《A》: 2
未來得及思考辭職嘅事，第二日已經要配合公司出差，而出差對象係尋日嘅𨋢中人...
喺屋企一落樓見到有人係車裡度響咹，其實有啲驚，不過周邊無乜人，應該係呠我。
手機有訊息，車裡面嘅人影咗一張我即時嘅寫真，無存名嘅電話號碼，文字顯示—
『你好新同事我係你老細』
『上車』
即刻上車之後，之後老闆一輪嘴講—
「叫我Jason就得，你而家返屋企執行李，出差兩個星期，幫我貼身睇住同你出差嗰個。
咩都可以報銷，同我氹到佢做完嘢之後返到嚟，唯一要請示同阻止嘅係佢想去好遠嘅地方，或者要撇甩你嘅時候，最好住埋一間房、廿四小時零距離睇實佢。
我會隨時聽你電話，唔好擔心。」
如果我唔係知道呢間公司做咩，同埋有簽僱傭合約，我會以為將會被人賣豬仔。
真正嘅老闆搵上門，咁即係尋日嗰個啊係老闆，只係高層。
頂…
以我呢一刻係小薯嘅身份，得罪中高層都等同死得。
「邊個佢？我尋日先第一日返工...」
唔知點解有一種『中獎』嘅感覺，公司有咁多人唔會咁蹺嘅...
「得㗎喇你夠醒目唔洗擔心，我唔知你有冇國際車牌，今次唔幫你揸車，啊千祈唔好畀佢飲酒同揸車—」
老闆真係老闆，四兩撥千金，完全唔想解答我嘅問題，唯有再問一次。
「其實係邊位我需要陪？」
佢把口終於停一停去諗應該點樣解釋：
「游亦然Avery，你尋日話人被人杯嗰個，佢而家仲未知自己要出差。
你快啲去執嘢我要車你去佢屋企，然後再車你哋去機場，快啲去執行李～
嗰度天氣同呢度差唔多，去到先買衫都可以報銷，你自己安排。」
唔怪得要諗喇，佢同老闆好熟喎...
我係咪應該開心我無被人炒，同可以貼身照顧人，無禍從口出。
出差係死刑，判咗死緩畀時間我補救，萬一照顧得人唔夠好就死刑即時執行被人炒...
咁仲有得補救，又可以去學嘢，唔好咁快放棄啊顧啟意！
糊里糊塗返屋企執行李，同工人姐姐講聲要出差，然後同老闆一齊去到人哋屋企，人哋未起身，老闆好積極話佢去煮早餐，我要去叫人起身...
普通同事，剛入職，入屋叫人起身。
開始理解點解尋日某人話佢唔鍾意有人同佢講嘢，老闆帶返咗一日工嘅職員零邊界感登堂入室，換著係我都頂唔順。
一開門就見到人坐係床邊睇電話，佢見到我嗰刻有啲愕然，拉一拉張被。
佢有著衫，可能怕凍。
當然我之後先知唔係...
「早晨老闆佢係出面煮緊早餐...」
好尷尬，我好似做咗虧心事被人發現。
好彩人哋無對我發脾氣，反而係疑惑另一樣嘢：
「我屋企無嘢食可以煮。」
同佢一齊行出房，見到老闆拆緊外賣，一見到人出門口手忙腳亂想收埋，趕唔切只可以賠笑應對。
人哋無講啲咩，行去廁所梳洗換衫，我幫老闆拆外賣落座。
人哋梳洗坐低食嘢，食夠先出聲問問題。
「做咩帶人嚟。」
老闆一直怯場唔出聲食嘢，同我問問題嘅答法唔同，佢面對中層時答得直接好多。
「出差。」
「唔去。」
對方秒答，老闆同我差啲濁親，點解佢可以咁快手直線得罪老闆，我會想學習呢一份勇氣。
「大嘢，你要去搞。」
「唔去。」
「要去。」
呢一份無勇無謀勇氣都係唔好學，老闆臉色陰晴不定，最後放棄說服佢。
我衰為食安安靜靜食少少嘢都有報應：
「我洗唔洗幫你打埋辭職信。」
同我講呢啲嘢做咩啊大佬！
呢啲時候你先記得有我坐係度...
「吓？我唔知咩事...」
唔知佢記唔記仇，關係係必須即時撇清嘅，我要份工唔好累我。
估唔到老闆有良心救我：
「你想辭職都得，要一個月書面通知，你屋企無打印機，你又無其他同事聯絡方式，你點都要去咗先。」
哇老闆點解可以咁熟悉佢，將『無人無物』呢四個字，放係佢身上發揮得淋漓盡致。
本來睇唔到呢場交邊個贏，因為另一個參賽者表情無變化，又無駁嘴。
「我可以完成工作，但唔想見到佢哋。」
需要係意料之中嘅下位者妥協，但又唔明一直處於上風嘅佢點解會揀低頭，睇得出老闆都唔敢夾硬嚟...
