gen z 中學淫賤事件簿: Ch. 1 六點零九分（零甜）
我叫 Ronnie，樣同身高都普普通通，姐係每班都有嘅 average 中學男仔啦。每日返學無非都係同班 frd 鳩下鳩下，放學再一齊食撈麵咁，再唔係就留低搞辯論隊。雖然辯論隊個阿 sir 的確好 harsh，不過為咗可以陪 Cathy 師姐都值嘅。
Cathy 今年 f5，大我三年。個樣有少少似 aespa 嘅 Winter，不過就有少少大細眼。但係因為有玩 cosplay，所以都幾識打扮，風格上少少地雷系得黎又唔算 mk。啱啱入黎辯論隊嗰陣，Cathy 成日坐喺課室後排，又 poker face 咁，加上佢個公主切瀏海，俾人一種高冷嘅感覺，所以我都唔係好敢靠近佢。直到有一次比賽完咗我搭車返屋企，先發現原來佢啱啱搬咗去我隔離棟大廈。
由地鐵站行去佢屋企，行得快嘅十分鐘都得。但嗰日，十分鐘嘅路程好似拉長到五十分鐘咁。出地鐵嗰一刻，或者出於緊張，或者出於條件反射，我望咗一望我隻錶：下午六點正。六點正嘅斜陽穿過大廈與大廈相間嘅罅隙，不偏不倚咁照射咗落佢塊側臉到。隔離嘅大馬路川流不息，身邊嘅途人絡繹不絕，但我嘅目光始終鎖死咗喺佢度。
「今日你比賽打得好好啊！」「我啱啱搬入黎㗎咋，未熟啲交通住，你知唔知呢度去觀塘點樣最快啊？我去開嗰度補數。」佢一連串嘅說話轟炸落我對耳度，但我並為對此感到煩厭，只係覺得......一種反差感。平時好似咁高冷嘅佢，私底下原來都有比較熱情嘅一面，甚至顯得佢有啲可愛。佢唔係蘿莉嗰種出自天真嘅可愛，而係有啲似迪x尼長髮公主嗰種出自好奇心嘅可愛。
突然，一個雙手各拎住一個紅白藍膠袋，略帶鄉音嘅大媽一邊大嗌「唔該借借」，一邊喺路中心用兩個紅白藍膠袋撞開途人。佢喺我後面行緊埋黎，於是我稍微向反方向褪一褪。就係嗰一刻，我地兩個嘅手背唔小心咁碰上咗。
「oh...oh sorry」我立即將手縮開。
「好多手汗 wor 你，爭係手背都咁多」佢好似恥笑我咁笑咗一笑。呢一次，係我第一次見佢笑。佢，笑得好 charm，甜得黎又帶一點調皮感。
正當我一邊 kam 笑，一邊回味緊佢嘅笑嘅時候，佢突然停低。
「我到啦！我地既然順路，不如以後都一齊返學？你唔怕我煩㗎可。」
wltf！竟然咁快就可以一齊返學！面對咁突如其來嘅邀請，我個腦不禁棘咗一棘。我望住佢，佢望住我，唔覺意對視咗幾眼。
「好...好啊！」
「咁就聽日呢度七點三十分等㗎啦！」
「好！」
「唔準！放我！飛機！㗎！」佢講嘅每一個字都特登扽出黎，少少似小朋友發我脾氣嘅感覺，同佢個樣極大反差。
「知道啦。」我伸出手指尾，同佢勾咗一勾「勾咗手指尾啦，得未？」
「嗯！」佢滿意咁點一點頭，再轉身「我走啦，拜拜！」
「拜拜！」 我企喺行人路度，望住你慢慢行入大堂，再行入部𨋢，最後望住𨋢門關閉，成個腦都係佢把聲，嘴角不經意向上揚。我低頭，望一望隻錶。
六點零九分。