《艾莉菲斯物語》（異世界穿越）: 第一章、西貢露營

某地一張病床上

我係張樂希，我受咗好嚴重嘅傷，想趁而家仲有意識，記錄低發生咗咩事。如果最後我都係捱唔過，一定要幫我同阿哥講，我好愛佢。阿偉佢哋而家都唔喺我身邊，阿偉我都愛你，做你男朋友好幸福。永誠、曉峰，我都好開心同你哋做朋友。


2025年7月，中三下學年，暑假，死亡遊戲發生後七個多月

由一開始講起，經歷咗咁多嘢之後，我哋嘅生活都逐漸回覆正常。

終於放暑假啦！我同阿偉、永誠同曉峰講好咗一齊去西貢露營，我哋揀咗蠔涌呢個地方，聽講夜晚可以睇到好靚嘅星空。當時我唔知道，原來簡單一個露營，又會發生啲咁嘅事。





我哋四個約去露營，係想一齊放鬆吓，同埋我自己私心想實現曦嵐嘅遺願，佢遺書講過想訓喺草地上，睇住一大片星空。

我哋揹住背囊，一路行入西貢蠔涌。都七月啦，所以太陽好猛天氣好熱，曬到我哋成身都係汗。

佢三個體能都好好，我體力真係差啲，行到一半阿偉就幫我拎埋我個背囊，阿偉望住我，眼神好溫柔，我心入面暖笠笠，但又有啲怕醜，永誠仲話我同阿偉會閃盲佢同曉峰，邊有咁易盲㗎。

曉峰雖然行最後面，但佢一手拎住行山地圖、一手拎住電話開GPS，確保我哋係行啱路，有佢喺到我好放心。佢仲做咗好多功課，佢話蠔涌呢度光害少，夜晚應該可以睇到好多星星，仲有銀河，我聽到「銀河」兩個字，心入面就諗起曦嵐，佢好鍾意睇星。

幾分鐘後，我哋終於到咗蠔涌嘅一塊草地。呢度好闊落，四圍都係樹、草、花，遠處仲見到一啲山同海，夜晚應該好靚。





我坐喺草地上，細聲講：「終於到啦…今晚可以睇到好多星星…」阿偉坐喺我旁邊，笑住講：「傻豬，當然啦！今日咁好天，我哋會一定會睇到好靚嘅星空。」佢攬住我，我覺得好安心，心裏又有啲甜。

永誠同曉峰喺草地上開始搭帳篷。然後永誠拎住帳篷嘅支架，曉峰喺一邊幫佢手，我同阿偉就幫手執好啲物資。

搭好帳篷之後，我哋四個喺草地上攤開一張大毛毯，坐喺上面傾計，然後準備簡單晚餐。

食完嘢就準備睇星，我哋訓喺大毛毯上，望住天空。蠔涌嘅星空真係好靚！滿天星星好似鑽石咁閃，銀河好似一條白色嘅絲帶，打橫咁掛喺深藍色嘅天上。

我哋頭靠住頭望住星空。「好靚…」我忍唔住自言自語，眼入面充滿住星光，心入面有種莫名嘅感動。我伸出手，想捉住天上嘅星星，心入面希望曦嵐喺天堂會見到呢片星空。





大家都好專心睇星，淨係靜靜咁望住星空。我忍唔住喊，唔知係因為感動，定因為諗起曦嵐。

阿偉見到我喊，訓過嚟攬住我，同我講：「傻豬，佢一定好開心。」永誠笑住講：「佢喺天堂一定都會睇到！」曉峰低聲講：「樂希，佢一定會感受到你嘅心意。」我一路上都冇提過曦嵐，但原來大家心入面都有默默記掛住。

我合埋眼，感覺到一陣微風吹過，好似有一股溫暖嘅氣息包住我，我心入面講：「曦嵐，你有冇喺我身邊陪住我？我好似感覺到你喺度…」微風輕輕吹過，星光好似喺我身邊閃爍，我心好平靜，好似真係感受到曦嵐喺我身邊。佢嘅笑臉同埋我哋相處嘅回憶浮現喺我腦海，我覺得好溫暖。

過咗一陣，我哋四個都覺得有啲眼瞓，就一齊入帳篷訓啦。我揀咗中間嘅位，覺得有安全感啲，阿偉喺我左手邊、永誠就喺我右手邊。帳篷入面雖然幾迫，但我哋四個迫埋一齊，都覺得好舒服。我慢慢合埋眼，感覺到星空嘅溫暖仲喺我心裏，然後好快就瞓著咗。