老闆收起嬉皮笑臉：
「可以，我可以幫你避免同佢哋見面嘅場合，但人一定要到，嗰邊嘅規矩係要人到先接受方案。」
係老闆嘅角度，呢啲算唔算揸頸就命？
睇唔明，但唔好拖我落水。
點知下一秒：
「你返嚟，我幫你安排一份工，有三倍違約金，你而家幫我同你自己遞辭職信。」
屌大佬唔好搞我，真係呢個時勢好難搵工，我唔想留係屋企！
今次老闆唔救我，佢想睇吓我有咩反應，我可以有咩反應...
「我尋日先入職，辭嘅話即日就辭到工，邊個陪你出差。」
正經回應後得到中層經過大腦思考嘅回覆：
「咁...你行程最後一兩日辭，而家幫我聯絡人遞信。」
我輕輕點頭繼續食嘢，老闆忍唔住要刷存在感：
「你當我死㗎！係我面前慫恿我員工辭職，你...」
「夠你直接安排我離職咁盞鬼。」
哇...
道行唔夠嘅我，真係玩唔起呢種信任遊戲，萬一老闆係真係你離職而咁安排...
唔知佢哋會唔會考慮成為現實生活、愛情上嘅天生一對人選，CP鎖死。
「我邊有...我只係抵受佢哋嘅金錢同屋企嗰個嘅誘惑，你原諒我喇～」
老闆唔好咁喇好唔好，唔係收錢做你員工就頂得順，會嘔㗎。
睇到游氏嘅面不改色，我學唔嚟，點解佢會頂得順？
「睇情況，食完未，幾點機。」
估唔到老闆呢一招氹得掂佢當無事，感情真係好...
普通老闆員工、上司下屬，有啲咁難頂嘅情節嘅咩？
如果到係我身上面發生，一定會辭職。
「夜晚機，放心大把時間～」
我望住老闆心虛表情都有啲嬲，早講可以慢慢嚟，咁早開始要對住你兩個嘈交，你估唔驚㗎！
「改早啲。」
「唔得。」
「咁你返去先，唔想見到你。」
中層英明，好鍾意佢有咩都會講出口，唔怕得罪人。
「好啊，你哋一路順風～」
老闆鬆一口氣再鬆埋人，真係好服佢哋呢種算係老友嘅相處模式，換個人真係接唔住對方嘅廢話裡面嘅意思。
結果我開始準備食多兩啖時，先發現人哋已經放低餐具問問題。
「你叫咩名？」
算佢係中層，對我尋日嘅表現唔上心係正常。
「Ace顧啟意。」
唔係喎老闆知我尋日同佢講咩，佢本人其中一個需要備註嘅特質，係咪會記啲唔記啲...
「我唔係啲咩易服侍嘅人，所以唔洗服侍我，去到你旅游就得，我有需要會叫你。
錢、食嘅，電子嘢歸你管，我唔會理，食嘢好食地飽就得，唔洗幫我安排太多。
仲有，呢張卡你拎住，我私人畀你嘅獎金，有啲嘢到時可能要麻煩你。」
係我諗緊咩叫『食嘢好食地飽』，餐餐快餐店得唔得？
儲分換公仔嗰啲得唔得？
如果得嘅話，以後食飯預埋佢，好快可以儲分換到特別版公仔。
見佢唔出聲，我又無為意，只能反問吓佢想講咩。
「咩事？」
「扮我另一半，唔洗身體力行嗰度，行行企企就得。」
餐具被掉落檯，餐具同張檯會唔會好易爛同花。
大佬玩咁大，返工要出賣自己？
「可以嘅咩？」
明明講呢啲嘢嘅人係佢，佢平淡好似無事發生咁，係我好大反應。
「吓？」
我組織咗好耐語言先講：
「我哋點睇都唔似係埋一齊嘅人。」
委婉佢聽唔明，要直接啲講，佢嘅認知同我有一定差距，佢想要啲咩都要講多啲先知我會唔會抗拒。
「唔知你講咩，總之我需要有個人阻止其他人煩我。」
屌佢真係聽唔明唔係扮...
我終於聽得明，必要時介入上司感情，成為一隻專業工作兼愛情擋箭兵。
上司老闆通病—
我唔知，但我要。