《A》: 1
見工時嗰HR姐姐幾好人，唔介意我有啲輸蝕嘅CV，有人肯見我第二次就開心。
問完頭一輪差唔多嘅問題，佢好親切咁問我：
「你情緒穩唔穩定？
擅唔擅長照顧人？」
擅長...
為咗有份工，唔擅長都要擅長，返去搵工人姐姐惡補知識。
總之，我要返工，唔想留係屋企。
「吓？可以嘅，不過同份工有咩關係？」
正常人聽到上面一句都已經打退堂鼓，但我唔想返屋企安排嘅公司，以後嘅我會好後悔當時呢個決定。
「因為我哋暫時係需要文職同秘書呢個位，多人工係因為唔怕坦白同你講，需要視情況去決定你嘅工作量。」
即係睇人工做嘢，事多事少都睇人工份上？
係咪唔好睇人情，亦都唔好重人情。
「我都係睇人工啫...」
咁返工邊個唔係咁諗？
咁上心做咩？
講完之後HR無即時反應，係我表情由猶豫到勢利之後，先好欣賞我咁講：
「咁就啱喇，我哋都只希望員工當呢份係工，唔洗太上心。」
正正常常一間公司，個個都係為錢先返工，畀佢講到好似有錢以外嘅嘢值得留低咁。
「你哋係揀中我所以先咁坦白？正常見工...」
HR姐姐笑笑口，又帶啲無奈講：
「我哋係正經公司，只係老闆比較難服侍，你仲有觀察期，暫時先做公司文職，之後會再同你交代。」
有工唔洗留係屋企，即時𦧲飯應。
第二日就可以返嘅工通常都係伏，但呢度又幾融洽，見到啲人會一齊食早餐，又會幫人帶早餐嚟
「大家好我叫Ace顧啟意，今日第一日返工，以後麻煩大家多多指教。」
所有同事都交代我一件事—
唔好行去最遠嗰間、無名牌嘅房。
有人行出行入都好，唔好望、唔好八卦。
但佢哋又好奇怪，當房裡面嘅人行出嚟，由其係人停留喺影印機或者茶水間嘅時候，佢哋就會好快咁去問人有冇需要幫忙。
成個部門嘅同事去晒開會，我得到食飯時間就去食飯，到食完晏無耐有一個看似高層嘅人係會議室行出嚟，然後嚟到我位面前。
佢好熱情咁同我打招呼，然後就講佢想講嘅嘢。
「你係新嚟嘅同事？
唔好意思呢排比較忙，你可能暫時未有嘢要跟，等我哋忙埋呢幾日就訂位同你食飯，呢幾日你準時收工就得唔洗怕羞。
呢度係今日下午茶嘅錢，冇嘢搞嘅話去出面問人有咩下午茶好食去買，我哋食咩都得～」
我接完錢講多謝，好猶豫咁停頓，佢無發現佢無講佢叫名，佢唔知我係邊個，我又唔知佢係邊個咁。
佢無為意我到最後都唔知佢叫咩名，就行去廁所，咁人哋都唔在意，我就唔理人叫咩名。
跟住我就去唔好部門度同人吹水識人，好好彩啲人都幾唔錯，好快就識到人同埋有埋聯絡方式。
我得到情報之後就準備落去買嘢食，點知畀我撞正房嘅人出嚟一齊落樓。
㩒完𨋢，唔敢有好奇心，唔敢望。
睇人樣貌、衣著都正常，係咪太叻被人杯葛...
呢份愚蠢嘅正義感，打敗咗被叮囑嘅禁忌。
「你好，我係新嚟嘅同事叫Ace顧啟意。」
我打完招呼好耐人都無反應，望住佢好耐都無反應，𨋢打開佢想示意我行先，佢先發現我望住佢。
然後佢除低耳機，疑惑我到底講過啲咩，我無奈再講一次。
「你好...加油。」
佢愣住好耐先畀到反應，等佢覆嘅時間我確實有啲背脊冒汗，有一種好令人心慌嘅感覺，配合埋佢個樣無乜表情，唔知佢諗緊啲咩。
係咪呢一份呆滯，令到其他人唔鍾意佢？
「你係咪人杯葛緊？」
「吓？」
「你係咪唔知你被人杯葛緊？」
咁簡單嘅問題，點解會理解唔到，我又唔係用啲好高難度嘅字眼，佢係點樣做到中層至高層？
點知佢答我：
「杯葛？
哦唔係，係我唔想同人講嘢啫，佢哋係工作上確實好驚我，唔關人事。」
如果佢唔係認真咁答我，我一定會以為呢個人係度撚化我，佢真誠到我唔敢唔信呢個講法。
喺呢個社會，邊有人咁誠實咁話自己唔想社交，中高層覺得自己份工穩陣就可以咁樣講？
返工返到佢咁嘅話就爽喇。
佢係老細咪得囉。
佢係老細咪...得...囉...
屌...
唔撚係啊嘛...
『得罪人，得罪高層，都唔好得罪老細。』
呢句說話，我中咗邊一個地雷呢？求解答。
我驚慌無助唔夠膽再亂講嘢：
「哦對唔住，我小人唔識世界，你大人有大量唔好見怪...」
佢都係無乜表情，不過佢嘴角都有返啲上揚嘅角度：
「哦唔緊要，一陣唔好買我嗰份下午茶，我一陣唔返公司。」
我覺得以佢唔鍾意講嘢嚟講，『唔緊要』已經係佢可以講得出口安慰人嘅說話，同呢啲人做嘢比較好嘅係，佢直得嚟又真係唔會容易變卦，前提係做到佢想要嘅嘢。
「知道你慢行拜拜。」
跟呢啲大佬都唔錯，不過第一日就打中咗件大佬。
好癡線，想辭職。