開。

我唔明白點解似女仔係一個問題，錯嘅應該係呢個社會點睇我。點解我唔似其他男仔咁粗魯、唔夠高大、講話細聲，就要俾人笑？點解我同其他人唔同，就要俾人當怪胎？呢個社會好似永遠都唔會接受我咁嘅人，我淨係想做一個溫柔嘅人，我做錯啲咩？點解要咁對我？呢個社會好似一隻無形嘅手，成日壓住我，話我唔夠好，話我唔應該存在。我試過改變自己，但我就做唔到，我本身就係咁。呢份無力感好似一塊大石壓喺我心口，抖唔到氣，痛到我覺得自己再無路可走。





喺學校，我唯一嘅朋友係樂希。嗰日佢見到我俾人欺負，佢明明好驚，但都試過出聲阻止，我知佢努力咗。我好感動，因為換轉係我，我應該冇呢個勇氣。樂希，多謝你畀咗我一啲溫暖，喺嗰啲黑暗嘅日子，已經好似一絲光咁珍貴，係我人生最後嘅一點光。多謝你曾經同我喺操場睇星，嗰晚我真係好開心，覺得自己終於有咗一個朋友。我知你之後仲同你啲朋友一齊告發嗰啲壞人，樂希，你真係好善良，我好感激你，我唔會怪你，我知你已經好努力幫我，唔係你嘅錯。

呢封遺書，我要同媽咪講聲多謝，多謝您獨力養大我，我知您好辛苦，我唔講係唔想再加重您嘅負擔，我好愛您，我以為自己可以面對到，但我真係唔得。我要為自己嘅自私決定同您講聲對唔住，我真係唔夠勇氣再捱下去。對唔住媽咪，我已經盡力了。

如果有來生，我希望我會過得開心啲，唔使再喺黑暗中掙扎，唔使再俾人用歧視嘅眼光睇我。我希望我會做個善良真誠嘅人，用我嘅力量幫助弱小，唔會再似今世咁無力。同埋希望來生，可以訓喺草地上，睇住一大片星空。

夏曦嵐 絕筆