壓抑: 5 久違的家常便飯

海瑤從口袋裏掏出鎖匙，「咔嚓」一聲 ，門開了。聽到鎖匙聲的外婆緩緩地從廚房行到門口。不知道是否因為太久沒見這兩個「寶貝」，外婆的淚珠竟然在眼框打轉。海瑤呆了一會，心想：不要哭啦，弄到我也想哭了～

外婆越過海瑤，站到越琛面前，伸出雙手，擁抱著越琛，在她耳旁輕聲道：「阿囡，瘦咗咁多，唔好減肥，要吃食多啲嘢呀，知道冇？」
越琛望著婆婆慈祥的面孔，回答：「嗯，知道啦婆婆」

海瑤呆了3秒，然後開口說：「請問兩位睇唔睇到我？」

外婆走過去海瑤前面，抱一抱她，便嘲笑道：「乖孫，你呷醋呀？」，海瑤尷尬地笑一笑，外婆便回到廚房繼續準備晚餐。

不久，外婆從廚房端出一大碗湯。越琛兩人見狀便幫忙把其他飯餸也端到飯桌上。





吃飯時，三人有說有笑，仿佛回到多年前的暑假。只不過當年外婆的白髮並沒有這麼多，而兩位年輕人也不像從前一樣細小了。一直吃到大概8時左右，越琛看到外婆面上掛著一絲絲的睡意便提出由自己和海瑤把碗洗了。

以下是洗碗期間的對話：

海瑤：「你聽日係咪開始去新公司請人啊？」

越琛：「2PT? 定係KxxL 阿？」

海瑤：「KxxL 啲嘢你唔洗理咁多啦，我好明顯講緊2PT 嘅招募啦...」





越琛：「睇下schedule點啦，反正都請晒啲阿頭返嚟，做乜突然關心呢啲嘢嘅？」

海瑤：「作為老闆嘅第一秘書，梗係要清楚知道公司嘅情況啦，你有新嘅行程記得同我講吖，知唔知道...」

「哦，既然你咁積極，咁你幫我睇下有冇人需要一份開發藥物嘅工囉，同埋睇下我邊個禮拜係勁得閒，得閒到可以返去小學開講座...」

「你唔係已經要喺好多中學開講座喇咩？做乜無啦啦會想返我哋小學開？」

「如果成個禮拜都冇行程我先會去」





「之前又話唔會去啲小學講，又話講完佢哋都唔會明...」

「李雪菲頭先打嚟，想我返去開講座喎...」

「嗰個歧視人嘅老師？仲以為你唔鍾意佢添...你唔好同我講你應承咗佢阿嘛...？」

「你一連串咁多問題我答邊條先？」

「順序啦...」

「係嗰個老師，人哋依家係『主任』吖」

「咁你係咪真係應承咗人啫」





「我話考慮下」

「呼～嚇死我，你知唔知你本身個行程都好滿架？」

海瑤繼續說：「如果冇記錯嘅話，你1月中應該會有時間去，點睇？」

越琛冷淡地回答道：「嗯，不過我遲啲先覆佢」，說完這句話，越琛的嘴角微微地向上移，像是想到甚麼計劃似的。

海瑤把最後一隻碗擦乾，然後轉向越琛，看到她那狡猾的笑容，輕輕地問：「賴博，今次又有咩計劃吖？」

越琛看著海瑤那充滿疑問的表情便輕笑道：「到時咪知囉」