gen z 中學淫賤事件簿: Ch. 2 約會（上）（零甜）
就係咁，我同佢開始咗每日一齊返放學嘅生活。冇幾耐，我地就由一齊返放學，變到一齊食 lunch，再到唔同班 frd 一齊放學食撈麵，走去同佢一齊夾「kawachii」。
有時陪佢夾公仔嗰陣，望住夾公仔機夾起又跌落嘅公仔，聽住夾公仔機重複又重複嘅罐頭音樂，老老實實我的確覺得有啲 on9。都唔明佢呢啲讀 phy chem bi 嘅 t 人點解會咁唔理性。俾你用幾廿個五蚊銀夾到又點姐？我直接買咪佢仲好。不過，望住佢每次出到貨（雖然十指手指數得晒）喺度傻笑嗰個樣，我又好似有少少滿足感，個心又好似跳得快啲咁。
甚至可以話 ...... 我有少少鍾意咗佢。佢嘅一語一笑，都可以強行將我嘅注意力轉移到佢身上。佢，係我第一個心動嘅人。
於是有一日我地放學，行到佢佢屋企門口嗰陣，我地喺附近支燈柱停低咗。正當佢一手拎住隻 kawachii，諗住轉身行入大廈大堂嗰陣，我叫停咗佢。
唔知由幾時開始，每次我有預感即將做啲 kam 嘢，我都會下意識望一望錶，好似祈求時間會快啲過咁，今次都唔例外。我深吸一口，鼓起全身嘅勇氣，問：
「你星期六得唔得閒啊？我想約你去睇戲。」
嗰日支燈柱壞咗，我根本睇唔清佢咩表情。我凈係知道，佢應承咗我。
然之後，佢就攞住隻公仔，行咗入大廈。我心中暗爽，心諗距離表白又近一步。同時，我亦望一望錶：
六點零九分。